Bugu Ya U Thoma Ya Koronika 19:1-19
19 Nga murahu Nahasi khosi ya Vhaamoni a fa, murwa wawe a vha khosi vhudzuloni hawe.+
2 Davida a ri: “Hanunu murwa wa Nahasi ndi ḓo mu sumbedza lufuno lu sa shanduki,+ ngauri khotsi awe o ntsumbedza lufuno lu sa shanduki.” Ngauralo, Davida a ruma vhashumeli vhawe uri vha ye u mu khuthadza nge a vha o felwa nga khotsi awe. Musi vhashumeli vha Davida vha tshi swika shangoni ḽa Vhaamoni+ uri vha khuthadze Hanunu,
3 vhakololo vha Vhaamoni vha amba na Hanunu vha ri: “Naa u vhona u nga Davida u khou hulisa khotsi au nge a rumela vhakhuthadzi kha iwe? Naa Davida ho ngo rumela vhashumeli vhawe uri vha ḓe kha iwe uri vha tandule shango, na u ḽi ṱola uri vha ḽi thube?”
4 Hanunu a fara vhashumeli vha Davida a vha vheula ndebvu,+ a gera zwiambaro zwavho u swika nga fhasi ha khundu, a vha litsha vha ṱuwa.
5 Musi Davida a tshi vhudzwa zwo itwaho avho vhanna, a rumela vhashumeli vhawe uri vha ye vha vha ṱanganedze, ngauri vhenevho vhanna vho vha vho shoniswa zwihulu; khosi ya vha vhudza uri: “Dzulani Yeriko+ u swika ndebvu dzaṋu dzi tshi dovha dza mela, ni kone u vhuya.”
6 Nga u ya ha tshifhinga Vhaamoni vha vhona uri vha vho vhengwa nga Davida, Hanunu na Vhaamoni vha rumela talente* dza 1 000 dza siḽiva uri vha hire gariki na vhaṋameli vha bere vha bvaho Mesopotamia,* Aramu-maakha na Tsoba.+
7 Vha hira gariki dza 32 000, khathihi na khosi Maaka na vhathu vhawe. Vha ḓa vha atha madennde phanḓa ha Medeba.+ Vhaamoni vha kuvhangana miḓini yavho, vha bva uri vha lwe.
8 Musi Davida a tshi zwi pfa, a rumela Yoaba+ na mmbi yawe yoṱhe na vhahali vhawe.+
9 Vhaamoni vha bva vha ima vho ḓilugiselela u lwa khoroni ya muḓi, ngeno mahosi e a vha o ḓa o ima e oṱhe mudavhini.
10 Musi Yoaba a tshi vhona uri mmbi yo vha i tshi khou ḓa u lwa nae i nga phanḓa na nga murahu, a nanga maṅwe maswole a vhahali kha ḽa Isiraele, a a vhea uri a ḓilugiselele u lwa na Vhasiria.+
11 A vhea vhaṅwe vhanna vhoṱhe nga fhasi ha Abishai+ murathu wawe, uri vha ime vho ḓilugiselela u lwa na Vhaamoni.
12 A ri: “Arali Vhasiria+ vha vha na maanḓa u mphira, u ḓe u nndamulele; fhedzi arali Vhaamoni vha vha na maanḓa u u fhira, ndi ḓo ḓa nda u lamulela.
13 Ri tea u ḓikhwaṱhisa na u vha na tshivhindi+ ri tshi itela vhathu vha hashu na miḓi ya Mudzimu washu; Yehova u ḓo ita zwine a vhona zwo tea.”
14 Yoaba na vhanna vhe a vha e navho vha ya u lwa na Vhasiria, vha mu shavha.+
15 Musi Vhaamoni vha tshi vhona Vhasiria vho shavha, na vhone vha shavha murathu wawe Abishai vha dzhena muḓini. Nga murahu ha zwenezwo, Yoaba a humela Yerusalema.
16 Musi Vhasiria vha tshi vhona uri vho kundwa nga Vhaisiraele, vha rumela vhaḓinḓa uri vha vhidze Vhasiria vhane vha dzula seli ha Mulambo,*+ vho rangwa phanḓa nga Shofaka mulangammbi wa Hadadesere.+
17 Musi Davida a tshi vhudzwa, a ṱavhanya a kuvhanganya Vhaisiraele vhoṱhe, vha wela Mulambo wa Yorodane vha ya vha lwa navho. Davida a ima o ḓilugiselela u lwa na Vhasiria, vha lwa nae.+
18 Fhedzi Vhasiria vha shavha Vhaisiraele; Davida a vhulaya vhatshimbidzi vha gariki vha 7 000 na maswole a 40 000 a Vhasiria, a vhulaya Shofaka mulangammbi.
19 Musi vhashumeli vha Hadadesere vha tshi vhona uri vho kundwa nga Vhaisiraele,+ vha ṱavhanya vha pfumedzana na Davida, vha vha vhashumeli vhawe;+ Vhasiria vha si tsha ṱoḓa u thusa Vhaamoni.
Ṱhaluso dzi re magumoni a siaṱari
^ Talente i lingana na khilogramu dza 34,2. Sedzani Ṱhume. B14.
^ Thevhedz., “Aramu-naharaimi.”
^ Ndi Yufuratha.
