Yuda 1:1-25
1 Nṋe Yuda, mulanda wa Yesu Kristo, murathu wa Yakobo, ndi khou ṅwalela vho nangwaho vhane vha funwa nga Mudzimu Khotsi na vho tsireledzwaho uri vha vhe na vhushaka na Yesu Kristo ndi ri:
2 Khathutshelo na mulalo na lufuno ngavhe zwi tshi engedzea kha inwi.
3 Inwi vhafunwa, naho ndo vha ndi tshi khou ḓidina vhukuma uri ndi ni ṅwalele nga ha nḓila ine Mudzimu a ḓo ri tshidza ngayo, ndo wana zwi zwa ndeme u ni ṅwalela uri ndi ni ṱuṱuwedze u lwela lutendo lwo ṋekedzwaho vhakhethwa.
4 Ndi nga mulandu wa uri vhaṅwe vhanna vho ṋangavhedza vha dzhena vhukati haṋu samusi Maṅwalo o dzula o amba uri vha ḓo haṱulwa—vhanna vha sa ofhi Mudzimu vhe vha shandula vhuthu vhuhulwane ha Mudzimu washu ha vha tshiitisi tsha u ḓifara nga nḓila i shonisaho na u sa fulufhedzea kha Muṋe washu muthihi na Murena washu, Yesu Kristo.
5 Naho ni tshi ḓivha zwenezwi zwithu nga vhuḓalo, ndi tama u ni humbudza uri Yehova o tshidza vhathu vhawe shangoni ḽa Egipita, nga murahu a fhelisa vhe vha si vhe na lutendo.
6 Na vharuṅwa vhe vha si dzhiele nṱha vhuimo havho, fhedzi vha ṱutshela vhudzulo havho ho teaho, o vha vhofha nga mbofho dza lini na lini na u vha vhulunga swiswini ḽihulu u swika musi vha tshi haṱulwa nga ḓuvha ḽihulu.
7 Zwi ngaho zwenezwo, Sodoma na Gomora na miḓi i re tsini, na yone yo ḓidzhenisa kha vhuḓifari vhu songo kunaho nga nḓila yo kalulaho na u emula zwithu zwa ṋama nga nḓila i si ya nzulele. Yo pfiswa vhuṱungu nga u haṱulelwa mulilo wa lini na lini uri i vhe tsumbo ine ya ri sevha.
8 Hu sa londwi zwenezwo, vhenevho vhanna vha dovha vha vha na kuhumbulele* kwo khakheaho, vha a ḓitshikafhadza ṋamani, vha nyadza vhuvhusi, na u amba luvhi vha re na vhugala.
9 Musi muruṅwa muhulu Mikaele a tshi vhangisana tshitumbu tsha Mushe na Diabolo, ho ngo mu sema, fhedzi o ri: “Ngavhe Yehova a tshi u kaidza.”
10 Vhenevho vhanna vha amba luvhi nga ha zwithu zwoṱhe zwine vha si zwi pfesese. Vha ḓiita zwipuka zwi si na ṱhalukanyo na u ita zwithu nga nḓila i si ya nzulele na u bvela phanḓa vha tshi ḓitshinya.
11 Zwi ḓo vha vhifhela, ngauri vho tevhela nḓila ya Kaini, nahone vho gidimela matshilele o khakheaho a Bileamu vha tshi ri vha ḓo wana malamba ngazwo, nahone vho mbo ḓi fheliswa nga nṱhani ha vhushandukwa vhu fanaho na ha Kora!
12 Vhane vha ḽa na inwi kha zwimima zwaṋu zwa vhukonani vha fana na matombo a re nga fhasi ha maḓi, vhalisa vhane vha ḓikanzwa vhone vhaṋe vha sa ofhi; vha nga makole a si na mvula ane a iswa ngeno na ngei nga muya; ndi miri nga tshifhefho, fhedzi i sa aṋwi, yo omaho tshoṱhe,* yo tupulwaho;
13 vha nga magabelo a lwanzhe ane a fhufhuma musi vha tshi amba zwithu zwi shonisaho; ṋaledzi dzi yaho huṅwe na huṅwe, vho lugiselwaho swiswi ḽihulu ḽa tshoṱhe.
14 Henoxe we a vha e wa vhusumbe u bva kha mutevhe wa Adamu o dovha a porofita malugana navho, musi a tshi ri: “Vhonani! Yehova o ḓa na mavhuthu awe a vharuṅwa vhakhethwa,
15 uri a haṱule vhoṱhe, na u vhona mulandu vhoṱhe vha sa ofhi Mudzimu malugana na zwe vha zwi ita zwi sumbedzaho u sa ofha Mudzimu, na zwithu zwoṱhe zwi tshuwisaho zwe vhaitazwivhi vha sa ofhi Mudzimu vha zwi amba nga hae.”
16 Vhenevho vhanna ndi vhagunguli, vha a vhilaela nga ha vhutshilo havho, vha ita zwa nyemulo dzavho, vha a zuwa, ngeno vha tshi khou khoḓa vhaṅwe uri vhone vhaṋe vha vhuyelwe.
17 Fhedzi inwi vhafunwa, humbulani zwe na vhudzwa zwone tshifhingani tsho fhiraho nga vhaapostola vha Murena washu Yesu Kristo,
18 nga ha nḓila ye vha vha vha tshi dzula vha tshi ni vhudza uri: “Maḓuvhani a vhufhelo hu ḓo vha na vhagoḓi, vhane vha ita zwa nyemulo dzavho kha zwithu zwa u sa ofha Mudzimu.”
19 Vhenevho ndi vhone vhane vha ita uri hu vhe na dziphambano, vhanna vhane vha tshila u fana na zwipuka, vha si na muya wa Mudzimu.
20 Fhedzi inwi vhafunwa, ḓikhwaṱhiseni kha lutendo lwaṋu lukhethwa-khethwa, ni rabele ni tshi ṱuṱuwedzwa nga muya mukhethwa
21 ni dzule ni tshi ita zwithu zwine zwa ḓo ita uri Mudzimu a ni fune, musi no lindela khathutshelo ya Murena washu Yesu Kristo, ine ya isa vhutshiloni vhu sa fheli.
22 Zwiṅwe hafhu, dzulani ni tshi khathutshela vhane vha timatima;
23 vha tshidzeni nga u vha fuḓa muliloni. Fhedzi ni dzule ni tshi khathutshela vhaṅwe, ni ite nga u ralo ni na nyofho, ni tshi vhenga na tshiambaro tshe tsha tshikafhadzwa nga ṋama.
24 Mudzimu u a kona u ni tsireledza uri ni si khukhulwe na u ita uri ni dzule ni sa solei phanḓa ha vhugala hawe nga dakalo ḽihulu,
25 Mudzimu muthihi ane a ri tshidza nga Yesu Kristo Murena washu, nga a vhe na vhugala, Vhurena, maanḓa na vhuvhusi, zwoṱhe ndi zwawe tsha kale na kale na zwino na nga hu sa fheli. Amen.
Ṱhaluso dzi re magumoni a siaṱari
^ Kana “u lora.”
^ Ṱhalutshedzelo ya ipfi nga ipfi i ri “u fa kavhili.”
