Bugu Ya U Thoma Ya Dzikhosi 5:1-18
5 Hiramu khosi ya Tiro+ a ruma vhashumeli vhawe ha Salomo musi a tshi pfa uri vho mu ḓodza uri a vhe khosi vhudzuloni ha khotsi awe, ngauri Hiramu o vha a tshi konana na Davida* misi yoṱhe.+
2 Na Salomo a rumela mulaedza kha Hiramu+ a ri:
3 “U a zwi ḓivha zwavhuḓi uri Davida khotsi anga ho ngo kona u fhaṱela dzina ḽa Yehova Mudzimu wawe nnḓu nga nṱhani ha nndwa dze a lwa thungo dzoṱhe, u swika Yehova a tshi ita uri a kunde maswina awe.+
4 Fhedzi zwino Yehova Mudzimu wanga o ita uri shango ḽi lale thungo dzoṱhe.+ A hu na ane a lwa na nṋe, a hu na zwithu zwivhi zwine zwa khou itea.+
5 Zwino ndo ḓiimisela u fhaṱela dzina ḽa Yehova Mudzimu wanga nnḓu, samusi Yehova o fhulufhedzisa khotsi anga Davida, a ri: ‘Murwa wau ane nda ḓo mu vhea vhudzuloni hau kha khuluṋoni yau, ndi ene ane a ḓo fhaṱela dzina ḽanga nnḓu.’+
6 Zwino laya vhathu vhau uri vha nthemele miṱaululo ya Libanoni.+ Vhashumeli vhanga vha ḓo shuma na vhashumeli vhau, ndi ḓo badela vhashumeli vhau u ya nga muholo une wa u vhea, ngauri u a zwi ḓivha uri a hu na na muthihi washu ane a kona u rema miri u fana na Vhasidoni.”+
7 Musi Hiramu a tshi pfa zwe Salomo a zwi amba, a takala nga maanḓa a ri: “Nga hu rendwe Yehova ṋamusi, ngauri o ṋea Davida murwa o ṱalifhaho uri a vhuse havha vhathu vhanzhi* nga u rali!”+
8 Hiramu a rumela mulaedza ha Salomo a ri: “Mulaedza we wa nthumela wone ndo u pfa. Ndi ḓo ita zwoṱhe zwine wa zwi ṱoḓa, nda u ṋea matanda a muṱaululo na a mudzhunipa.+
9 Vhashumeli vhanga vha ḓo a tsitsa a tshi bva Libanoni vha a isa lwanzheni, vha a vhofhekanya vha a pfukisa nga lwanzheni uri a kone u swika fhethu hune wa ḓo mmbudza uri ndi a ise hone. Ndi ḓo ri vha a vhofholole henefho, iwe u ḓo a hwala a tshi bva henefho. Iwe u ḓo ṋea vha muṱa wanga zwiḽiwa.”+
10 Hiramu a ṋea Salomo matanda oṱhe a muṱaululo na a mudzhunipa e a vha a tshi a ṱoḓa.
11 Salomo a ṋea Hiramu koro* dza 20 000 dza goroi uri dzi vhe zwiḽiwa zwa muṱa wawe na koro dza 20 dza mapfura a muṱwari. Zwenezwo ndi zwe Salomo a vha a tshi ṋea Hiramu ṅwaha muṅwe na muṅwe.+
12 Yehova o ṋea Salomo vhuṱali, samusi o vha o mu fhulufhedzisa,+ ho vha hu na vhushaka havhuḓi vhukati ha Hiramu na Salomo, vhuvhili havho vha ita thendelano.*
13 Khosi Salomo a nanga vhanna kha ḽoṱhe ḽa Isiraele uri vha ite mushumo wa khombe-khombe; o nanga vhanna vha 30 000.+
14 O vha a tshi vha rumela Libanoni vha tshi tou sielisana nga zwigwada zwa 10 000 ṅwedzi muṅwe na muṅwe. Vha tshi fhedza ṅwedzi vhe ngei Libanoni, miṅwedzi mivhili vhe mahayani avho; Adoniramu+ a tshi langa vhane vha ita mushumo wa khombe-khombe.
15 Salomo o vha e na vhashumi zwavho* vha 70 000 na vhavhaḓi vha matombo+ vha 80 000 dzithavhani,+
16 na vhakololo vha 3 300 vha shumaho u langa vhashumi.+
17 Khosi yo vha laya uri vha bwe matombo mahulu, matombo a ḓuraho+ u itela u adza mutheo+ wa nnḓu nga matombo o tsheṱiwaho.+
18 Vhafhaṱi vha Salomo na vhafhaṱi vha Hiramu na Vhagibali+ vha vha vhone vhavhaḓi, vha lugisa thanda na matombo zwa u fhaṱa nnḓu.
Ṱhaluso dzi re magumoni a siaṱari
^ Kana “o vha a tshi funa Davida.”
^ Kana “vha sa vhalei.”
^ Koro nthihi i lingana na ḽithara dza 220. Sedzani Ṱhume. B14.
^ Kana “mulanga.”
^ Kana “vhahwali vha mihwalo.”
