Bugu Ya U Thoma Ya Dzikhosi 9:1-28
9 Musi Salomo a tshi tou fhedza u fhaṱa nnḓu ya Yehova, nnḓu* ya khosi+ na zwoṱhe zwe a vha a tshi tama u zwi ita,+
2 Yehova a ḓivhonadza kha Salomo lwa vhuvhili, samusi o ḓivhonadza khae ngei Gibeoni.+
3 Yehova a amba nae a ri: “Ndo pfa thabelo yau na khumbelo yau ya uri ndi u khathutshele ye wa i humbela phanḓa hanga. Heyi nnḓu ye wa i fhaṱa wa vhea dzina ḽanga lwa tshoṱhe ndo i ita khethwa,+ ndi ḓo i linda na u i ṱhogomela tshifhinga tshoṱhe.+
4 Arali wa tshimbila phanḓa hanga vhunga khotsi au Davida,+ nga u fhulufhedzea+ na u luga,+ wa ita zwoṱhe zwe nda u laya,+ wa thetshelesa maitele anga na khaṱhulo dzanga,+
5 ndi ḓo khwaṱhisa khuluṋoni ya muvhuso wau kha ḽoṱhe ḽa Isiraele u ya nga hu sa fheli, samusi ndo fhulufhedzisa khotsi au Davida, nda ri: ‘Hu ḓo dzula hu na munna wa lushaka lwau kha khuluṋoni ya Isiraele.’+
6 Fhedzi arali iwe na vharwa vhau na ntshandukela ni si vhulunge ndaela dzanga na milayo yanga zwe nda u ṋea zwone, wa ya wa shumela miṅwe midzimu wa i gwadamela,+
7 ndi ḓo fhelisa Isiraele shangoni ḽe nda mu ṋea ḽone,+ nnḓu ye nda i ita khethwa ndi tshi itela dzina ḽanga a thi tsha ḓo i lavhelesa.+ Isiraele u ḓo nyadziwa na u goḓiwa nga vhathu vhoṱhe.+
8 Yeneyi nnḓu i ḓo vha shubi.+ Ane a fhira tsini nayo u ḓo sedza o mangala, a lidza muludzi a ri: ‘Ndi ngani Yehova o ita zwenezwi kha ḽeneḽi shango na kha yeneyi nnḓu?’+
9 Vha ḓo ri: ‘Ndi nga nṱhani ha uri vho laṱa Yehova Mudzimu wavho, we a bvisa vhomakhulukuku wavho shangoni ḽa Egipita, vha nambatela miṅwe midzimu vha i gwadamela na u i shumela. Ndi ngazwo Yehova o vha ḓisela eneo maṱungu oṱhe.’”+
10 Musi ho no fhela miṅwaha ya 20 Salomo a tshi khou fhaṱa nnḓu mbili, nnḓu ya Yehova na nnḓu* ya khosi,+
11 Hiramu+ khosi ya Tiro o vha o ṋea Salomo matanda a muṱaululo na a mudzhunipa na musuku u ya nga he a vha a tshi u ṱoḓa ngaho,+ Khosi Salomo a ṋea Hiramu miḓi ya 20 shangoni ḽa Galilea.
12 Hiramu a takuwa Tiro a ya a vhona miḓi ye a ṋewa nga Salomo, fhedzi i si mu fushe.
13 Hiramu a ri: “Wahashu, ndi miḓi-ḓe iyi ye wa nṋea yone?” Ndi ngazwo ḽeneḽo shango ḽi tshi vhidzwa Kabulu* u swika na ṋamusi.
14 Nga tshenetsho tshifhinga, Hiramu o vha o rumela khosi talente* dza 120 dza musuku.+
15 Haya ndi mafhungo a vhathu vhe Khosi Salomo a vha ṅwalisa uri vha ite mushumo wa khombe-khombe+ wa u fhaṱa nnḓu ya Yehova,+ nnḓu* yawe, mbondo dza Yerusalema, Hatsoro,+ Megido+ na Gesere+ na u ita Tshikwara.*+
16 (Farao khosi ya Egipita o gonya a thuba muḓi wa Gesere a u fhisa, a dovha a vhulaya na Vhakanana+ vha dzulaho kha wonoyo muḓi. A u ṋea ṅwana+ wawe ane a vha mufumakadzi wa Salomo sa tshifhiwa* musi vha tshi onesana.)
17 Salomo a vusulusa* muḓi wa Gesere, Bethe-horoni+ ya Fhasi,
18 Baalathi+ na muḓi wa Thamara u re sogani kha ḽeneḽo shango
19 na miḓi yoṱhe ye a vha a tshi vhulungela zwithu, miḓi ya gariki+ dzawe na dza vhaṋameli vha bere na zwoṱhe zwe Salomo a vha a tshi tama u zwi fhaṱa Yerusalema, Libanoni na mashangoni oṱhe e a vha a tshi a vhusa.
20 Vhathu vhoṱhe vho salaho kha Vhaamori, Vhahethe, Vhapheresi, Vhahevi na Vhayebusi,+ vha si vhathu vha Isiraele,+
21 vhana vhavho vho salaho kha ḽeneḽo shango, vhe Vhaisiraele vha si kone u vha fhelisa, vho ṅwaliswa nga Salomo uri vha ite mushumo wa khombe-khombe sa phuli u swika na ṋamusi.+
22 Fhedzi Salomo ho ngo ita uri Vhaisiraele vha vhe phuli,+ ngauri vho vha vhe vhahali vhawe, vhashumeli vhawe, vhakololo vhawe, vhalangammbi vhawe, vhalangi vha vhatshimbidzi vha gariki dzawe na vhaṋameli vha bere dzawe.
23 Ho vha hu na vhalangi vha vhaḓinḓa vha 550 vha langaho mushumo wa Salomo, vha lavhelesaho vhathu vhane vha khou shuma.+
24 Naho zwo ralo, ṅwananyana wa Farao+ a bva Muḓini wa Davida+ a ya nḓuni yawe ye a fhaṱelwa yone nga Salomo; ndi nga tshenetshi tshifhinga he Salomo a ita Tshikwara.*+
25 Salomo o vha a tshi anzela u ṋekedza zwiṱhavhelo zwa u fhiswa na zwiṱhavhelo zwa u pfumedzana luraru nga ṅwaha+ kha aḽeṱare ye a i fhaṱela Yehova,+ o dovha a dubisa na zwiṅwe zwiṱhavhelo kha aḽeṱare ye ya vha i phanḓa ha Yehova, a fhedza yeneyo nnḓu.+
26 Khosi Salomo o dovha a ita na zwikepe ngei Etsioni-gebere+ hune ha vha Elotha khunzi-khunzini ya Lwanzhe Lutswuku shangoni ḽa Edomo.+
27 Hiramu a rumela vhaṅwe vha vhashumeli vhawe vhe na zwikepe zwinzhi,+ vhaḓivhi vha lwanzhe uri vha shume na vhashumeli vha Salomo.
28 Vha ya Ofiri,+ vha dzhia talente dza 420 dza musuku vha dzi isa kha Khosi Salomo.
Ṱhaluso dzi re magumoni a siaṱari
^ Kana “pfamo.”
^ Kana “pfamo.”
^ Kana khamusi, “Shango Ḽi Si Na Tshithu.”
^ Talente i lingana na khilogramu dza 34,2. Sedzani Ṱhume. B14.
^ Kana “Milo.” Ndi ipfi ḽa Tshihevheru ḽine ḽa amba u “ḓadza.”
^ Kana “pfamo.”
^ Kana “tshifhiwa tsha mbingano; tshelede na thundu.”
^ Kana “khwaṱhisa.”
^ Kana “Milo.” Ndi ipfi ḽa Tshihevheru ḽine ḽa amba u “ḓadza.”
