Yohane 6:1-71
6 Nga murahu ha zwenezwo zwithu, Yesu a wela seli ha lwanzhe lwa Galilea kana Tiberia.
2 Fhedzi gogo ḽihulu ḽa ḓi dzula ḽi tshi mu tevhela, ngauri ḽo vha ḽi tshi khou vhona vhuṱolo vhu mangadzaho he a vha a tshi khou vhu ita kha vhalwadze.
3 Yesu na vhafunziwa vhawe vha gonya thavhani, vha dzula henefho.
4 Vhuṱambo ha Vhayuda ha paseka ho vha hu tsini.
5 Musi Yesu a tshi vhona uri gogo ḽi khou ḓa, a amba na Filipo a ri: “Ri nga renga ngafhi zwinkwa uri avha vhathu vha ḽe?”
6 Fhedzi o vha a tshi khou amba zwenezwi u itela u mu linga, ngauri o vha a tshi ḓivha zwe a vha a tshi ḓo zwi ita.
7 Filipo a mu fhindula a ri: “Naho hu tshi nga rengwa zwinkwa zwa dinari* dza maḓana mavhili zwi nga si lingane muṅwe na muṅwe wavho naho vho ṋewa kupiḓa-kupiḓa.”
8 Muṅwe wa vhafunziwa vhawe, Andrea, murathu wa Simoni Petro, a amba nae a ri:
9 “Hu na kutukana ku re na zwinkwa zwiṱanu zwa bali na khovhe mbili ṱhukhu. Fhedzi zwenezwi zwi nga ita mini kha vhathu vhanzhi nga u rali?”
10 Yesu a ri: “Vhudzani vhathu vha dzule fhasi.” Ho vha hu na hatsi vhunzhi, ngauralo vhanna vha dzula henefho, vho vha vha tshi ṱoḓou vha zwigidi zwiṱanu.
11 Ngauralo, Yesu a dzhia zwinkwa, musi o no livhuha, a ṋea vhathu vho dzulaho henefho; a ita zwi fanaho nga khovhe ṱhukhu, nahone vhathu vhoṱhe vha ḽa vha fura.
12 Musi vhathu vho no fura, a amba na vhafunziwa vhawe a ri: “Kuvhanganyani matshakatshaka oṱhe o salaho, uri hu sa vhe na tshine tsha tambisea.”
13 Nga zwenezwo, vha kuvhanganya oṱhe, nahone vha ḓadza zwirundu zwa fumi-mbili (12) nga matshakatshaka e a siiwa nga vho ḽaho zwinkwa zwiṱanu zwa bali.
14 Musi vhathu vha tshi vhona vhuṱolo he a vhu ita, vha thoma u amba vha ri: “Zwa vhukuma hoyu ndi ene muporofita we ha pfi u ḓo ḓa shangoni.”
15 Nga zwenezwo, nge Yesu a zwi ḓivha uri vho vha vha tshi ṱoḓa u mu fara uri vha mu ite khosi, a dovha a ṱuwa a ya thavhani e eṱhe.
16 Musi ḽi tshi vho kovhela vhafunziwa vhawe vha ya lwanzheni,
17 musi vho no ṋamela tshikepe, vha wela seli vha livha Kapernaume. Ḽo vha ḽo no swifhala nahone Yesu o vha a sa athu vhuya.
18 Lwanzhe lwa halifha ngauri ho vha hu na ḓumbu ḽihulu ḽi tshi khou vhudzula.
19 Musi vho no alavha khilomithara dzi ṱoḓaho u vha ṱhanu kana dza rathi, vha vhona Yesu a tshi khou tshimbila nṱha ha lwanzhe a tshi khou sendela tsini na tshikepe; vha dzhenwa nga nyofho.
20 Fhedzi a amba navho a ri: “Ndi nṋe; ni songo ofha!”
21 Vho vha vho ḓiimisela u mu ṋamedza tshikepe, fhedzi tsho vha tsho no swika khunzi-khunzini ya he vha vha vha tshi khou ya hone.
22 Nga ḓuvha ḽi tevhelaho, gogo ḽa vhathu ḽe ḽa vha ḽo ima seli ha lwanzhe ḽa vhona uri a hu na tshiṅwe tshikepe nga nnḓa ha tshikepe tshithihi tshiṱuku, na uri Yesu o vha a songo ṋamela tshikepe na vhafunziwa vhawe, vhafunziwa vhawe vho ṱuwa vhe vhoṱhe;
23 fhedzi zwikepe zwi bvaho Tiberia zwa swika tsini na fhethu he vha ḽa zwinkwa, musi Murena o no livhuha.
24 Musi gogo ḽi tshi vhona uri Yesu na vhafunziwa vhawe vho vha vhe siho henefho, ḽa ṋamela zwikepe ḽa ya Kapernaume u itela u ṱoḓa Yesu.
25 Musi ḽi tshi mu wana seli ha lwanzhe ḽa amba nae ḽa ri: “Rabi,* wo swika lini fhano?”
26 Yesu a vha fhindula a ri: “Ngoho ndi a ni vhudza ndi ri, a ni khou nṱoḓa ngauri no vhona vhuṱolo, fhedzi ni khou nṱoḓa nga nṱhani ha uri no ḽa zwinkwa na fura.
27 Ni songo shumela zwiḽiwa zwine zwa sina, fhedzi ni shumele zwiḽiwa zwi sa sini zwine zwa ḓo ni ṋea vhutshilo vhu sa fheli, zwine Murwa-muthu a ḓo ni ṋea zwone; ngauri ndi ene we Khotsi, ane a vha Mudzimu, a mu vhea luswayo lwa u mu takalela.”
28 Ngauralo, vha amba nae vha ri: “Ri fanela u ita mini uri ri shume mishumo ya Mudzimu?”
29 Yesu a vha fhindula a ri: “Hoyu ndi wone mushumo wa Mudzimu wa uri ni vhe na lutendo kha We onoyo a mu ruma.”
30 Vha amba nae vha ri: “Ndi vhuṱolo vhufhio vhune wa nga vhu ita, uri ri kone u vhu vhona ri u tende? Ndi mushumo ufhio une wa nga u ita?
31 Vhomakhulukuku washu vho ḽa mana ngei sogani, samusi zwo ṅwalwa ha pfi: ‘O vha ṋea tshinkwa tshi bvaho ṱaḓulu uri vha ḽe.’”
32 Nga zwenezwo, Yesu a amba navho a ri: “Ngoho ndi a ni vhudza ndi ri, Mushe ho ngo ni ṋea tshinkwa tshi bvaho ṱaḓulu, fhedzi ndi Khotsi anga ane a ni ṋea tshinkwa tsha ngoho tshi bvaho ṱaḓulu.
33 Ngauri tshinkwa tsha Mudzimu ndi we a bva ṱaḓulu nahone a ṋea shango vhutshilo.”
34 Vha amba nae vha ri: “Murena, u dzule u tshi ri ṋea tshenetsho tshinkwa.”
35 Yesu a amba navho a ri: “Ndi nṋe tshinkwa tsha vhutshilo. Ane a ḓa kha nṋe ha nga pfi nḓala na luthihi, nahone ane a vha na lutendo kha nṋe ha nga pfi ḓora na luthihi.
36 Fhedzi ndo ni vhudza nda ri, no mmbona, fhedzi a ni tendi.
37 Zwoṱhe zwine Khotsi a nṋea zwi ḓo ḓa kha nṋe, nahone ane a ḓa kha nṋe ndi nga si vhuye nda mu pandela;
38 ngauri ndo ḓa ndi tshi bva ṱaḓulu uri ndi si ite zwine nda zwi funa, fhedzi ndi ite zwi funwaho nga o nthumaho.
39 Zwi funwaho nga o nthumaho ndi uri ndi si xelelwe na nga muthihi wa vhe a nṋea vhone, fhedzi ndi vha vuse nga ḓuvha ḽa vhufhelo.
40 Ngauri ndi zwine Khotsi anga a zwi funa, uri muṅwe na muṅwe a vhonaho Murwa nahone a mu tenda a wane vhutshilo vhu sa fheli, nahone ndi ḓo mu vusa nga ḓuvha ḽa vhufhelo.”
41 Vhayuda vha thoma u gungula nge a ri: “Ndi tshinkwa tshi bvaho ṱaḓulu”;
42 vha thoma u ri: “Naa uyu a si Yesu murwa wa Yosefa, ane khotsi awe na mme awe ra vha ḓivha? Ndi ngani zwino a tshi ri, ‘Ndi bva ṱaḓulu’?”
43 Yesu a vha fhindula a ri: “Litshani u gungula nga tshaṋu.
44 A hu na muthu ane a nga ḓa kha nṋe arali a songo kokodzwa nga Khotsi we a nthuma; nahone ndi ḓo mu vusa nga ḓuvha ḽa vhufhelo.
45 Zwo ṅwalwa kha maṅwalo a Vhaporofita ha pfi: ‘Vhoṱhe vha ḓo gudiswa nga Yehova.’ Muṅwe na muṅwe o pfaho Khotsi nahone a guda u ḓa ha nṋe.
46 A si uri hu na muthu we a vhona Khotsi, nga nnḓa ha we a bva ha Mudzimu; onoyu o vhona Khotsi.
47 Ngoho ndi a ni vhudza ndi ri: Ane a tenda u ḓo wana vhutshilo vhu sa fheli.
48 “Ndi nṋe tshinkwa tsha vhutshilo.
49 Vhomakhulukuku waṋu vho ḽa mana ngei sogani nahone vha fheleledza vho fa.
50 Hetshi ndi tshinkwa tshi bvaho ṱaḓulu, uri muṅwe na muṅwe ane a tshi ḽa a si fe.
51 Ndi nṋe tshinkwa tshi tshilaho tshi bvaho ṱaḓulu; arali muthu naho e ufhio a ḽa tshenetshi tshinkwa u ḓo tshila tshoṱhe; zwi re zwone ndi uri, tshinkwa tshine nda ḓo tshi ṋea shango uri ḽi tshile ndi ṋama yanga.”
52 Ngauralo, Vhayuda vha thoma u hanedzana nga tshavho vha ri: “Uyu muthu a nga ri ṋea hani ṋama yawe uri ri i ḽe?”
53 Yesu a amba navho a ri: “Ngoho ndi a ni vhudza ndi ri, arali na sa ḽa ṋama ya Murwa-muthu na nwa malofha awe, ni nga si vhe na vhutshilo ngomu haṋu.
54 Ane a ḽa ṋama yanga na u nwa malofha anga u ḓo wana vhutshilo vhu sa fheli, nahone ndi ḓo mu vusa nga ḓuvha ḽa vhufhelo;
55 ngauri ṋama yanga ndi zwiḽiwa zwa ngoho, malofha anga ndi tshinwiwa tsha ngoho.
56 Ane a ḽa ṋama yanga na u nwa malofha anga u ḓo vha na vhuthihi na nṋe, na nṋe ndi ḓo vha na vhuthihi nae.
57 Vhunga Khotsi a tshilaho o nthuma nahone nṋe ndi tshi tshila nga ene, na uyo a ḽaho nṋe, na ene u ḓo tshila nga nṱhani hanga.
58 Hetshi ndi tshinkwa tshi bvaho ṱaḓulu. A si tshinkwa tsho ḽiwaho nga vhomakhulukuku waṋu nahone vha fheleledza vho fa. Ane a ḽa hetshi tshinkwa u ḓo tshila tshoṱhe.”
59 Zwenezwi o zwi amba musi a tshi khou funza muṱanganoni wa khagala* ngei Kapernaume.
60 Nga zwenezwo, musi vhunzhi ha vhafunziwa vhawe vha tshi pfa zwenezwi, vha ri: “Mafhungo aya a a tshuwisa; ndi nnyi ane a nga a thetshelesa?”
61 Fhedzi nge Yesu a ḓivha uri vhafunziwa vhawe vho vha vha tshi khou gungula nga nṱhani ha zwenezwo, a amba navho a ri: “Naa zwenezwi zwi a ni khukhulisa?
62 Ni ḓo ri mini arali ni tshi vhona Murwa-muthu a tshi gonya he a vha e hone u thomani?
63 Muya mukhethwa ndi wone u ṋeaho vhutshilo; ṋama yone a i na mushumo na luthihi. Zwe nda ni vhudza zwone zwi bva kha muya mukhethwa nahone zwi ṋea vhutshilo.
64 Fhedzi hu na vhaṅwe vhaṋu vha sa tendi.” Ngauri u bva mathomoni Yesu o vha a tshi ḓivha vha sa tendiho na ane a ḓo mu fheṱa.
65 A bvela phanḓa a ri: “Ndi ngazwo ndo ni vhudza nda ri, A hu na muthu ane a nga ḓa ha nṋe nga nnḓa ha musi o tendelwa nga Khotsi.”
66 Nga nṱhani ha zwenezwo, vhunzhi ha vhafunziwa vhawe vha humela kha zwithu zwe vha vha vha tshi zwi ita kale nahone vha si tsha tshimbila nae.
67 Ngauralo, Yesu a amba na vha fumi-mbili (12) a ri: “Naa na inwi ni khou ṱoḓa u ṱuwa?”
68 Simoni Petro a mu fhindula a ri: “Murena, ri ḓo ṱuwa ra ya ha nnyi? Ndi iwe ane wa vha na mafhungo a vhutshilo vhu sa fheli;
69 ro tenda nahone ri a ḓivha uri ndi iwe Mukhethwa wa Mudzimu.”
70 Yesu a vha fhindula a ri: “Naa inwi vha fumi-mbili a no ngo nangwa nga nṋe? Fhedzi muṅwe waṋu ndi murembi.”
71 O vha a tshi khou amba nga ha Yudasi murwa wa Simoni Iskariote; ngauri onoyo o vha a tshi ḓo mu fheṱa, naho o vha e muṅwe wa vha fumi-mbili.
Ṱhaluso dzi re magumoni a siaṱari
^ Ndi tshelede ya Vharoma ya tsimbi.
^ Ndi dzina ḽa u hulisa mufunzi wa Muyuda.
^ Kana “sinagogo.”
