Bugu Ya U Thoma Ya Dzikhosi 22:1-53
22 Ha fhela miṅwaha miraru Vhasiria na Vhaisiraele vha sa lwi.
2 Nga ṅwaha wa vhuraru, Yehoshafati+ khosi ya Yuda a ya kha khosi ya Isiraele.+
3 Khosi ya Isiraele ya amba na vhashumeli vhayo ya ri: “Naa ni a zwi ḓivha uri muḓi wa Ramothe-giḽiada+ ndi washu? Naho zwo ralo, ri khou timatima uri ri u dzhiulule kha khosi ya Siria.”
4 Khosi ya amba na Yehoshafati ya ri: “Naa u ḓo ṱuwa na nṋe ra lwa na muḓi wa Ramothe-giḽiada?” Yehoshafati a fhindula khosi ya Isiraele a ri: “Nṋe na iwe ri vhathihi. Vhathu vhashu ndi vhathihi, u katela na bere dzashu.”+
5 Fhedzi Yehoshafati a amba na khosi ya Isiraele a ri: “Ndi humbela uri u thome u vhudzise+ Yehova.”+
6 Khosi ya Isiraele ya kuvhanganya vhanna vha ṱoḓaho u vha 400 vha vhaporofita, ya vha vhudzisa ya ri: “Naa ndi ye u lwa na muḓi wa Ramothe-giḽiada kana ndi litshe?” Vha ri: “Iya, Yehova u ḓo kumedzela wonoyo muḓi zwanḓani zwa khosi.”
7 Yehoshafati a ri: “Naa fhano a hu na muporofita wa Yehova? Na ene kha ri mu vhudzise uri Mudzimu u ri mini.”+
8 Khosi ya Isiraele ya amba na Yehoshafati ya ri: “Hu kha ḓi vha na munna muthihi ane ra nga vhudzisa khae nga ha Yehova;+ fhedzi ndi a mu vhenga,+ ngauri ha porofiti zwithu zwavhuḓi nga ha nṋe, u porofita zwithu zwivhi fhedzi.+ Ndi Mikaya murwa wa Imila.” Fhedzi Yehoshafati a ri: “Khosi i songo amba zwithu zwo raloho.”
9 Khosi ya Isiraele ya vhidza muḓinḓa ya ri: “Ḓisa Mikaya murwa wa Imila nga u ṱavhanya.”+
10 Khosi ya Isiraele na Yehoshafati khosi ya Yuda vho vha vho dzula kha khuluṋoni dzavho, vho ambara dza vhuhosi, vhe fhethu hune ha fhefherwa hone* muṋangoni wa khoro ya Samaria, vhaporofita vhoṱhe vha tshi khou porofita phanḓa havho.+
11 Tsedekia murwa wa Kenana a ḓiitela ṋanga dza tsimbi a ri: “Yehova u ri, ‘Iwe u ḓo runga* Vhasiria nga hedzi ṋanga u swika u tshi vha fhelisa.’”
12 Vhaṅwe vhaporofita vho vha vha tshi khou porofita zwi fanaho vha tshi ri: “Iya Ramothe-giḽiada u ḓo kunda; Yehova u ḓo kumedzela wonoyo muḓi zwanḓani zwa khosi.”
13 Muḓinḓa we a ya u vhidza Mikaya, a amba nae a ri: “Vhaporofita vhoṱhe vha khou vhudza khosi mafhungo avhuḓi. Ndi humbela uri na iwe u ambe mafhungo ane a fana na avho, u ambe mafhungo avhuḓi.”+
14 Fhedzi Mikaya a ri: “Ndi ana nga Yehova a tshilaho, ndi ḓo amba zwine Yehova a mmbudza zwone.”
15 A ḓa kha khosi, khosi ya ri: “Mikaya, naa ri ye u lwa na muḓi wa Ramothe-giḽiada kana ri litshe?” Ene a ri: “Iya, u ḓo kunda; Yehova u ḓo kumedzela wonoyo muḓi zwanḓani zwa khosi.”
16 Khosi ya ri: “Ndi u anise lungana uri u mmbudze ngoho fhedzi dzinani ḽa Yehova?”
17 Mikaya a ri: “Ndi khou vhona Vhaisiraele vhoṱhe vho balangana dzithavhani,+ vha tshi nga nngu dzi si na mulisa. Yehova u ri: ‘Avha vhathu a vha na muṋe. Muṅwe na muṅwe nga a vhuyelele nḓuni yawe nga mulalo.’”
18 Khosi ya Isiraele ya amba na Yehoshafati ya ri: “Naa a tho ngo u vhudza nda ri: ‘A nga si porofite zwithu zwavhuḓi nga ha nṋe, u porofita zwithu zwivhi fhedzi’?”+
19 Mikaya a ri: “Ipfa zwine Yehova a amba: Ndo vhona Yehova o dzula kha khuluṋoni+ yawe na mavhuthu awe oṱhe a ṱaḓulu o ima nga thungo ya tshanḓa tshawe tsha u ḽa na nga thungo yawe ya tsha monde.+
20 Yehova a ri: ‘Ndi nnyi ane a ḓo fhura Ahaba, uri a ye u fela Ramothe-giḽiada?’ Muṅwe a amba izwi, muṅwe a amba zwiḽa.
21 Ha ḓa muruṅwa+ a ima phanḓa ha Yehova a ri: ‘Nṋe ndi ḓo mu fhura.’ Yehova a ri: ‘U ḓo zwi itisa hani?’
22 Muruṅwa a ri: ‘Ndi ḓo ya nda ita uri vhaporofita vhawe vhoṱhe vha zwifhe.’+ Mudzimu a ri: ‘Iwe u ḓo mu fhura, u ḓo kunda. Ṱuwa u ite zwenezwo.’
23 Yehova o ita uri vhaporofita vhau vhoṱhe vha zwifhe.+ Fhedzi Yehova o amba uri u ḓo welwa nga khombo.”+
24 Tsedekia murwa wa Kenana a sendela a rwa Mikaya kha shama a ri: “Zwo ḓa hani uri muya wa Yehova u bve kha nṋe u ambe na iwe?”+
25 Mikaya a ri: “U ḓo zwi vhona uri zwo ḓa hani ḓuvha ḽine wa ḓo shavhela kamarani ya nga ngomu-ngomu uri u dzumbame.”
26 Khosi ya Isiraele ya ri: “Dzhia Mikaya u mu ise kha Amoni murangaphanḓa wa muḓi na kha Yoasi murwa wa khosi.
27 U vha vhudze uri: ‘Khosi i ri: “Valelani hoyu muthu dzhele,+ ni mu ṋee vhurothonyana na maḓinyana u swika ndi tshi vhuya nga mulalo.”’”
28 Fhedzi Mikaya a ri: “Arali wa vhuya nga mulalo, hu ḓo vha hu si Yehova we a amba na nṋe.”+ A dovha a ri: “Vhathu vhoṱhe thetshelesani.”
29 Khosi ya Isiraele na Yehoshafati khosi ya Yuda vha ya Ramothe-giḽiada.+
30 Khosi ya Isiraele ya amba na Yehoshafati ya ri: “Ndi ḓo ambara zwiṅwe zwiambaro uri ndi si ḓivhiwe, nda dzhena nndwani, fhedzi iwe u fanela u ambara dza vhuhosi.” Khosi ya Isiraele ya ambara zwiṅwe zwiambaro,+ ya dzhena nndwani.
31 Khosi ya Siria ya laya vhalangi+ vhayo vha gariki vha 32 ya ri: “Ni songo lwa na muthu na muthihi hu sa londwi uri ndi muṱuku kana ndi muhulwane, nga nnḓa ha khosi ya Isiraele.”
32 Musi vhalangi vha gariki vha tshi tou vhona Yehoshafati, vha amba nga tshavho vha ri: “Vhukuma heyi ndi khosi ya Isiraele.” Vha rembuluwa uri vha lwe nae; Yehoshafati a ṱavha mukosi uri vha mu thuse.
33 Musi vhalangi vha gariki vha tshi vhona uri a si khosi ya Isiraele, vha litsha u mu pandamedza.
34 Fhedzi muṅwe munna a sokou* pfula nga vhura hawe, a pfula khosi ya Isiraele he tshiambaro tshayo tsha u ḓitsireledza nndwani tsha vha tsho ṱanganywa hone. Khosi ya amba na mutshimbidzi wayo wa gariki ya ri: “Rembulusa gariki u mbvise nndwani ngauri ndo huvhala.”+
35 Ha lwiwa ḓuvha ḽoṱhe, khosi ya imiswa kha gariki yo livhana na Vhasiria. Malofha a mbonzhe yayo a nzurumela nga ngomu ha gariki, ya fa nga madekwana.+
36 Musi ḓuvha ḽi tshi kovhela ha pfala ipfi madenndeni, ḽi tshi ri: “Muṅwe na muṅwe kha humele muḓini wa hawe! Muṅwe na muṅwe kha humele shangoni ḽa hawe!”+
37 Khosi ya fa, ya iswa Samaria; vha vhulunga khosi henefho Samaria.
38 Musi vha tshi khou ṱanzwa gariki ya nndwa tsini na damu ḽa Samaria he vhathu vhane vha rengisa muvhili vha vha vha tshi ṱamba hone, mmbwa dza ṋanzwa malofha a khosi, samusi Yehova o vha o amba.+
39 Mafhungo oṱhe a Ahaba na zwoṱhe zwe a ita na nnḓu* ye a i fhaṱa a i nakisa nga ṋanga+ dza nḓou na miḓi yoṱhe ye a i fhaṱa, naa a zwo ngo ṅwaliwa buguni ya zwifhingani zwa kale zwa mahosi a Isiraele?
40 Ahaba a vhulungwa na vhomakhulukuku wawe;+ murwa wawe Ahasia+ a vha khosi vhudzuloni hawe.
41 Yehoshafati+ murwa wa Asa o vha o no vha khosi kha ḽa Yuda, nga ṅwaha wa vhuṋa hu tshi khou vhusa Khosi Ahaba wa Isiraele.
42 Yehoshafati o vha e na miṅwaha ya 35 musi a tshi vha khosi, o vhusa miṅwaha ya 25 Yerusalema. Mme awe o vha a tshi pfi Azuba ṅwananyana wa Shilihi.
43 O tevhedza zwe zwa itwa nga khotsi awe Asa.+ Ho ngo zwi litsha, o ita zwo lugaho phanḓa ha Yehova.+ Naho zwo ralo, ho ngo thutha fhethu ha vhurabeli, vhathu vho vha vha tshi kha ḓi dubisela midzimu yavho zwiṱhavhelo henefho fhethu ha vhurabeli.+
44 Yehoshafati o tshilisana na khosi ya Isiraele nga mulalo.+
45 Mafhungo oṱhe a Yehoshafati na mishumo yawe i sumbedzaho maanḓa na nndwa dze a dzi lwa, naa a zwo ngo ṅwaliwa buguni ya mafhungo a zwifhingani zwa kale zwa mahosi a Yuda?
46 O dovha a pandela vhanna vhane vha rengisa muvhili thembeleni+ vhe vha litshwa nga khotsi awe Asa.+
47 Ho vha hu si na khosi ngei Edomo;+ muḓinḓa ndi ene we a vha o farela sa khosi.+
48 Yehoshafati o dovha a fhaṱa zwikepe* zwa Tharasisi uri zwi ye zwi dzhie musuku Ofiri,+ fhedzi a zwo ngo ya ngauri zwo kwashekana ngei Etsioni-gebere.+
49 Ahasia murwa wa Ahaba a amba na Yehoshafati a ri: “Litsha vhashumeli vhanga vha tshimbile na vhashumeli vhau zwikepeni,” fhedzi Yehoshafati a hana.
50 Yehoshafati a vhulungwa na vhomakhulukuku+ wawe Muḓini wa Davida makhulukuku wawe; murwa wawe Yehoramu+ a vha khosi vhudzuloni hawe.
51 Ahasia+ murwa wa Ahaba o vha khosi ya ḽa Isiraele ngei Samaria nga ṅwaha wa vhu 17 hu tshi khou vhusa Khosi Yehoshafati wa Yuda, o vhusa Isiraele miṅwaha mivhili.
52 A bvela phanḓa a tshi ita zwi sa takadzi Yehova, a tshimbila nḓilani ya khotsi awe+ na mme awe+ na nḓilani ya Yerobeamu murwa wa Nebatha, we a ita uri Isiraele ḽi ite tshivhi.+
53 A bvela phanḓa a tshi shumela Baali+ na u mu gwadamela, a dzula a tshi sinyusa Yehova Mudzimu wa Isiraele+ u fana na zwe zwa itwa nga khotsi awe.
Ṱhaluso dzi re magumoni a siaṱari
^ Kana “luvhatani.”
^ Kana “sukumedza.”
^ Kana “a sa ḓivhi a.”
^ Kana “pfamo.”
^ Sedzani Mutevhe Wa Ṱhalutshedzo Ya Maipfi.
