Bugu Ya U Thoma Ya Dzikhosi 14:1-31
14 Nga tshenetsho tshifhinga, Abia murwa wa Yerobeamu a lwala.
2 Yerobeamu a amba na mufumakadzi wawe a ri: “Ndi khou humbela uri u ḓidzumbe uri vha si ḓivhe uri ndi iwe mufumakadzi wa Yerobeamu, u ye Shiḽo. Muporofita Ahia u henengei. Ndi ene we a mmbudza uri ndi ḓo vha khosi ya vhenevha vhathu.+
3 U mu ṱutshele na ḽofo dza fumi dza vhurotho, khekhe na mudzio wa mutoli. U ḓo u vhudza zwine zwa ḓo itea kha mutukana.”
4 Mufumakadzi wa Yerobeamu a ita zwe Yerobeamu a amba. A takuwa a ya Shiḽo+ a swika nḓuni ya Ahia. Ahia o vha a si tsha vhona ngauri o vha o no kalaha.
5 Fhedzi Yehova o vha o vhudza Ahia uri: “Mufumakadzi wa Yerobeamu u khou ḓa u u vhudzisa nga ha murwa wawe, ngauri u khou lwala. Ndi ḓo u vhudza zwine wa fanela u mu vhudza.* Musi a tshi swika, u ḓo ḓidzumba.”
6 Musi Ahia a tshi tou pfa mitsindo ya ṋayo dzawe a tshi khou dzhena nga muṋango, a ri: “Dzhena mufumakadzi wa Yerobeamu. Ndi ngani wo ḓidzumba? Ndo rumiwa uri ndi u vhudze mafhungo a sa takadzi.
7 Tshimbila u vhudze Yerobeamu, u ri: ‘Zwe Yehova Mudzimu wa Isiraele a zwi amba ndi hezwi: “Ndo u hulisa vhukati ha vhathu vha hau uri ndi u ite murangaphanḓa wa vhathu vhanga vha Isiraele.+
8 Nda dzhiela nnḓu ya Davida muvhuso nda u ṋea iwe.+ Fhedzi a wo ngo nga mushumeli wanga Davida, we a tevhedza ndaela dzanga a ntevhela nga mbilu yawe yoṱhe, a ita zwo lugaho fhedzi phanḓa hanga.+
9 Fhedzi iwe wo ita zwo kalulaho u fhira vhoṱhe vhe vha vha hone phanḓa hau, wa ḓiitela muṅwe mudzimu na zwifanyiso zwa tsimbi wa ntsinyusa,+ wo ntshandukela.+
10 Nga zwenezwo, ndi khou ḓisa khombo nḓuni ya Yerobeamu, ndi ḓo fhelisa munna muṅwe na muṅwe wa nnḓu ya Yerobeamu, u katela na vhane vha si kone u ḓitsireledza na vha si na nungo kha ḽa Isiraele; ndi ḓo swiela nnḓu ya Yerobeamu,+ u fana na ane a swielela kule matoko oṱhe!
11 Wa lushaka lwa Yerobeamu ane a fela muḓini u ḓo ḽiwa nga mmbwa; ane a fela ḓakani, u ḓo ḽiwa nga zwiṋoni, ngauri zwenezwo zwo ambiwa nga Yehova.”’
12 “Zwino takuwa u ye nḓuni yau. Musi u tshi swika muḓini, ṅwana u ḓo fa.
13 Vhaisiraele vhoṱhe vha ḓo mu lilela vha mu vhulunga, ngauri ndi ene e eṱhe kha vha muṱa wa Yerobeamu ane a ḓo vhulungwa vhiḓani, ngauri ndi ene e eṱhe kha nnḓu ya Yerobeamu we Yehova Mudzimu wa Isiraele a wana zwivhuya khae.
14 Yehova u ḓo ḓivusela khosi kha ḽa Isiraele ine ya ḓo fhelisa nnḓu ya Yerobeamu+ nga tshifhinga tsho vhewaho.
15 Yehova u ḓo rwa Isiraele, a nga luṱanga lune lwa dzinginyea maḓini, a tupula Isiraele kha ḽeneḽi shango ḽavhuḓi ḽe a ḽi ṋea vhomakhulukuku wavho,+ a vha balanganyela seli ha Mulambo,*+ ngauri vho ḓiitela thanda dzavho khethwa,* vha sinyusa Yehova.+
16 U ḓo ṱutshela Isiraele nga nṱhani ha zwivhi zwe Yerobeamu a zwi ita, a ita uri Isiraele ḽi ite tshivhi.”+
17 Mufumakadzi wa Yerobeamu a takuwa a ṱuwa a ya Thiritsa. Musi a tshi swika muṋangoni wa nnḓu, mutukana a fa.
18 Vha mu vhulunga, Vhaisiraele vhoṱhe vha mu lilela samusi Yehova o vha o amba a tshi shumisa mushumeli wawe ane a vha muporofita Ahia.
19 Mafhungo oṱhe a Yerobeamu, a nndwa dze a lwa na kuvhusele kwawe,+ zwo ṅwaliwa buguni ya mafhungo a zwifhingani zwa kale zwa mahosi a Isiraele.
20 Tshifhinga* tshe Yerobeamu a tshi fhedza a tshi khou vhusa ndi miṅwaha ya 22, nga murahu a vhulungwa na vhomakhulukuku wawe;+ murwa wawe Nadaba a vha khosi vhudzuloni hawe.+
21 Rehabeamu murwa wa Salomo a vha khosi ya Yuda. Rehabeamu o vha e na miṅwaha ya 41 musi a tshi vha khosi, o vhusa miṅwaha ya 17 e Yerusalema, muḓi we Yehova a u nanga+ kha tshaka dzoṱhe dza Isiraele uri u vhe fhethu hune a ḓo vhea dzina ḽawe.+ Mme awe o vha a tshi pfi Naama wa Muamoni.+
22 Vhayuda vha ita zwi sa takadzi Yehova,+ vha mu sinyusa nga zwivhi zwe vha zwi ita, vha ita zwi fhiraho zwe vhomakhulukuku wavho vha zwi ita.+
23 Na vhone vho ḓifhaṱela fhethu ha vhurabeli, phuphu khethwa na thanda khethwa*+ zwikwarani+ zwoṱhe zwilapfu na nga fhasi ha miri yoṱhe mihulu.+
24 Ho vha hu tshi dovha ha vha na vhanna vha rengisaho muvhili thembeleni henefho shangoni.+ Vho vha vha tshi ita zwithu zwoṱhe zwi nengisaho zwe zwa vha zwi tshi itwa nga tshaka dze Yehova a vha o dzi pandela phanḓa ha Vhaisiraele.
25 Nga ṅwaha wa vhuṱanu hu tshi khou vhusa Khosi Rehabeamu, Shishaka+ khosi ya Egipita a ḓa a lwa na Yerusalema.+
26 A dzhia lupfumo lwa nḓuni ya Yehova na lupfumo lwa nḓuni* ya khosi.+ A dzhia zwoṱhe, u katela na zwiṱangu zwoṱhe zwa musuku zwe zwa itwa nga Salomo.+
27 Vhudzuloni hazwo, Khosi Rehabeamu a ita zwiṱangu zwa koporo, a zwi ṋea vhahulwane vha vhalindi,* vha lindaho muṋango wa nnḓu ya khosi.
28 Musi khosi i tshi ya nḓuni ya Yehova, vhalindi vho vha vha tshi fara zwenezwo zwiṱangu, nga murahu vha zwi humisela kamarani khulu ya vhalindi.
29 Mafhungo oṱhe a Rehabeamu, zwoṱhe zwe a ita, naa a zwo ngo ṅwaliwa buguni ya mafhungo a zwifhingani zwa kale zwa mahosi a Yuda?+
30 Rehabeamu na Yerobeamu vho vha vha tshi dzulela u lwa.+
31 Rehabeamu a vhulungwa na vhomakhulukuku wawe Muḓini wa Davida.+ Mme awe o vha a tshi pfi Naama wa Muamoni.+ Murwa wawe Abiamu*+ a vha khosi vhudzuloni hawe.
Ṱhaluso dzi re magumoni a siaṱari
^ Kana “U fanela u mu vhudza zwa uri na zwa uri.”
^ Sedzani Mutevhe Wa Ṱhalutshedzo Ya Maipfi.
^ Ndi Yufuratha.
^ Thevhedz., “Maḓuvha.”
^ Sedzani Mutevhe Wa Ṱhalutshedzo Ya Maipfi.
^ Kana “pfamoni.”
^ Thevhedz., “vhagidimi.”
^ U dovha a pfi Abia.
