Yohane 7:1-53
7 Nga murahu ha zwenezwo zwithu, Yesu a bvela phanḓa a tshi huwelela ngei Galilea, samusi o vha a sa ṱoḓi u huwelela Yudea, ngauri Vhayuda vho vha vha tshi khou ṱoḓa u mu vhulaha.
2 Naho zwo ralo, vhuṱambo ha Vhayuda ha mishasha ho vha vhu tsini.
3 Ngauralo, vharathu vhawe vha amba nae vha ri: “Ṱuwa u ye Yudea, uri vhafunziwa vhau vha vhone mishumo ine wa i ita.
4 Ngauri a hu na muthu ane a ṱoḓa u ḓivhiwa, fhedzi a ita zwithu tshiphirini. Arali u tshi ita zwenezwi zwithu, ḓisumbedze kha shango.”
5 Zwi re zwone ndi uri na vharathu vhawe vho vha vha sa mu tendi.
6 Yesu a amba navho a ri: “Tshifhinga tshanga tsho vhewaho a tshi athu swika, fhedzi tshifhinga tshaṋu tsho vhewaho tshi dzula tshi hone.
7 Shango a ḽi na tshiitisi tsha u ni vhenga, fhedzi nṋe ḽi a mmbenga, ngauri ndi ṱanziela uri mishumo yaḽo ndi mivhi.
8 Inwi iyani vhuṱamboni; nṋe a thi khou ya kha hovhu vhuṱambo, ngauri tshifhinga tshanga tsho vhewaho a tshi athu swika.”
9 Musi o no vha vhudza zwenezwi zwithu, a si ṱuwe Galilea.
10 Musi vharathu vhawe vho no ya vhuṱamboni, na ene a ya a sa vhonwi nga muthu.
11 Ngauralo, Vhayuda vha thoma u mu ṱoḓa henefho vhuṱamboni vha tshi ri: “Uḽa muthu u ngafhi?”
12 Nahone gogo ḽo vha ḽi tshi khou vhilaela nga hae. Vhaṅwe vho vha vha tshi ri: “Ndi muthu o lugaho.” Vhaṅwe vho vha vha tshi ri: “Ho ngo luga, ngauri u xedza gogo.”
13 Ho vha hu si na muthu we a vha a tshi amba nga hae khagala ngauri vho vha vha tshi ofha Vhayuda.
14 Musi vhuṱambo vhu tsini na u fhela, Yesu a ya thembeleni nahone a thoma u funza.
15 Vhayuda vha kanuka, vha ri: “Uyo muthu u ḓivha hani maṅwalo ngeno a songo funzwa zwikoloni zwa vhurereli?”
16 Yesu a vha fhindula a ri: “Zwine nda funza a si zwanga, fhedzi ndi zwa o nthumaho.
17 Arali muthu a tshi tama u ita zwine Mudzimu a zwi funa, u ḓo ḓivha arali zwine nda funza zwi tshi bva ha Mudzimu kana ndi tshi amba zwine zwa bva kha nṋe.
18 Ane a amba zwine zwa bva khae u khou ṱoḓa u huliswa; fhedzi ane a ṱoḓa u huliswa nga o nthumaho, onoyo ndi wa ngoho nahone ha zwifhi.
19 Naa Mushe ho ngo ni ṋea Mulayo? Fhedzi a hu na na muthihi waṋu ane a tevhedza Mulayo. Ndi ngani ni tshi ṱoḓa u mmbulaha?”
20 Gogo ḽa fhindula ḽa ri: “U na dimoni. Ndi nnyi ane a khou ṱoḓa u u vhulaha?”
21 Yesu a vha fhindula a ri: “Ndo ita tshithu tshithihi, nahone noṱhe na kanuka.
22 Nga nṱhani ha zwenezwo, Mushe o ni ṋea mulayo wa u fumbisa—hu si uri u bva kha Mushe, fhedzi u bva kha vhomakhulukuku—nahone ni fumbisa muthu nga sabatha.
23 Arali muthu a fumbiswa nga sabatha uri hu si pfukwe mulayo wa Mushe, zwino ndi ngani no ntsinyutshela ngauri ndo fhodza muthu nga sabatha?
24 Litshani u haṱula no sedza mbonalo ya nga nnḓa ya muthu, fhedzi haṱulani nga nḓila yo lugaho.”
25 Ngauralo, vhaṅwe vhadzulapo vha Yerusalema vha thoma uri: “Naa uyu muthu a si ene ane vhathu vha khou ṱoḓa u mu vhulaha?
26 Vhonani uri u khou amba e vhukati ha vhathu, nahone a vha ambi nae tshithu. Kani ndi uri na vharangaphanḓa vha a ḓivha uri nangoho ndi ene Kristo?
27 Fhedzi riṋe ri a ḓivha hune uyu muthu a bva hone, musi Kristo a tshi ḓa, a hu na ane a ḓo ḓivha hune a bva hone.”
28 Nga zwenezwo, musi Yesu a tshi khou funza thembeleni, a huwelela a ri: “Inwi ni a nnḓivha nahone ni a ḓivha na hune nda bva hone. Huno a tho ngo tou ḓiḓisa, fhedzi we a nthuma ndi wa vhukuma, nahone a ni mu ḓivhi.
29 Nṋe ndi a mu ḓivha ngauri ndi muimeli wawe, onoyo ndi Ene o nthumaho.”
30 Nga zwenezwo, vha thoma u ṱoḓa uri vha mu fare, fhedzi a hu na na muthihi we a mu fara, ngauri tshifhinga tshawe tsho vha tshi sa athu swika.
31 Naho zwo ralo, vhanzhi vha mu tenda, vha ri: “Musi Kristo a tshi ḓa, naa u ḓo ita tshiga tshi fhiraho tshine tsha khou itwa nga uyu muthu?”
32 Vhafarisei vha pfa vhathu vha tshi khou gungula nga hae, nahone vhotshifhe vhahulu na Vhafarisei vha ruma vhaḓinḓa uri vha mu fare.
33 Yesu a ri: “Ndi ḓo vha ndi na inwi lwa tshifhinganyana u swikela ndi tshi humela ha we a nthuma.
34 Ni ḓo nṱoḓa, fhedzi a ni nga ḓo ngwana, nahone hune nda khou ya hone ni nga si kone u ḓa.”
35 Vhayuda vha amba nga tshavho vha ri: “Naa uyu muthu o ḓiimisela u ya ngafhi hune ra sa ḓo kona u mu wana? Naa o ḓiimisela u ya kha Vhayuda vhane vha dzula na Vhagerika nahone a funza Vhagerika?
36 U amba mini musi a tshi ri: ‘Ni ḓo nṱoḓa, fhedzi a ni nga ḓo ngwana, hune nda ya hone ni nga si kone u ḓa’?”
37 Nga ḓuvha ḽa u fhedza ḽa vhuṱambo, ḽe ḽa vha ḽi ḽone ḽihulwane, Yesu o vha o ima nahone a huwelela a ri: “Arali hu na a re na ḓora, kha ḓe ha nṋe a nwe.
38 Ane a ntenda, Maṅwalo o amba a ri: ‘Muvhilini wawe hu ḓo elela milambwana ya maḓi a tshilaho.’”
39 Naho zwo ralo, o amba zwenezwi malugana na muya mukhethwa we wa vha u tshi ḓo wanwa nga vhane vha mu tenda; ngauri vho vha vha sa athu ṱanganedza muya mukhethwa, ngauri Yesu o vha a sa athu ṋewa vhugala.
40 Vhaṅwe vhathu vhe vha pfa eneo mafhungo vha thoma u ri: “Nangoho uyu ndi ene Muporofita.”
41 Vhaṅwe vha ri: “Hoyu ndi ene Kristo.” Fhedzi vhaṅwe vha ri: “Naa zwa vhukuma Kristo a nga bva Galilea?
42 Naa Maṅwalo ho ngo amba uri Kristo u ḓo bva kha vhana vha Davida, muḓini wa Betlehema he Davida a vha a tshi dzula hone?”
43 Ngauralo, ha vha na phambano vhukati ha vhathu nga nṱhani hawe.
44 Vhaṅwe khavho vho vha vha tshi ṱoḓa u mu fara, fhedzi a hu na o mu faraho.
45 Ngauralo, musi vhaḓinḓa vha tshi vhuya, vhotshifhe vhahulu na Vhafarisei vha vha vhudzisa vha ri: “Ndi ngani ni songo vhuya nae?”
46 Vhaḓinḓa vha fhindula vha ri: “A hu athu vhuya ha vha na muthu we a amba nga yeneyo nḓila.”
47 Vhafarisei vha fhindula vha ri: “Kani na inwi o ni fhura?
48 Naa hu na muṅwe wa vharangaphanḓa kana muṅwe wa Vhafarisei we a mu tenda?
49 Fhedzi ḽeneḽi gogo ḽi sa ḓivhiho Mulayo ndi vhathu vho semiwaho.”
50 Nikodemo we a vhuya a ya ha Yesu, na we a vha e muṅwe wavho, a amba navho a ri:
51 “Naa mulayo washu u a haṱula muthu a songo thoma a sengiswa zwa kona u ḓivhea uri u na mulandu?”
52 Vha mu fhindula vha ri: “Kani na iwe u bva Galilea? Ṱoḓisisa Maṅwaloni ndi hone u tshi ḓo vhona uri a hu na muporofita ane a ḓo bva Galilea.”*
* Maṅwalwa a kale o vhalaho na a re mulayoni o bvisa ndimana 53 u ya kha ndima ya 8, ndimana 11, dzine dza vhalea (nga nḓila dzo fhamba-fhambanaho kha maṅwalo a Lugerika na dziṅwe nzudzanyo) nga heyi nḓila:
53 Nga zwenezwo, muṅwe na muṅwe a ya hayani ha hawe.
