Yohane 3:1-36
3 Ho vha hu na muṅwe munna wa Mufarisei we a vha a tshi pfi Nikodemo, e murangaphanḓa wa Vhayuda.
2 A ḓa ha Yesu vhusiku a amba nae a ri: “Rabi,* ri a zwi ḓivha uri samusi u mufunzi, u bva ha Mudzimu; ngauri a hu na muthu ane a nga ita honovhu vhuṱolo he wa vhu ita nga nnḓa ha musi Mudzimu e nae.”
3 Yesu a mu fhindula a ri: “Ngoho ndi a u vhudza ndi ri: Arali muthu a sa bebwa hafhu, a nga si kone u vhona Muvhuso Mudzimu.”
4 Nikodemo a amba nae a ri: “Muthu a nga bebwa hani o no aluwa? Naa a nga kona u dzhena mbumbeloni ya mme awe a dovha a bebwa?”
5 Yesu a fhindula a ri: “Ngoho ndi a ni vhudza ndi ri, u itela uri muthu a bebwe hafhu, u fanela u lovhedzwa maḓini na u ṱanganedza muya mukhethwa u bvaho ha Mudzimu. Arali muthu a sa bebwa nga maḓi na muya, a nga si kone u dzhena Muvhusoni wa Mudzimu.
6 Vhane vha bebwa vhe na muvhili wa ṋama, ndi vha shango; fhedzi vhane Mudzimu a vha nanga nga muya wawe ndi vha ṱaḓulu.
7 U songo mangadzwa nga zwe nda u vhudza zwone ndi tshi ri, u fanela u bebwa hafhu.
8 Muya u vhudzula hune wa funa, nahone na pfa muungo wawo, fhedzi a ni ḓivhi hune wa bva hone na hune wa ya hone. Zwo tou ralo nga vhoṱhe vhane vha bebwa nga muya.”
9 Nikodemo a mu fhindula a ri: “Zwenezwo zwithu zwi nga konadzea nga nḓila-ḓe?”
10 Yesu a mu fhindula a ri: “Zwi ḓa hani uri u si ḓivhe zwenezwi zwithu zwoṱhe ngeno u mugudisi wa Isiraele?
11 Ngoho ndi a u vhudza ndi ri: Ri amba zwine ra zwi ḓivha nahone ri ṱanziela zwe ra zwi vhona, fhedzi inwi a ni ṱanganedzi vhuṱanzi vhune ra vhu ṋea.
12 Arali ndo ni vhudza nga ha zwithu zwi re kha ḽifhasi ni si tende, ni ḓo tenda hani arali ndi tshi ni vhudza nga ha zwithu zwi re ṱaḓulu?
13 Zwiṅwe hafhu, a hu na muthu we a gonya ṱaḓulu, fhedzi ndi we a tsa a tshi bva ṱaḓulu, ane a vha Murwa-muthu.
14 Vhunga Mushe o imisela ṋowa nṱha ngei sogani, na Murwa-muthu u tea u imiselwa nṱha,
15 uri muṅwe na muṅwe ane a mu tenda a wane vhutshilo vhu sa fheli.
16 “Ngauri Mudzimu o funa shango zwihuluhulu a vhuya a kumedza Murwa wawe mubebwa e eṱhe, uri muṅwe na muṅwe ane a vha na lutendo khae a si fheliswe, fhedzi a wane vhutshilo vhu sa fheli.
17 Ngauri Mudzimu o rumela Murwa wawe shangoni, hu si uri a ḽi haṱule, fhedzi uri shango ḽi tshidzwe nga ene.
18 Ane a vha na lutendo khae ha nga ḓo haṱulwa. Ane a si vhe na lutendo khae o no ḓi haṱulwa, ngauri ho ngo vha na lutendo kha dzina ḽa Murwa mubebwa e eṱhe wa Mudzimu.
19 Hoyu ndi wone mutheo wa khaṱulo, wa uri tshedza tsho ḓa shangoni; fhedzi vhathu vha funa swiswi nṱhani ha tshedza, ngauri mishumo yavho yo vha i mivhi.
20 Ngauri ane a ita zwithu zwivhi u vhenga tshedza nahone ha ḓi tshedzani, uri mishumo yawe i si bvele khagala.
21 Fhedzi ane a ita mishumo ya ngoho u ḓa tshedzani, uri mishumo yawe i vhonwe samusi yo shumiwa u tendelana na zwine Mudzimu a zwi funa.”
22 Nga murahu ha zwenezwi zwithu Yesu a ṱuwa na vhafunziwa vhawe vha ya shangoni ḽa Yudea, a fhedza tshifhinganyana e navho henefho a tshi khou lovhedza.
23 Huno na Yohane o vha a tshi khou lovhedza ngei Enoni tsini na Salaimi, ngauri ho vha hu na maḓi manzhi henefho, nahone vhathu vho vha vha tshi khou ḓa u lovhedzwa;
24 ngauri Yohane o vha a sa athu valelwa dzhele.
25 Ha vuwa khani vhukati ha vhafunziwa vha Yohane na muṅwe Muyuda malugana na u kunakiswa.
26 Vha mbo ḓa ha Yohane vha amba nae vha ri: “Rabi, uḽa munna we a vha e na iwe seli ha Yorodane, we wa ṱanziela nga hae, vhona, u khou lovhedza nahone vhathu vhoṱhe vha khou ya khae.”
27 Yohane a fhindula a ri: “A hu na muthu ane a nga ita tshithu naho tshi tshini arali a songo ṋewa zwi tshi bva ṱaḓulu.
28 Inwi ni ṱhanzi dza zwe nda zwi amba ndi tshi ri, a si nṋe Kristo, fhedzi ndo rumiwa phanḓa ha onoyo.
29 A re na muselwa ndi mukwasha. Naho zwo ralo, khonani ya mukwasha i a mu pfa musi a tshi khou amba, nahone i a takala musi i tshi pfa ipfi ḽa mukwasha. Na nṋe ndo takala zwihulu.
30 Onoyo u fanela u ḓi hula a tshi ya, fhedzi nṋe ndi tshi ṱukufhala.”
31 A bvaho ṱaḓulu ndi ene muhulwane kha vhathu vhoṱhe. Ane a bva kha ḽifhasi ndi wa kha ḽifhasi. A bvaho ṱaḓulu ndi ene muhulwane kha vhathu vhoṱhe.
32 Zwe a zwi vhona na u zwi pfa, u a zwi ṱanziela, fhedzi a hu na ane a khou ṱanganedza vhuṱanzi hawe.
33 Ane a ṱanganedza vhuṱanzi hawe u khwaṱhisedza uri Mudzimu ndi wa ngoho.
34 We a rumiwa nga Mudzimu u amba zwa Mudzimu, ngauri Mudzimu u ṋea muya mukhethwa nga vhunzhi.
35 Khotsi u funa Murwa nahone o mu kumedza zwithu zwoṱhe.
36 Ane a vha na lutendo kha Murwa u ḓo wana vhutshilo vhu sa fheli; ane a si thetshelese Murwa ha nga wani vhutshilo, fhedzi vhuhali ha Mudzimu vhu dzula vhu khae.
Ṱhaluso dzi re magumoni a siaṱari
^ Ndi dzina ḽa u hulisa mufunzi wa Muyuda.
