Yohane 5:1-47
5 Nga murahu ha zwenezwo zwithu, ha mbo ḓi vha na vhuṱambo ha Vhayuda, nahone Yesu a gonya Yerusalema.
2 Yerusalema khoroni ya dzinngu ho vha hu na isha ḽine nga Tshiheberu ḽa pfi Bethesda, ḽe ḽa vha ḽi na phuphu ṱhanu.
3 Henefho ho vha ho eḓela vhathu vhanzhi vha lwalaho, vho pofulaho, vho holefhalaho na vho omaho miraḓo.
4 * ——
5 Fhedzi henefho ho vha hu na muṅwe munna we a fhedza miṅwaha ya furaru-malo (38) a tshi khou lwala.
6 Musi Yesu a tshi vhona onoyo munna o eḓela, nahone a tshi zwi ḓivha uri ho vha hu kale a tshi khou lwala, a amba nae a ri: “Naa u a ṱoḓa u fhola?”
7 Onoyo munna we a vha a tshi khou lwala a mu fhindula a ri: “Muṋe wanga, a hu na muthu ane a nga nkhwalela ishani musi maḓi a tshi seluwa; fhedzi musi ndi tshi ri ndi a dzhena, muṅwe u mbo ḓi dzhena phanḓa hanga.”
8 Yesu a amba nae a ri: “Takuwa, u hwale vhulalo hau u tshimbile.”
9 Musi a tshi tou ralo, onoyo munna a mbo ḓi fhola nga kathihi, a hwala vhulalo hawe nahone a mbo ḓi tshimbila.
Ḽeneḽo ḓuvha ḽo vha ḽi Sabatha.
10 Nga zwenezwo, Vhayuda vha thoma u amba na munna o fhodzwaho vha ri: “Ndi Sabatha, a zwo ngo tendelwa uri u hwale vhulalo hau.”
11 A vha fhindula a ri: “Muthu we a mphodza o mmbudza uri, ‘Hwala vhulalo hau u tshimbile.’”
12 Vha mu vhudzisa vha ri: “Ndi nnyi onoyu muthu we a u vhudza uri, ‘Hwala vhulalo hau u tshimbile’?”
13 Fhedzi onoyo munna o fhodzwaho o vha a sa ḓivhi muthu we a mu fhodza, ngauri Yesu o vha o ṱuwa nge ha vha hu na gogo henefho fhethu.
14 Nga murahu ha zwenezwo zwithu, Yesu a mu wana thembeleni a amba nae a ri: “Vhona zwino wo fhola. U songo tsha ita tshivhi, uri hu sa ḓo itea zwi fhiraho zwe wa vha u khazwo.”
15 Onoyo munna a ṱuwa a ya a vhudza Vhayuda uri o fhodzwa nga Yesu.
16 Nga nṱhani ha zwenezwo, Vhayuda vha tovhola Yesu, ngauri o vha a tshi khou ita zwenezwi zwithu zwoṱhe nga Sabatha.
17 A vha fhindula a ri: “Khotsi anga u kha ḓi shuma na zwino, na nṋe ndi kha ḓi shuma.”
18 Nga ṅwambo wa zwenezwi, Vhayuda vha tou ṋaṋa u ṱoḓa u mu vhulaha, ngauri o vha a tshi khou pfuka mulayo wa Sabatha, nahone a tshi khou amba uri Mudzimu ndi Khotsi awe, na u ḓiita u nga u lingana na Mudzimu.
19 Yesu a vha fhindula a ri: “Ngoho ndi a ni vhudza, Murwa ha koni u ita tshithu na tshithihi nga eṱhe, fhedzi u ita zwine a vhona Khotsi a tshi zwi ita. Ngauri zwoṱhe zwine Khotsi a zwi ita, na Murwa u ita zwenezwo nga hu fanaho.
20 Ngauri Khotsi u funa Murwa nahone u a mu sumbedza zwithu zwoṱhe zwine a zwi ita, u ḓo mu sumbedza mishumo mihulwane u fhira yeneyi, uri ni kanuke.
21 Samusi Khotsi a tshi vusa vhafu a vha ṋea vhutshilo, na Murwa u ṋea vhutshilo vhane a funa.
22 Ngauri Khotsi ha haṱuli muthu na muthihi, fhedzi o kumedza u haṱula hoṱhe kha Murwa,
23 uri vhoṱhe vha hulise Murwa samusi vha tshi hulisa Khotsi. Ane a si hulise Murwa u nyadza Khotsi we a mu ruma.
24 Ngoho ndi a ni vhudza ndi ri: Ane a pfa zwine nda zwi amba nahone a tenda we a nthuma u ḓo wana vhutshilo vhu sa fheli, ha nga haṱulwi, fhedzi o bva lufuni a fhirela vhutshiloni.
25 “Ngoho ndi a ni vhudza ndi ri: Hu ḓa tshifhinga, nahone tsho no swika, tshine ngatsho vhafu vha ḓo pfa ipfi ḽa Murwa wa Mudzimu nahone vhoṱhe vhe vha thetshelesa vha ḓo tshila.
26 Samusi Khotsi e na maanḓa a u ṋea vhutshilo, o dovha a ṋea na Murwa maanḓa a u ṋea vhutshilo.
27 O mu ṋea maanḓa a u haṱula, ngauri ndi Murwa-muthu.
28 Ni songo kanuka zwenezwi, ngauri hu ḓa tshifhinga tshine vhoṱhe vha re mavhiḓani vha ḓo pfa ipfi ḽawe
29 vha bva, vhe vha ita zwivhuya vha ḓo vuswa uri vha tshile, vhe vha ita zwivhi vha ḓo vuswa uri vha haṱulwe.
30 Ndi nga si kone u ita tshithu na tshithihi nga nṋe muṋe; ndi haṱula u ya nga zwine nda zwi pfa; nahone ndi haṱula nga nḓila yo lugaho, ngauri a thi ṱoḓi u ita zwine nda funa, fhedzi ndi ita zwi funwaho nga o nthumaho.
31 “Arali ndi tshi ṱanziela nga ndoṱhe, vhuṱanzi hanga a si ha ngoho.
32 Hu na muṅwe ane a ṱanziela nga ha nṋe, nahone ndi a zwi ḓivha uri vhuṱanzi vhune a vhu amba ndi ngoho.
33 No rumela vhanna uri vha ye kha Yohane, nahone o ṋea vhuṱanzi ha ngoho.
34 Naho zwo ralo, a thi ṱanganedzi vhuṱanzi vhu bvaho kha muthu, fhedzi ndi amba zwenezwi zwithu u itela uri ni tshidzwe.
35 Onoyo munna o vha e luvhone lu dugaho lu vhonetshelaho, huno no vha no ḓiimisela u takalela vhukuma tshedza tshawe lwa tshifhinganyana.
36 Fhedzi ndi na vhuṱanzi vhu fhiraho ha Yohane, ngauri mishumo ye Khotsi a nkumedza uri ndi i ite, yeneyi mishumo ine nda khou i ita, i ṋea vhuṱanzi ha uri ndi Khotsi o nthumaho.
37 Zwiṅwe hafhu, Khotsi we a nthuma o ṱanziela nga ha nṋe. A no ngo pfa ipfi ḽawe naho hu lini kana u vhona tshivhumbeo tshawe;
38 a ni na ipfi ḽawe, ngauri we a mu ruma a ni mu tendi.
39 “Ni khou ṱoḓisisa Maṅwalo, ngauri ni humbula uri ngao ni ḓo wana vhutshilo vhu sa fheli; nahone ndi one ane a ṱanziela nga ha nṋe.
40 Naho zwo ralo, a ni ṱoḓi u ḓa kha nṋe uri ni wane vhutshilo.
41 A thi ṱoḓi u khoḓwa nga vhathu,
42 fhedzi ndi a zwi ḓivha zwavhuḓi uri a ni funi Mudzimu.
43 Ndo ḓa dzinani ḽa Khotsi anga, fhedzi a ni nṱanganedzi; arali muṅwe muthu a vhe o ḓa nga dzina ḽawe, no vha ni tshi ḓo vha no mu ṱanganedza.
44 Ni nga tenda hani musi ni tshi kha ḓi khoḓana nga tshaṋu? Fhedzi a ni khou ṱoḓa u khoḓwa hu bvaho ha Mudzimu.
45 Ni songo humbula uri ndi ḓo ni hwelela ha Khotsi; u hone ane a ḓo ni hwelela, ndi Mushe, we na mu fulufhela.
46 Arali ni vhe no tenda Mushe no vha ni tshi ḓo ntenda, ngauri onoyo o ṅwala nga ha nṋe.
47 Fhedzi arali ni sa tendi zwo ṅwalwaho nga onoyo, ni ḓo tenda hani zwine nda zwi amba?”
