Bugu Ya U Thoma Ya Koronika 14:1-17
14 Hiramu+ khosi ya Tiro a rumela vhaḓinḓa ha Davida vhe na thanda dza miṱaululo, vhatsheṱi vha mitsheṱo* na vhavhaḓi vha mabulannga uri vha mu fhaṱele nnḓu.*+
2 Davida o vha a tshi zwi ḓivha uri Yehova o mu vhea uri a vhe khosi ya Isiraele,+ ngauri muvhuso wawe wo huliswa hu tshi itelwa vhathu vhawe vha Isiraele.+
3 Davida o vhinga vhafumakadzi vhanzhi+ ngei Yerusalema, Davida a vha na vharwa vhanzhi na vhananyana.+
4 Madzina a vhana vhe a bebelwa vhone ngei Yerusalema ndi haya:+ Shamua, Shobaba, Nathani,+ Salomo,+
5 Ibihara, Elishua, Elipelete,
6 Noga, Nefege, Yafia,
7 Elishama, Beleyada na Eliphelete.
8 Musi Vhafilisita vha tshi pfa uri Davida o ḓodzwa uri a vhe khosi kha ḽa Isiraele,+ Vhafilisita vhoṱhe vha gonya vha tshi khou ṱoḓa Davida.+ Musi Davida a tshi zwi pfa, a bva a ya a lwa navho.
9 Vhafilisita vha ḓa vha thoma u ṱhasela vhadzulapo vha Govhani ḽa Refaimi.+
10 Davida a vhudzisa Mudzimu a ri: “Naa ndi fanela u gonya uri ndi ye u lwa na Vhafilisita? Naa u ḓo vha kumedzela zwanḓani zwanga?” Yehova a amba nae a ri: “Gonya ngauri ndi ḓo vha kumedzela zwanḓani zwau.”+
11 Davida a gonya Baali-perasimi,+ a vha vhulayela henefho. Davida a ri: “Mudzimu wa ngoho o fhelisa maswina anga nga tshanḓa tshanga, vhunga luvhondo lwo kumbiwaho nga maḓi.” Ndi ngazwo vho ri henefho fhethu hu pfi Baali-perasimi.*
12 Vhafilisita vha sia midzimu yavho henefho, Davida a laedza uri i fhiswe nga mulilo.+
13 Nga murahu Vhafilisita vha dovha vha ṱhasela vhadzulapo govhani.+
14 Davida a dovha a vhudzisa Mudzimu, fhedzi Mudzimu wa ngoho a amba nae a ri: “U songo gonya wa ya khavho wo vha livha. Nṱhani hazwo, u vha mone nga murahu, u lwe navho phanḓa ha zwiṱaka zwa baka.*+
15 Musi u tshi pfa mitsindo nṱha ha zwiṱaka zwa baka, u vha vutshele, ngauri Mudzimu wa ngoho u ḓo vha o u ranga phanḓa u tshi ya u vhulaya mmbi ya Vhafilisita.”+
16 Ngauralo, Davida a ita zwe Mudzimu wa ngoho a mu laya,+ vha vhulaya mmbi ya Vhafilisita u bva Gibeoni u swika Gesere.+
17 Bvumo ḽa Davida ḽa phaḓalala mashangoni oṱhe, Yehova a ita uri tshaka dzoṱhe dzi mu ofhe.+
Ṱhaluso dzi re magumoni a siaṱari
^ Kana “vhafhaṱi vha mbondo.”
^ Kana “pfamo.”
^ Zwine zwa amba uri “Muṋe Wa U Kunda.”
^ Ipfi ḽo ṱalutshedzelwaho nga uri “baka” ndi ḽa Tshihevheru. A hu ḓivhiwi zwavhuḓi uri ḽi amba mini.
