Bugu Ya U Thoma Ya Koronika 18:1-17
18 Nga murahu, Davida a kunda Vhafilisita, a vha langa, a dzhiela Vhafilisita+ shango ḽa Gathi+ na miḓana ya nga tsini.*
2 A kunda Moaba,+ Vhamoaba vha vha vhashumeli vha Davida, vha mu ḓisela nduvho.+
3 Davida a kunda Hadadesere+ khosi ya Tsoba+ tsini na Hamathi+ musi a tshi khou ya u khwaṱhisa vhuhosi hawe ngei Mulamboni wa Yufuratha.+
4 Davida a thuba gariki dza 1 000, vhaṋameli vha bere vha 7 000, maswole a 20 000.+ Davida a huvhadza bere dzoṱhe a sia dza 100 fhedzi dzi kokodzaho gariki.+
5 Musi Vhasiria vha Damaseko vha tshi swika uri vha thuse Hadadesere khosi ya Tsoba, Davida a vhulaya Vhasiria vha 22 000.+
6 Davida a vhea tshigwada tsha maswole ngei Siria kha ḽa Damaseko; Vhasiria vha vha vhashumeli vha Davida, vha mu ḓisela nduvho. Yehova a ita uri Davida a kunde hoṱhe he a ya.+
7 Davida a dzhia zwiṱangu zwa musuku kha vhashumeli vha Hadadesere, a zwi isa Yerusalema.
8 Davida a dzhia koporo nnzhi ngei Thibehathi na Kuni miḓini ya Hadadesere. Salomo a i shumisa u ita sambelo ḽihulu ḽa koporo ḽi vhidzwaho Lwanzhe,+ phuphu na thundu dza koporo.+
9 Musi Thou khosi ya Hamathi a tshi pfa uri Davida o kunda mmbi yoṱhe ya Hadadesere+ khosi ya Tsoba,+
10 a ṱavhanya a rumela murwa wawe Hadoramu kha Khosi Davida uri a mu vhudzise mutakalo na u mu fhululedza ngauri o vha o lwa a kunda Hadadesere (ngauri Hadadesere o vha a tshi dzulela u lwa na Thou), a ḓisa madzanga a siḽiva, a musuku na a koporo.
11 Khosi Davida a ṋekedza Yehova+ eneo madzanga na siḽiva na musuku zwe a zwi dzhia kha lushaka lwa: Edomo na Moaba, kha Vhaamoni,+ Vhafilisita+ na Vhaamaleke.+
12 Abishai+ murwa wa Tseruya+ a vhulaya Vhaedomo vha 18 000 Govhani ḽa Muṋo.+
13 A vhea tshigwada tsha maswole ngei Edomo, Vhaedomo vhoṱhe vha vha vhashumeli vha Davida.+ Yehova a ita uri Davida a kunde hoṱhe he a ya.+
14 Davida a bvela phanḓa a tshi vhusa ḽoṱhe ḽa Isiraele;+ Davida o vha a tshi sumbedza vhathu vhawe vhoṱhe khaṱhulo yo teaho na u luga.+
15 Yoaba murwa wa Tseruya o vha e mulangammbi,+ Yehoshafati+ murwa wa Alihudu o vha e muvhulungi wa maṅwalo,
16 Tsadoko murwa wa Ahitobo na Ahimeleke murwa wa Abiathara vho vha vhe vhotshifhe, Shausa o vha e muṅwaleli.
17 Benaya murwa wa Yehoyada o vha a tshi langa Vhakireti+ na Vhapelethi.+ Vharwa vha Davida vho vha vhe vhaḓinḓa vhahulwane.
Ṱhaluso dzi re magumoni a siaṱari
^ Kana “yo ḽi tangaho.”
