Bugu Ya U Thoma Ya Koronika 16:1-43
16 Vha ḓisa Mbulungelo ya Mudzimu wa ngoho vha i vhea nga ngomu denndeni ḽe Davida a ḽi athela yone;+ vha ṋekedza zwifhiwa zwa u fhiswa na zwiṱhavhelo zwa u pfumedzana phanḓa ha Mudzimu wa ngoho.+
2 Musi Davida a tshi fhedza u ṋekedza zwifhiwa zwa u fhiswa+ na zwiṱhavhelo zwa u pfumedzana,+ a fhaṱutshedza vhathu dzinani ḽa Yehova.
3 Zwiṅwe hafhu, a ṋea Vhaisiraele vhoṱhe, munna muṅwe na muṅwe na mufumakadzi muṅwe na muṅwe ḽofo ya vhurotho, khekhe i re na mitshelo ya mutshevho na khekhe i re na nḓirivhe.
4 A vhea vhaṅwe Vhalevi uri vha shume phanḓa ha Mbulungelo ya Yehova,+ uri vha hulise,* u livhuwa na u renda Yehova Mudzimu wa Isiraele.
5 Asafu+ o vha e murangaphanḓa, a tevhelwa nga Sakaria; Yeiele, Shemiramothe, Yehiele, Mathithia, Eliaba, Benaya, Obede-edomo na Yeiele+ vho vha vha tshi lidza zwilidzo zwi re na ṱhale na haripa;+ Asafu o vha a tshi lidza simbala,+
6 tshifhe Benaya na tshifhe Yahasiele vho vha vha tshi lidza phalaphala tshifhinga tshoṱhe phanḓa ha mbulungelo ya mulanga wa Mudzimu wa ngoho.
7 Ndi nga ḽeneḽo ḓuvha ḽe Davida a thoma u ṋea Asafu+ na vhahawe luimbo lwa u livhuwa Yehova lune lwa ri:
8 “Livhuwani Yehova,+ vhidzelelani dzina ḽawe,Ḓivhadzani vhathu mishumo yawe!+
9 Mu imbeleni, mu imbeleni thendo,+Elekenyani* nga ha mishumo yawe yoṱhe i mangadzaho.+
10 Zuwani nga ha dzina ḽawe ḽikhethwa.+
Mbilu dza vhane vha ṱoḓa Yehova nga dzi takale.+
11 Ṱoḓani Yehova+ na maanḓa awe.
Mu ṱoḓeni misi yoṱhe.+
12 Humbulani mishumo i mangadzaho ye a i ita,+Vhuṱolo na khaṱhulo dze a dzi ḓivhadza,
13 Inwi vhana* vha Isiraele mushumeli wawe,+Inwi vharwa vha Yakobo vho nangiwaho.+
14 Ndi Yehova Mudzimu washu.+
U haṱula ḽifhasi ḽoṱhe.+
15 Humbulani mulanga wawe lini na lini,Zwe a fhulufhedzisa* mirafho ya tshigidi,+
16 Mulanga we a u vhofha na Abrahamu,+Na zwe a anela Isaka,+
17 A zwi ita mulayo kha Yakobo+Na mulanga wa lini na lini kha Isiraele,
18 A ri: ‘Ndi ḓo u ṋea shango ḽa Kanana+Uri ḽi vhe ifa ḽau.’+
19 Zwenezwi zwo itea musi ni si vhanzhi,No vha ni si vhanzhi, ni vhatsinda henefho shangoni.+
20 Vho tendeleka na dzitshaka,Vha tshi bva kha muṅwe muvhuso vha tshi ya kha vhaṅwe vhathu.+
21 Ho ngo tenda vha tshi tsikeledzwa nga vhaṅwe vhathu,+O kaidza mahosi a tshi itela vhone,+
22 A ri: ‘Ni songo kwama vhaḓodzwa vhanga,Vhaporofita vhanga ni songo vha huvhadza.’+
23 Imbelani Yehova, inwi ḽifhasi ḽoṱhe!
Ḓuvha ḽiṅwe na ḽiṅwe ni ḓivhadze nga ha u tshidza hawe!+
24 Ḓivhadzani vhugala hawe kha dzitshaka,Na mishumo yawe i mangadzaho kha vhathu vhoṱhe.
25 Ngauri Yehova ndi muhulwane, o tewa nga u rendwa.
U ofhisa u fhira miṅwe midzimu yoṱhe.+
26 Midzimu yoṱhe ya vhathu a i vhuyedzi tshithu,+Fhedzi Yehova ndi ene we a ita ḽiṱaḓulu.+
27 Phanḓa hawe hu na vhugala* na lunako;+Hune a dzula hone hu na maanḓa na dakalo.+
28 Inwi tshaka dzoṱhe, hulisani Yehova,Hulisani Yehova ngauri u na vhugala na maanḓa.+
29 Ṋeani Yehova vhugala ho teaho dzina ḽawe;+Iḓani phanḓa hawe na tshifhiwa.+
Gwadamelani Yehova no ḓiṱama nga vhukhethwa.*+
30 Ḽifhasi ḽoṱhe nga ḽi tetemele phanḓa hawe!
Ḽifhasi ḽo khwaṱha; ḽi nga si dzinginyiswe.+
31 Ḽiṱaḓulu nga ḽi takale na ḽifhasi ḽi takale;+Ḓivhadzani dzitshaka uri: ‘Yehova ndi Khosi!’+
32 Lwanzhe na zwoṱhe zwi re khalwo kha zwi bvume;Masimu na zwoṱhe zwi re khao nga zwi takale.
33 Miri i re ḓakani nga i takale phanḓa ha Yehova,Ngauri u khou ḓa* u haṱula ḽifhasi.
34 Livhuwani Yehova ngauri ndi wavhuḓi;+Lufuno lwawe lu sa shanduki ndi lwa lini na lini.+
35 Ni ambe ni ri: ‘Ri tshidze Iwe Mudzimu a ri tshidzaho,+Ri kuvhanganye, u ri tsireledze kha dzitshaka,Uri ri livhuwe dzina ḽau ḽikhethwa+Ri takalele u u renda.+
36 Nga hu rendwe Yehova Mudzimu wa IsiraeleU ya nga hu sa fheli.’”*
Vhathu vhoṱhe vha ri: “Amen!”* vha renda Yehova.
37 Ngauralo, Davida a sia Asafu+ na vhahawe henefho phanḓa ha mbulungelo ya mulanga wa Yehova uri vha bvele phanḓa vha tshi shuma henefho Mbulungeloni,+ u ya nga maitele a ḓuvha ḽiṅwe na ḽiṅwe.+
38 A dovha a sia na Obede-edomo na vhahawe vha 68, Obede-edomo murwa wa Yeduthuni na Hosa vho vha vhe vhalindakhoro;
39 tshifhe Tsadoko+ na vhotshifhe ngae vhe phanḓa ha dennde ḽikhethwa* ḽa Yehova fhethu ha vhurabeli ngei Gibeoni+
40 uri vha ṋekedze Yehova zwifhiwa zwa u fhiswa, nga matsheloni na nga madekwana na u ita zwoṱhe zwo ṅwaliwaho kha Mulayo wa Yehova we a laedza Vhaisiraele.+
41 Vho vha vhe na Hemani na Yeduthuni+ na vhaṅwe vhanna vho nangwaho nga madzina avho uri vha livhuwe Yehova,+ nga nṱhani ha uri “lufuno lwawe lu sa shanduki ndi lwa lini na lini”;+
42 vhenevho vho vha vhe na Hemani+ na Yeduthuni uri vha lidze phalaphala, simbala na zwilidzo zwa u renda Mudzimu wa ngoho; vharwa vha Yeduthuni+ vho vha vhe khoroni.
43 Vhathu vhoṱhe vha ya mahayani avho na Davida a ya a fhaṱutshedza vha muṱani wawe.
Ṱhaluso dzi re magumoni a siaṱari
^ Thevhedz., “vha humbule.”
^ Kana khamusi, “Ambani.”
^ Kana “vhaḓuhulu.” Thevhedz., “mbeu.”
^ Thevhedz., “Zwe a laya.”
^ Kana “tshirunzi.”
^ Kana khamusi, “nga nṱhani ha vhugala ha vhukhethwa hawe.”
^ Kana “Ngauri o ḓa.”
^ Kana “Lini na lini.”
^ Kana “Nga zwi ralo!”
^ “Ndi dennde ḽa vhurabeli ḽine ḽa hwalea ḽe ḽa vha ḽi tshi shumiswa nga Vhaisiraele; nga zwiṅwe zwifhinga ḽo vha ḽi tshi vhidzwa ‘dennde ḽa muṱangano.’”
