Bugu Ya U Thoma Ya Koronika 17:1-27
17 Musi Davida o no dzula nḓuni* yawe, a amba na muporofita Nathani+ a ri: “Nṋe ndi khou dzula nḓuni ya miṱaululo+ ngeno mbulungelo ya mulanga ya Yehova i tshi khou dzula denndeni.”+
2 Nathani a fhindula Davida a ri: “Ita zwi re mbiluni yau, ngauri Mudzimu wa ngoho u na iwe.”
3 Nga honoho vhusiku, Mudzimu a ḓa a amba na Nathani a ri:
4 “Tshimbila u ye u vhudze mushumeli wanga Davida uri, ‘Yehova u ri: “A si iwe ane wa ḓo mphaṱela nnḓu ine nda ḓo dzula khayo.+
5 Ngauri a thi athu u dzula nḓuni u bva ḓuvha ḽe nda bvisa vhathu vha Isiraele ngei Egipita u swika ṋamusi, fhedzi ndo vha ndi tshi bva kha ḽiṅwe dennde ndi tshi ya kha ḽiṅwe, ndi tshi bva kha vhuṅwe vhudzulo ndi tshi ya kha vhuṅwe.+
6 Tshifhinga tshoṱhe ndi tshi khou tshimbila na Vhaisiraele vhoṱhe, naa ndo vhuya nda amba na muṅwe wa vhahaṱuli vha Isiraele we nda mu vhea uri a lise vhathu vhanga nda ri: ‘Ndi ngani ni songo mphaṱela nnḓu ya miṱaululo?’”’
7 “Zwino amba na mushumeli wanga Davida uri: ‘Yehova wa mavhuthu u ri: “Ndo u dzhia u tshi bva pfuloni, u tshi tevhela sambi, nda u ita murangaphanḓa wa vhathu vha Isiraele.+
8 Ndi ḓo vha na iwe hoṱhe hune wa ya,+ ndi ḓo fhelisa maswina au oṱhe phanḓa hau;+ ndi ḓo ita uri u vhe na bvumo, vhunga vhaṅwe vhathu vha re na bvumo kha ḽifhasi.+
9 Ndi ḓo ṋea vhathu vhanga vha Isiraele vhudzulo, vha ḓo dzula henefho vha si tsha thithiswa; vhathu vhavhi a vha nga ḓo dovha vha vha tsikeledza sa zwe vha zwi ita tshifhingani tsho fhiraho,+
10 u bva tshee nda vhea vhahaṱuli uri vha haṱule vhathu vhanga vha Isiraele.+ Ndi ḓo kunda maswina au oṱhe.+ Zwiṅwe hafhu, ‘Yehova u ḓo u fhaṱela nnḓu.’
11 “‘“Musi maḓuvha au a tsini na u fhela, u tshi vho fa, wa ya hune ha vha na vhomakhulukuku wau, ndi ḓo vusa ṅwana* wau ane a ḓo ḓa nga murahu hau,+ ndi ḓo khwaṱhisa vhuhosi hawe.+
12 Ndi ene ane a ḓo mphaṱela nnḓu,+ ndi ḓo khwaṱhisa khuluṋoni yawe u ya nga hu sa fheli.+
13 Ndi ḓo vha khotsi awe, ene a vha murwa wanga.+ A thi nga litshi u mu sumbedza lufuno lu sa shanduki+ vhunga ndo litsha u sumbedza we a vhusa phanḓa hau.+
14 Ndi ḓo mu imisa nḓuni yanga na kha vhuhosi hanga nga hu sa fheli,+ muvhuso wawe u ḓo vha wa tshoṱhe.”’”+
15 Nathani o vhudza Davida eneo mafhungo oṱhe na ḽeneḽo bono ḽoṱhe.
16 Khosi Davida a ḓa a dzula fhasi phanḓa ha Yehova a ri: “Iwe Yehova, ndi tou vha nnyi? Nnḓu yanga i tou vha mini zwe zwa ita uri u nnyitele zwithu zwingafha?+
17 Zwa tou nga zwenezwo zwo vha zwi songo eḓana, Iwe Mudzimu, wo dovha wa amba nga ha nnḓu ya mushumeli wau ya tshifhingani tshi ḓaho,+ Iwe Yehova Mudzimu, wo dovha wa nndavhelesa nda tou nga muthu ane a fanela u dovha a huliswa.*
18 Ndi mini zwine nṋe Davida mushumeli wau nda nga dovha nda zwi amba nga ha nḓila ye wa nkhulisa ngayo ngeno u tshi ḓivha zwavhuḓi mushumeli wau?+
19 Iwe Yehova, wo ita zwenezwi zwithu zwoṱhe zwihulu nga u dzumbulula vhuhulu hau u tshi itela mushumeli wau, wa tendelana na zwine mbilu yau ya zwi funa.+
20 Iwe Yehova, a hu na ane a nga iwe,+ a hu na muṅwe Mudzimu nga nnḓa ha iwe;+ zwoṱhe zwe ra zwi pfa nga nḓevhe dzashu zwi khwaṱhisedza zwenezwi.
21 Ndi lufhio luṅwe lushaka kha ḽifhasi lune lwa nga vhathu vhau vha Isiraele?+ Mudzimu wa ngoho o ya a vha rengulula uri vha vhe vhathu vhawe.+ Wo ḓiitela dzina nga u ita zwithu zwihulu na zwi mangadzaho,+ wa pandela dzitshaka phanḓa ha vhathu vhau,+ vhe wa vha rengulula ngei Egipita.
22 Wo ita uri vhathu vha Isiraele vha vhe vhau lwa tshoṱhe;+ Iwe Yehova wa vha Mudzimu wavho.+
23 Zwino Iwe Yehova, ngavhe u tshi itela mushumeli wau na vha nnḓu yawe zwe wa fhulufhedzisa misi yoṱhe, ngavhe u tshi ita vhunga wo fhulufhedzisa.+
24 Ngavhe dzina ḽau ḽi tshi dzula ḽi hone lini na lini* ḽi tshi huliswa+ lwa tshoṱhe, vhathu vha ambe vha ri: ‘Yehova wa mavhuthu ndi Mudzimu wa Isiraele,’ ngavhe nnḓu ya mushumeli wau Davida i tshi khwaṱhiswa phanḓa hau.+
25 Ngauri iwe Mudzimu wanga, wo dzumbululela mushumeli wau uri u ṱoḓa u mu fhaṱela nnḓu. Ndi ngazwo mushumeli wau e na tshivhindi tsha u rabela yeneyi thabelo.
26 Iwe Yehova, u Mudzimu wa ngoho, wo fhulufhedzisa mushumeli wau zwenezwi zwithu zwavhuḓi.
27 Ngavhe zwi tshi u takadza u fhaṱutshedza nnḓu ya mushumeli wau, i dzule i phanḓa hau tshifhinga tshoṱhe; ngauri Iwe Yehova wo i fhaṱutshedza, yo fhaṱutshedzwa lwa tshoṱhe.”
Ṱhaluso dzi re magumoni a siaṱari
^ Kana “pfamoni.”
^ Thevhedz., “mbeu.”
^ Kana “muthu wa vhuimo ha nṱha.”
^ Kana “ḽi tshi fhulufhedzea.”
