Bugu Ya U Thoma Ya Koronika 13:1-14
13 Davida a ambedzana na vhane vha ranga phanḓa vha zwigidi na maḓana na murangaphanḓa muṅwe na muṅwe.+
2 Davida a amba na tshivhidzo tshoṱhe tsha Vhaisiraele a ri: “Arali ni tshi vhona zwo tea, zwi tshi ṱanganedzea kha Yehova Mudzimu washu, kha ri rumele mulaedza kha vhahashu vho salaho madzinguni oṱhe a Isiraele, vhotshifhe na Vhalevi miḓini+ yavho i re na mafulo uri vha ḓe vha kuvhangane na riṋe.
3 Kha ri vhuise Mbulungelo+ ya Mudzimu washu.” Ngauri vho vha vha sa i ṱhogomeli misini ya Saulo.+
4 Tshivhidzo tshoṱhe tsha tendelana uri tshi ḓo ita nga u ralo, ngauri zwo vha zwi tshi vhonala zwo luga kha vhathu vhoṱhe.
5 Davida a kuvhanganya Vhaisiraele vhoṱhe, u bva mulamboni* wa Egipita u swika Lebo-hamathi,*+ uri vha ye u dzhia Mbulungelo ya Mudzimu wa ngoho ngei Kiriate-yearimi.+
6 Davida na Vhaisiraele vhoṱhe vha gonya Baala+ ngei Kiriate-yearimi, une wa vha wa Yuda, uri vha dzhie Mbulungelo ya Mudzimu wa ngoho, Yehova, o dzulaho nṱha* ha vhakerube,+ hune dzina ḽawe ḽa vhidzelelwa hone.
7 Naho zwo ralo, vha vhea Mbulungelo ya Mudzimu wa ngoho kha gariki+ ntswa vha i bvisa nḓuni ya Abinadaba, Usa na Ahio vho vha vha tshi khou tshimbidza yeneyo gariki.+
8 Davida na Vhaisiraele vhoṱhe vho vha vha tshi khou pembela phanḓa ha Mudzimu wa ngoho nga nungo dzavho dzoṱhe, vha tshi khou imba, vha tshi khou lidza haripa, zwiṅwe zwilidzo zwi re na ṱhale, mirumba,+ simbala+ na phalaphala.+
9 Musi vha tshi swika fhethu hune ha fhefherwa hone* ngei Kidoni, Usa a isa tshanḓa a fara Mbulungelo, ngauri kholomo dzo ṱoḓou i wisa.
10 Yehova a sinyutshela Usa, a mu vhulaya ngauri o isa tshanḓa a fara Mbulungelo,+ a fela henefho phanḓa ha Mudzimu.+
11 Fhedzi Davida a sinyuwa nge Yehova a sinyutshela Usa; henefho fhethu hu vhidzwa Perese-usa u swika na ṋamusi.
12 Nga ḓuvha ḽeneḽo Davida a ofha Mudzimu wa ngoho, a ri: “Mbulungelo ya Mudzimu wa ngoho i nga ḓiswa hani kha nṋe?”+
13 Davida ho ngo tsha ḓisa Mbulungelo hune a dzula hone Muḓini wa Davida, fhedzi o ita uri i iswe nḓuni ya Obede-edomo wa Mugathi.
14 Mbulungelo ya Mudzimu wa ngoho ya fhedza miṅwedzi miraru i muṱani wa Obede-edomo wa Mugathi, Yehova a bvela phanḓa a tshi fhaṱutshedza muṱa wa Obede-edomo na zwoṱhe zwe a vha e nazwo.+
Ṱhaluso dzi re magumoni a siaṱari
^ Kana “u bva Shihoro.”
^ Kana “khoroni ya Hamathi.”
^ Kana khamusi, “vhukati.”
^ Kana “luvhatani.”
