Bugu Ya U Thoma Ya Dzikhosi 18:1-46
18 Nga murahu ha tshifhinga, nga ṅwaha wa vhuraru,+ Yehova a amba na Elia a ri: “Tshimbila u ye u ḓivhonadze kha Ahaba, ndi ḓo nisa mvula shangoni.”+
2 Elia a ya u ḓivhonadza kha Ahaba, musi nḓala i khulu+ ngei Samaria.
3 Nga tshenetsho tshifhinga, Ahaba a vhidza Obadia, we a vha a tshi langa muṱa. (Obadia o vha a tshi ofha Yehova zwihulu,
4 musi Isabele+ a tshi khou fhelisa vhaporofita vha Yehova, Obadia o dzhia vhaporofita vha 100 a vha dzumba mabakoni mavhili, kha ḽiṅwe na ḽiṅwe a dzumba vha 50, a vha ṋea vhurotho na maḓi.)
5 Ahaba a amba na Obadia a ri: “Tshimbila na zwisima zwoṱhe na magovha* oṱhe a shango. Khamusi ri ḓo wana hatsi ho eḓanaho ha u ṋea bere na meila uri dzi tshile, uri zwifuwo zwashu zwoṱhe zwi si fe.”
6 Ngauralo, vha kovhekana shango ḽe vha vha vha tshi khou ya u fhira khaḽo. Ahaba a bva nga iṅwe nḓila e eṱhe, Obadia a fara iṅwe nḓila e eṱhe.
7 Musi Obadia e nḓilani, a ṱangana na Elia. A mu ḓivha, a gwadama a ri: “Naa ndi iwe muṋe wanga Elia?”+
8 Ene a fhindula a ri: “Ndi nṋe. Tshimbila u vhudze muṋe wau uri: ‘Elia u fhano.’”
9 Fhedzi ene a ri: “Ndo tshinya mini lune wa kumedzela mushumeli wau kha Ahaba uri a mmbulaye?
10 Ndi ana nga Yehova Mudzimu wau a tshilaho, a hu na lushaka kana muvhuso we muṋe wanga a si rume vhathu uri vha u ṱoḓe henefho. Musi vho no ri: ‘Haho fhano,’ a ita uri wonoyo muvhuso na lwonolwo lushaka vha ane uri a vho ngo u wana.+
11 Zwino iwe u khou ri: ‘Tshimbila u vhudze muṋe wau uri: “Elia u fhano.”’
12 Musi ndi tshi ṱuwa fhano, iwe u ḓo hwalwa nga muya wa Yehova wa iswa fhethu+ hune nda sa ḓo hu ḓivha, nṋe ndi tshi vhudza Ahaba, a ḓa a si u wane, u ḓo mmbulaya. Naho zwo ralo, nṋe mushumeli wau ndo vha ndi tshi ofha Yehova u bva vhuṱukuni.
13 Naa muṋe wanga ho ngo vhudzwa zwe nda ita musi Isabele a tshi khou vhulaya vhaporofita vha Yehova, na nḓila ye nda dzumba ngayo vhaporofita vha Yehova vha 100 mabakoni mavhili, kha ḽiṅwe na ḽiṅwe nda dzumba vha 50, nda vha ṋea vhurotho na maḓi?+
14 Fhedzi zwino iwe u khou ri: ‘Tshimbila u vhudze muṋe wau u ri: “Elia u fhano.”’ U ḓo mmbulaya.”
15 Naho zwo ralo, Elia a ri: “Ndi ana nga Yehova wa mavhuthu a tshilaho, ane nda mu shumela,* ṋamusi ndi ḓo ḓivhonadza khae.”
16 Obadia a ya a ṱangana na Ahaba a mu vhudza, Ahaba a ya a ṱangana na Elia.
17 Musi Ahaba a tshi tou vhona Elia, a amba nae a ri: “Naa ndi iwe ane a khou ḓisela Isiraele khombo khulu?”
18 Elia a ri: “A tho ngo ḓisa khombo kha ḽa Isiraele, fhedzi ndi iwe na vha nnḓu ya khotsi au, nge ni si tevhedze ndaela dza Yehova na tevhela Vhobaali.+
19 Zwino ramba Vhaisiraele vhoṱhe vha ḓe kha nṋe Thavhani ya Karamele,+ u katela na vhaporofita vha 450 vha Baali na vhaporofita vha 400 vhane vha gwadamela thanda khethwa,*+ vhane vha ḽa ṱafulani na Isabele.”
20 Ahaba a rumela mulaedza kha vhathu vhoṱhe vha Isiraele, a kuvhanganya vhaporofita Thavhani ya Karamele.
21 Elia a ya kha vhenevho vhathu a ri: “Ni ḓo litsha lini u vha muya murwelahoṱhe?+ Arali Yehova e ene Mudzimu wa ngoho, tevhelani ene;+ arali e Baali, tevhelani ene!” Fhedzi vhathu vha si mu fhindule.
22 Elia a amba na vhathu a ri: “Ndi nṋe muporofita wa Yehova o salaho e eṱhe,+ ngeno vhaporofita vha Baali vhe vhanna vha 450.
23 Vha litsheni vha ri ṋee mbohwana mbili, vhone vha nange mbohwana nthihi, vha i tumukanye vha i vhee nṱha ha khuni, fhedzi vha songo vhasa mulilo. Na nṋe ndi ḓo tumukanya iḽa iṅwe mbohwana nda i vhea nṱha ha khuni, fhedzi a thi nga vhasi mulilo.
24 Ni fanela u vhidzelela dzina ḽa mudzimu waṋu,+ na nṋe ndi ḓo vhidzelela dzina ḽa Yehova. Mudzimu ane a ḓo fhindula nga u funga mulilo u ḓo sumbedza uri ndi ene Mudzimu wa ngoho.”+ Vhathu vhoṱhe vha fhindula vha ri: “Zwe wa amba zwi a pfala.”
25 Elia a amba na vhaporofita vha Baali a ri: “Nangani mbohwana nthihi, hu thome inwi u i tumukanya, ngauri ni vhanzhi. Ni vhidzelele dzina ḽa mudzimu waṋu, fhedzi ni songo vhasa mulilo.”
26 Vha dzhia mbohwana ye a vha ṋea yone, vha i tumukanya, vha vhidzelela dzina ḽa Baali u bva nga matsheloni u swika nga masiari, vha tshi ri: “Iwe Baali, ri fhindule!” Fhedzi a ho ngo vha na we a fhindula.+ Vha tshina vha tshi mona na aḽeṱare ye vha i fhaṱa.
27 Hu tshi vho vha masiari, Elia a thoma u vha goḓa a ri: “Vhidzelelani nga maanḓa! Huufha e mudzimu!+ Khamusi u kha ḓi elekanya, kana u tshee o ya u ḓithusa.* Kana khamusi o eḓela, muṅwe muthu u fanela u mu vusa!”
28 Vho vha vha tshi khou ṱavha mikosi, vha tshi khou ḓiṱhavhekanya nga phanga na nga mapfumo, vha tshi tevhedza maitele avho, u swika vha tshi bva malofha.
29 Ḽa vhuya ḽa kovhela, vha tshi khou ḓiiṱa vhaporofita u swika nga tshifhinga tsha u ṋekedza tshifhiwa tsha thoro, fhedzi a ho ngo vha na we a fhindula; ho vha hu si na ane a vha na ndavha nazwo.+
30 Ho no fhela tshifhinga Elia a amba na vhathu vhoṱhe a ri: “Sendelani ngeno.” Vhathu vhoṱhe vha sendela. A fhaṱulula aḽeṱare ya Yehova ye ya vha yo thuthwa.+
31 Elia a doba matombo a 12, ḽiṅwe na ḽiṅwe ḽi tshi imela tshaka dza vharwa vha Yakobo, we Yehova a amba nae a ri: “Dzina ḽau ḽi ḓo pfi Isiraele.”+
32 Nga eneo matombo a fhaṱela dzina ḽa Yehova aḽeṱare.+ A bwa mugero u mona na aḽeṱare, wo vha wo hula lwe ha vha hu tshi nga zwalwa mbeu ya mielo mivhili ya tshikalo tsha siha.*
33 Nga murahu ha zwenezwo a ṱhopha khuni, a tumukanya mbohwana, a i vhea nṱha ha khuni.+ A ri: “Ḓadzani mvuvhelo nṋa khulwane nga maḓi, ni a shele nṱha ha tshifhiwa tsha u fhiswa na nṱha ha khuni.”
34 A ri: “Dovhani ni shele.” Vha dovha vha shela. A dovha a ri: “Shelani lwa vhuraru.” Vha shela lwa vhuraru.
35 Maḓi a elela u mona na aḽeṱare yoṱhe, a ḓadza na mugero nga maḓi.
36 Musi hu tshi vho ṱoḓa u vha tshifhinga tsha u ṋekedza tshifhiwa tsha thoro tsha nga madekwana,+ muporofita Elia a sendela phanḓa a ri: “Iwe Yehova Mudzimu, Mudzimu wa Abrahamu,+ wa Isaka+ na wa Isiraele, kha zwi ḓivhiwe ṋamusi uri iwe u Mudzimu kha ḽa Isiraele, na uri nṋe ndi mushumeli wau, ndo vhudzwa nga iwe uri ndi ite zwenezwi zwithu zwoṱhe.+
37 Mphindule Iwe Yehova! Mphindule, uri havha vhathu vha ḓivhe uri Iwe Yehova, u Mudzimu wa ngoho na uri iwe u khou rembulusa mbilu dzavho uri vha vhuye ha iwe.”+
38 Mulilo wa Yehova wa wela fhasi wa fhisa tshifhiwa tsha u fhiswa,+ khuni, matombo na buse, wa xisa maḓi a re mugeroni.+
39 Musi vhathu vhoṱhe vha tshi zwi vhona vha ṱavhanya vha gwadama vha ri: “Yehova ndi Mudzimu wa ngoho! Yehova ndi Mudzimu wa ngoho!”
40 Elia a amba navho a ri: “Farani vhaporofita vha Baali! Ni songo litsha na muthihi wavho a tshi ponyoka!” Vha vha fara, Elia a vha i sa mulambwanani* wa Kishoni,+ a vha vhulayela henefho.+
41 Elia a amba na Ahaba a ri: “Gonya u ye u ḽe na u nwa, ngauri hu khou pfala mubvumo wa mvula khulu.”+
42 Nga zwenezwo, Ahaba a gonya a ya u ḽa na u nwa, Elia a gonya kha ṱhodzi ya thavha ya Karamele, a kwatamisela fhasi tshifhaṱuwo tshawe tsha vha vhukati ha magona awe.+
43 Elia a amba na muḓinḓa wawe a ri: “Ndi khou humbela uri u gonye u lavhelese thungo ya lwanzheni.” A gonya a lavhelesa a ri: “A hu na tshithu.” Elia a amba nae lwa sumbe a ri, “Vhuyelela.”
44 Nga lwa vhusumbe, muḓinḓa wawe a ri: “Ndo vhona kukole kune kwa nga tshanḓa tsha muthu ku tshi bva lwanzheni.” A ri: “Gonya u ambe na Ahaba u ri: ‘Haka gariki yau! U tsele fhasi uri u sa ḓo thivhelwa nga mvula!’”
45 Nga tshenetsho tshifhinga, lutombo lwa swifhala nga makole, ha vhudzula muya, ha na mvula khulu,+ Ahaba a ya ngei Yeseriele.+
46 Fhedzi tshanḓa tsha Yehova tsha ḓa kha Elia, a vhofha zwiambaro zwawe kha khundu a gidima phanḓa ha Ahaba u vhuya u swika Yeseriele.
Ṱhaluso dzi re magumoni a siaṱari
^ Kana “miedzi.”
^ Thevhedz., “ane nda ima phanḓa hawe.”
^ Sedzani Mutevhe Wa Ṱhalutshedzo Ya Maipfi.
^ Kana khamusi, “o fara lwendo.”
^ Siha nthihi i lingana na ḽithara dza 7,33. Sedzani Ṱhume. B14.
^ Kana “muedzini.”
