Bugu Ya U Thoma Ya Koronika 12:1-40
-
Vhane vha tikedza vhuhosi ha Davida (1-40)
12 Havha ndi vhanna vhe vha ḓa ha Davida ngei Zikilaga+ musi a tshi khou shavha Saulo+ murwa wa Kishi, vho vha vhe vhaṅwe vha vhahali vhe vha mu tikedza nndwani.+
2 Vho vha vho ḓiṱama nga vhura, vho vha vha tshi kona u posa matombo+ nga tshanḓa tsha u ḽa kana nga tsha monde+ kana u pfula nga vhura. Vho vha vhe vhana vha khotsi a Saulo, vha tshi bva kha lushaka lwa Benyamini.+
3 Murangaphanḓa o vha e Ahiesere, khathihi na Yoasi, vhoṱhe vho vha vhe vharwa vha Shemaha wa Mugibia;+ Yesiele na Pelete vharwa vha Asimavethe,+ Beraka, Yehu wa Muanathothe,
4 Yisimaya wa Mugibeoni+ muṅwe wa vhahali vha furaru+ na ane a langa vha furaru;* khathihi na Yeremia, Yahasiele, Yohanani, Yosabada wa Mugedera,
5 Elusai, Yerimothe, Bialia, Shemaria, Shefatia wa Muharifi,
6 Elikana, Yesia, Azariele, Yoesere na Yasobeamu, vhane vha vha Vhakora;+
7 Yoela na Sebadiya vharwa vha Yerohamu wa ngei Gedoro.
8 Vhaṅwe vha Vhagada vho ya ha Davida fhethu ha vhushavhelo sogani;+ vho vha vhe vhahali, maswole o gudiswaho u lwa, ane a dzula o lugela u lwa o fara tshiṱangu tshihulu na pfumo, e na zwifhaṱuwo zwe zwa vha zwi tshi tou nga zwa ndau, e na luvhilo lune lwa nga lwa phala dzi thavhani.
9 Esere o vha e murangaphanḓa, wa vhuvhili o vha e Obadia, wa vhuraru o vha e Eliaba,
10 wa vhuṋa o vha e Misimana, wa vhuṱanu o vha e Yeremia,
11 wa vhurathi o vha e Athai, wa vhusumbe o vha e Eliele,
12 wa vhumalo o vha e Yohanani, wa vhuṱahe o vha e Elisabada,
13 wa vhufumi o vha e Yeremia, wa vhu 11 o vha e Makabanai.
14 Vhenevha vho vha vhe Vhagada,+ vharangaphanḓa vha mmbi. Muṱuku o vha a tshi nga kona u lwa na vha 100, muhulwanesa o vha tshi nga kona u lwa na vha 1 000.+
15 Vhenevha ndi vhanna vhe vha wela Mulambo wa Yorodane nga ṅwedzi wa u thoma musi wo ḓala, vha pandela vhoṱhe vha dzulaho midavhini thungo ya vhubvaḓuvha na thungo ya vhukovhela.
16 Vhaṅwe vhanna vha Benyamini na vha Yuda vho ya fhethu ha vhushavhelo he Davida a vha e hone.+
17 Davida a bva a ima phanḓa havho a amba navho a ri: “Arali no ḓa kha nṋe nga mulalo uri ni nthuse, mbilu yanga i ḓo pfana na inwi. Fhedzi arali na mpheṱa kha maswina anga ndi songo tshinya tshithu, Mudzimu wa vhomakhulukuku washu u ḓo zwi vhona, a zwi lugisa.”+
18 Muya wa ḓa kha Amasai,+ murangaphanḓa wa vha furaru a ri:
“Riṋe ri vhau, iwe Davida, ri ima na iwe, murwa wa Isai.+
Mulalo nga u vhe na iwe, mulalo u vhe na ane a khou u thusa,Ngauri Mudzimu wau u khou u thusa.”+
Davida a vha ṱanganedza, a vha vhea uri vha vhe vharangaphanḓa vha maswole.
19 Vhaṅwe vha lushaka lwa Manase vho ṱuwa vha ya vha tikedza Davida musi a tshi ḓa na Vhafilisita uri a lwe na Saulo; fhedzi ho ngo thusa Vhafilisita, ngauri musi mahosi a Vhafilisita+ o no wana nyeletshedzo, o mu pandela a ri: “U ḓo ya ha muṋe wawe Saulo, zwi ḓo vhea vhutshilo hashu khomboni.”+
20 Vha lushaka lwa Manase vhe vha ḓa khae musi a tshi ya Zikilaga+ ndi havha: Adana, Yosabada, Yediaele, Mikaele, Yosabada, Elihu na Tsilethai, vhane vha ranga phanḓa vha zwigidi vha Manase.+
21 Vho thusa Davida u lwa na tshigwada tsha mavemu, ngauri vhenevho vhoṱhe vho vha vhe vhanna vha maanḓa na tshivhindi,+ vha vha vhalangammbi.
22 Ḓuvha ḽiṅwe na ḽiṅwe vho vha vha tshi ya ha Davida+ u mu thusa u swika mmbi i tshi vha khulwane u fana na mmbi ya Mudzimu.+
23 Tshivhalo tsha vharangaphanḓa vho ḓiṱamaho vhe vha ḓa kha Davida ngei Heburoni+ uri vha mu ṋee vhuhosi ha Saulo u ya nga zwe Yehova a laedza ndi hetshi:+
24 Vhanna vha Yuda vho faraho zwiṱangu zwihulwane na mapfumo vhe mmbi ya 6 800, vho ḓiṱamaho u itela u lwa.
25 Kha vha lushaka lwa Simioni, vhanna vha mmbi vha maanḓa na tshivhindi vho vha vhe 7 100.
26 Kha vha lushaka lwa Vhalevi ndi 4 600.
27 Yehoyada+ o vha e ene murangaphanḓa wa vharwa vha Aroni,+ o vha e na vha 3 700,
28 khathihi na Tsadoko,+ munna wa maanḓa na tshivhindi na vharangaphanḓa vha nnḓu ya vhokhotsi avho vha 22.
29 Kha vha lushaka lwa Vhabenyamini, vhana vha khotsi a Saulo,+ ho vha hu na vha 3 000, vhe vhunzhi havho vha vha vha tshi linda zwa nḓuni ya Saulo.
30 Kha vha lushaka lwa Vhaefuraimi ho vha hu na vhanna vha bvumo vha maanḓa na tshivhindi vha 20 800 kha vharangaphanḓa vha miṱa ya vhokhotsi avho.
31 Kha vha lushaka lwa Manase, ho vha hu na vha 18 000 vhe vha nangiwa nga madzina avho uri vha ḓe vha vhee Davida uri a vhe khosi.
32 Kha vha lushaka lwa Isashari, vhane vha pfesesa zwifhinga na u ḓivha zwine Vhaisiraele vha fanela uri vha zwi ite, vho vha vhe vharangaphanḓa vha 200, vho vha vha tshi langa vhana vha khotsi avho vhoṱhe.
33 Kha vha lushaka lwa Sebuloni, ho vha hu na vha 50 000 vha lwaho nndwani, vha tshi ima vho ḓilugiselela u lwa vho fara zwiṱhavhane zwa nndwa, vhoṱhe vha tshi tikedza Davida nga u fhulufhedzea.*
34 Kha vha lushaka lwa Nafutali ho vha hu na vharangaphanḓa vha 1 000, vho vha vhe na vha 37 000 vho faraho zwiṱangu zwihulwane na mapfumo.
35 Kha vha lushaka lwa Dani, vhe vha ima vho ḓilugiselela u lwa vho vha vhe 28 600.
36 Kha vha lushaka lwa Ashere, vhane vha nga vha kha mmbi vha ima vho ḓilugiselela u lwa vho vha vhe 40 000.
37 Seli ha Mulambo wa Yorodane,+ kha vha lushaka lwa Vharubeni, Vhagada na hafu ya lushaka lwa Manase, ho vha hu na maswole a 120 000 a re na zwiṱhavhane zwa nndwa zwo fhambanaho.
38 Vhenevha vhoṱhe vho vha vhe vhanna vha nndwa, vha yaho nndwani; vho ya kha Davida nga mbilu yoṱhe ngei Heburoni uri vha mu vhee a vhe khosi kha ḽoṱhe ḽa Isiraele, vhaṅwe Vhaisiraele vho salaho vho vha vha tshi tendelana* uri vha vhee Davida uri a vhe khosi.+
39 Vha dzula henefho na Davida maḓuvha mararu, vha tshi ḽa vha tshi nwa, ngauri vhahavho vho vha vho vha lugiselela zwone.
40 Vha re tsini navho na vha re kule u bva Isashari, Sebuloni na Nafutali, vho vha vha tshi khou vha ḓisela zwiḽiwa nga donngi, gamela, meila na kholomo, vha dovha vha ḓisa fuḽauru, khekhe dzo itwaho nga mahuyu na nga nḓirivhe, waini, mapfura, kholomo na nngu nga vhunzhi, ngauri kha ḽa Isiraele ho vha ho takalwa.
Ṱhaluso dzi re magumoni a siaṱari
^ Kana “vha 30 na ane a langa vha 30.”
^ Kana “vhoṱhe vhe vha vha vha tshi tikedza Davida nga mbilu yoṱhe.”
^ Thevhedz., “vho vha vhe na mbilu nthihi.”
