Bugu Ya U Thoma Ya Dzikhosi 6:1-38
6 Nga ṅwaha wa vhu 480 musi Vhaisiraele* vho no pfuluwa shangoni ḽa Egipita,+ nga ṅwaha wa vhuṋa wa musi Salomo e khosi kha ḽa Isiraele, nga ṅwedzi wa Sifi*+ (une wa vha ṅwedzi wa vhuvhili), a thoma u fhaṱa nnḓu ya Yehova.*+
2 Nnḓu ye Khosi Salomo a i fhaṱela Yehova yo vha i ya vhulapfu ha khubithi* dza 60, vhuphara ha khubithi dza 20, u ya nṱha ho vha hu khubithi dza 30.+
3 Vurannḓa+ ya phanḓa ha thembele yo vha i vhulapfu ha khubithi dza 20, vhu tshi lingana na vhuphara ha nnḓu. U aṱama hayo ho vha hu khubithi dza fumi u bva phanḓa ha nnḓu.
4 Yeneyo nnḓu o vha o i itela mafasiṱere a re na fureme+ tsekene.
5 A dovha a fhaṱa na tshifhaṱo tsho ṱumanaho na luvhondo lwa nnḓu; tshifhaṱo tsha mona na mbondo dza nnḓu, dzine dza vha mbondo dza thembele* na kamara ya nga ngomu-ngomu,+ a fhaṱa kamara khulwane dza nga thungo u mona hoṱhe.+
6 Kamara ya nga fhasi i re nga matungo yo vha i vhuphara ha khubithi ṱhanu, ya nga nṱha hayo i vhuphara ha khubithi dza rathi, ya nṱha hadzo dzoṱhe i vhuphara ha khubithi dza sumbe, o vha o sia zwikhala u mona na nnḓu uri hu si vhe na tshithu na tshithihi tshine tsha dzheniswa kha mbondo dza nnḓu.+
7 Yeneyo nnḓu yo vha yo fhaṱwa nga matombo e a vha o tou bwiwa e a vha o no vhaḓiwa,+ uri hu si pfale dzihamula na dzimbaḓo kana zwishumiswa naho zwi zwifhio zwa tsimbi musi i tshi khou fhaṱwa.
8 Muṋango wa kamara ya fhasi wo vha u thungo ya tshipembe* ha nnḓu,+ hu na zwiṱepisi zwo monaho u swika kha kamara i re nga nṱha, u bva kha kamara ya nṱha u ya kha kamara i re nṱha hadzo dzoṱhe.
9 O fhaṱa nnḓu yeneyo a vhuya a i fhedza,+ a i fulela nga matanda na mabulannga a muṱaululo.+
10 A fhaṱa na dzikamara khulwane nga thungo u mona na nnḓu,+ iṅwe na iṅwe i khubithi ṱhanu, dzo ṱumekanywa na nnḓu nga matanda a muṱaululo.
11 Nga tshenetsho tshifhinga, Yehova a amba na Salomo a ri:
12 “Arali wa tevhedza maitele anga na khaṱhulo dzanga na ndaela dzanga dzoṱhe,+ ndi ḓo dovha nda ita zwe nda fhulufhedzisa khotsi au Davida, ndi ḓo dzula kha yeneyi nnḓu ine wa khou i fhaṱa,+
13 ndi ḓo dzula vhukati ha Vhaisiraele,+ a thi nga laṱi vhathu vhanga vha Isiraele.”+
14 Salomo o fhaṱa nnḓu yeneyo a vhuya a i fhedza.
15 O fhaṱa mbondo dza nga ngomu nga mabulannga a muṱaululo. O vha o tibedza mbondo dza nga ngomu nga mabulannga u bva fhasi u ya kha ṱhanga ya nnḓu, fhasi o vha o adza mabulannga a mudzhunipa.+
16 Zwiṅwe hafhu, o fhaṱa tshipiḓa tsha khubithi dza 20 murahu ha nnḓu nga mabulannga a muṱaululo u bva fhasi u swika kha ṱhanga, nga ngomu* hayo a fhaṱa kamara ya nga ngomu-ngomu+ hune ha vha Hukhethwa-khethwa.+
17 Nnḓu ye ya vha i nga phanḓa ha thembele,+ yo vha i khubithi dza 40.
18 Matanda a miṱaululo e a vha e nga ngomu nḓuni o vha o korwa makolo ane a fanyisa mitshelo+ na maluvha.+ Hoṱhe ho vha hu miṱaululo; ho vha hu sa vhonali na tombo na ḽithihi.
19 Ho vha ho fhaṱwa na kamara ya nga ngomu-ngomu+ henefho nḓuni u itela u vhea mbulungelo ya mulanga wa Yehova.+
20 Kamara ya nga ngomu-ngomu yo vha i vhulapfu ha khubithi dza 20, vhuphara ha khubithi dza 20, u ya nṱha ho vha hu khubithi dza 20;+ o vha o i ḓodza musuku vhukuma; aḽeṱare+ o i tibedza nga mabulannga a muṱaululo.
21 Salomo o vha o ḓodza nga ngomu nḓuni nga musuku vhukuma,+ a dzhenisa ngeḓane dza musuku phanḓa ha kamara ya nga ngomu-ngomu,+ yo ḓodziwa musuku.
22 Nnḓu yoṱhe o vha o i ḓodza musuku u swika a tshi ṱanganya nnḓu yoṱhe; a ḓodza na aḽeṱare+ yoṱhe i re tsini na kamara ya nga ngomu-ngomu.
23 Zwiṅwe hafhu, henefho kamarani ya nga ngomu-ngomu o vha o ita vhakerube+ vhavhili nga thanda dza mupaini, mukerube muṅwe na muṅwe o vha o lapfa khubithi dza fumi.+
24 Lufhafha luthihi lwa mukerube lwo vha lu khubithi ṱhanu, luṅwe lufhafha lwo vha lu khubithi ṱhanu. U bva ṱhodzini ya luṅwe lufhafha u ya kha ṱhodzi ya luṅwe ho vha hu khubithi dza fumi.
25 Mukerube wa vhuvhili na ene o vha o lapfa khubithi dza fumi. Vhenevho vhakerube vhavhili vho vha vha tshi lingana, vhe na tshivhumbeo tshi fanaho.
26 Mukerube muthihi o vha o lapfa khubithi dza fumi, u fana na muṅwe mukerube.
27 O vha o dzhenisa vhenevho vhakerube+ nḓuni ya nga ngomu.* Phapha dza vhakerube dzo vha dzo ṱharamuwa, lufhafha lwa muṅwe mukerube lwo vha lu tshi swika kha luṅwe luvhondo, lufhafha lwa muṅwe mukerube lwo vha lu tshi swika vhukati ha nnḓu, u itela uri phapha dzi kwamane.
28 O vha o ḓodza vhenevho vhakerube nga musuku.
29 Kha mbondo dzoṱhe dza nnḓu, u mona na kamara ya nga ngomu na ya nga nnḓa, o vha o vhaḓa makolo ane a fanyisa vhakerube,+ mitshevho+ na maluvha.+
30 Fhasi henefho nḓuni o vha o ḓodza musuku, nga ngomu ha kamara na nga nnḓa.
31 Muṋangoni wa kamara ya nga ngomu-ngomu o vha o ita mavothi a mabulannga a mupaini, a ita na phuphu dza nga thungo, na fureme dza muṋango sa tshipiḓa tsha vhuṱanu.*
32 Mavothi mavhili o vha e a mabulannga a mupaini, o vha o vhaḓa makolo ane a fanyisa vhakerube, mitshevho na maluvha, o zwi ḓodza musuku; a ḓodza vhakerube na mitshevho nga musuku wo fulwaho.
33 Muṋangoni wa thembele* o vha o ita fureme dza muṋango dza mabulannga a mupaini sa tshipiḓa tsha vhuṋa.*
34 O vha o ita mavothi mavhili nga mabulannga a mudzhunipa. Vothi ḽiṅwe na ḽiṅwe ḽo vha ḽi tshi vuletshela thungo yaḽo na ḽiṅwe ḽi tshi vuletshela thungo yaḽo.+
35 O vha o vhaḓa makolo ane a fanyisa vhakerube, mitshevho na maluvha, eneo makolo a a ḓodza musuku.
36 O vha o fhaṱa muṱa wa nga ngomu+ we wa vha wo tangiwa nga mutsheṱo wa matombo o tsheṱiwaho e a vha o ingekana o ita miduba miraru na miduba ya matanda a muṱaululo.+
37 Nga ṅwaha wa vhuṋa nga ṅwedzi wa Sifi,* mutheo wa nnḓu ya Yehova wo vha wo no adziwa;+
38 nga ṅwaha wa vhu 11 nga ṅwedzi wa Bulu* (une wa vha ṅwedzi wa vhumalo), nnḓu yo vha yo no fhela na zwithu zwayo zwoṱhe u ya nga pulane yayo.+ Salomo o fhedza miṅwaha ya sumbe a tshi khou i fhaṱa.
Ṱhaluso dzi re magumoni a siaṱari
^ Sedzani Ṱhume. B15.
^ Thevhedz., “vharwa vha Isiraele.”
^ Khubithi nthihi i lingana na senthimithara dza 44,5. Sedzani Ṱhume. B14.
^ Zwi khou ambela kha fhethu Hukhethwa.
^ Thevhedz., “tsha u ḽa.”
^ Ndi nga ngomu nḓuni.
^ Ndi fhethu Hukhethwa-khethwa.
^ Khamusi zwi khou ambela kha nḓila ye fureme ya muṋango ya itwa ngayo kana kha vhuhulwane ha muṋango.
^ Zwi khou ambela kha fhethu Hukhethwa.
^ Khamusi zwi khou ambela kha nḓila ye fureme ya muṋango ya itwa ngayo kana kha vhuhulwane ha muṋango.
^ Sedzani Ṱhume. B15.
^ Sedzani Ṱhume. B15.
