Yohane 9:1-41
9 Musi a tshi khou fhira a vhona munna we a bebwa o pofula.
2 Vhafunziwa vhawe vha mu vhudzisa vha ri: “Rabi,* uyu munna a tshi bebwa o pofula ho tshinya nnyi, ndi ene kana ndi vhabebi vhawe?”
3 Yesu a fhindula a ri: “A si hoyu munna o tshinyaho kana vhabebi vhawe, fhedzi zwo vha nga u ralo uri hu vhonale mishumo ya Mudzimu kha ene.
4 Ri fanela u shuma mishumo ya o nthumaho musi ḽi tshi kha ḓi vha masiari; vhusiku vhu khou ḓa hune muthu a nga si kone u shuma.
5 Musi ndi tshi kha ḓi vha shangoni, ndi tshedza tsha shango.”
6 Musi o no amba zwenezwi, a pfela mare fhasi a suka matope, a ḓodza matope eneo kha maṱo a onoyo munna
7 a amba nae a ri: “Iya u ṱambe ishani ḽa Silomu” (musi zwi tshi ṱalutshedzelwa zwi amba uri ‘O rumiwaho’). A ya a ṱamba, a vhuya a tshi vho vhona.
8 Ngauralo, vhahura na vhe vha vha vha tshi mu vhona a tshi khou humbela vha ri: “Naa uyu muthu a si ene we a vha a tshi dzulela u humbela?”
9 Vhaṅwe vha ri: “Ndi ene.” Vhaṅwe vha tshi ri: “A si ene, fhedzi u tou fana nae.” Onoyo muthu a mbo ḓi ri: “Ndi nṋe.”
10 Nga nṱhani ha zwenezwo, vha thoma u mu vhudzisa vha ri: “Zwo ḓa hani uri maṱo au a bonyolowe?”
11 A fhindula a ri: “Muṅwe munna ane a pfi Yesu o suka matope a nḓodza maṱo, a amba na nṋe a ri, ‘Iya u ṱambe Silomu.’ Nga zwenezwo, nda ya nda ṱamba nahone nda mbo ḓi vhona.”
12 Vha amba nae vha ri: “Onoyo munna u ngafhi?” A fhindula a ri: “A thi ḓivhi.”
13 Vha isa uḽa munna we a vha o pofula kha Vhafarisei.
14 Ḓuvha ḽe Yesu a suka matope na u bonyolosa maṱo a uyo munna ḽo vha ḽi Sabatha.
15 Nga tshenetsho tshifhinga, Vhafarisei na vhone vha thoma u mu vhudzisa uri zwo ḓa hani uri a vhone. A vha fhindula a ri: “O nḓodza matope maṱoni, nahone nda ṱamba nda mbo ḓi vhona.”
16 Vhaṅwe Vhafarisei vha ri: “Hoyu muthu ha bvi ha Mudzimu, ngauri ha tevhedzi Sabatha.” Vhaṅwe vha ri: “Muitazwivhi a nga ita hani vhuṱolo ho raloho?” Ha vha na phambano vhukati havho.
17 Vha dovha vha amba na uḽa munna we a vha o pofula vha ri: “U ri mini nga hae, samusi o u bonyolosa maṱo?” Onoyo munna a ri: “Ndi muporofita.”
18 Naho zwo ralo, Vhayuda a vho ngo tenda uri o vha o pofula na uri zwino u vho vhona, u swikela vha tshi vhidza vhabebi vha onoyo munna we a vha a tshi vho vhona.
19 Vha vha vhudzisa vha ri: “Naa uyu ndi murwa waṋu we a bebwa o pofula? Zwo ḓa hani uri zwino a vhone?”
20 Vhabebi vhawe vha fhindula vha ri: “Ndi zwone zwa uri hoyu ndi murwa washu nahone o bebwa o pofula.
21 Fhedzi a ri ḓivhi uri zwo ḓa hani uri a vhone na o mu bonyolosaho a ri mu ḓivhi. Inwi mu vhudziseni. O aluwa. U fanela u ḓifhindulela ene muṋe.”
22 Vhabebi vhawe vho amba zwenezwi ngauri vho vha vha tshi khou ofha Vhayuda, nga nṱhani ha uri Vhayuda vho vha vho no tendelana uri muthu naho e ufhio ane a tenda uri Yesu ndi Kristo, u tea u pandelwa sinagogoni.
23 Ndi ngazwo vhabebi vhawe vho ri: “O aluwa. Inwi mu vhudziseni.”
24 Vha dovha vha vhidza uḽa munna we a vha o pofula vha amba nae vha ri: “Renda Mudzimu; ri a zwi ḓivha uri uyo muthu ndi muitazwivhi.”
25 A vha fhindula a ri: “Zwauri ndi muitazwivhi a thi zwi ḓivhi. Zwine nda zwi ḓivha ndi zwa uri ndo vha ndo pofula, zwino ndi vho vhona.”
26 Vha amba nae vha ri: “O u ita mini? O bonyolosa hani maṱo au?”
27 A vha fhindula a ri: “Ndo no ni vhudza, fhedzi a no ngo nthetshelesa. Ndi ngani ni tshi khou ṱoḓa u dovha na zwi pfa? Kani ni khou ṱoḓa u vha vhafunziwa vhawe?”
28 Musi a tshi amba zwenezwo vha mu sema vha ri: “Iwe u mufunziwa wa onoyo muthu, fhedzi riṋe ri vhafunziwa vha Mushe.
29 Ri a zwi ḓivha uri Mudzimu o amba na Mushe; fhedzi onoyo muthu a ri ḓivhi hune a bva hone.”
30 Onoyo munna a vha fhindula a ri: “Ngoho zwi a mangadza ni sa ḓivhi uri u bva ngafhi, ngeno o bonyolosa maṱo anga.
31 Ri a zwi ḓivha uri Mudzimu ha thetshelesi vhaitazwivhi, fhedzi muthu ane a ofha Mudzimu na u ita zwine a zwi funa, onoyo u a mu thetshelesa.
32 U bva kale a hu athu vhuya ha pfala uri hu na muthu we a bonyolosa maṱo a muthu o bebwaho o pofula.
33 Arali onoyo muthu o vha a sa bvi ha Mudzimu, o vha a nga si ite tshithu na tshithihi.”
34 Vha mu fhindula vha ri: “Wo bebelwa tshivhini, zwino u khou funza riṋe?” Vha mu pandela!
35 Yesu a pfa uri vho mu pandela, nahone musi a tshi mu wana, a amba nae a ri: “Naa u na lutendo kha Murwa-muthu?”
36 Onoyo munna a fhindula a ri: “Muṋe wanga, Murwa-muthu ndi nnyi uri ndi vhe na lutendo khae?”
37 Yesu a mu fhindula a ri: “Wo no mu vhona, zwi re zwone ndi uri ndi onoyu ane wa khou amba nae.”
38 Nga zwenezwo, a ri: “Murena, ndi na lutendo khae.” Onoyo munna a gwadama fhasi a mu losha.
39 Yesu a ri: “Ndo ḓa fhano shangoni uri ndi haṱule u ya nga zwi tevhelaho: uri vho pofulaho vha vhone na uri vhane vha vhona vha pofule.”
40 Vhaṅwe Vhafarisei vhe vha vha vhe henefho vha pfa zwe a vha a tshi khou zwi amba, vha ri: “Naa ni khou ṱoḓa u amba uri na riṋe ro pofula?”
41 Yesu a amba navho a ri: “Arali ni vhe no pofula, no vha ni tshi ḓo vha ni si na tshivhi. Fhedzi ni ri, ‘Ri a vhona.’ Ndi ngazwo ni tshi ḓo dzula ni na tshivhi.”
Ṱhaluso dzi re magumoni a siaṱari
^ Ndi dzina ḽa u hulisa mufunzi wa Muyuda.
