Bugu Ya U Thoma Ya Koronika 20:1-8
20 Mathomoni a ṅwaha musi mahosi a tshi ya nndwani, Yoaba+ a ranga phanḓa mmbi a tshinyadza shango ḽa Vhaamoni; a tanga muḓi wa Raba,+ ngeno Davida o sala Yerusalema.+ Yoaba a lwa na muḓi wa Raba a u fhelisa.+
2 Davida a bvula khare ye ya vha i ṱhohoni ya Malikamu* a wana uri tshileme tshayo tsho vha tshi tshi lingana na talente* ya musuku, khathihi na matombo a mutengo muhulu; ya vhewa kha ṱhoho ya Davida. A dovha a thuba na thundu nnzhi kha wonoyo muḓi.+
3 A bvisa vhathu vha re henefho muḓini a vha shumisa+ u vhaḓa matombo nga zwishumiswa zwa tsimbi zwa vhuhali na nga mbaḓo. Ndi zwe a ita miḓini yoṱhe ya Vhaamoni. Mafheleloni Davida na maswole awe oṱhe vha vhuyelela Yerusalema.
4 Ha dovha ha vuwa iṅwe nndwa na Vhafilisita ngei Gesere. Nga tshenetsho tshifhinga, Sibekai+ wa Muhusha a vhulaya Sipai, we a vha e muḓuhulu wa Vharefaimi,+ vha vha kunda.
5 Ha dovha ha vuwa nndwa na Vhafilisita, na Elihanani murwa wa Yairi a vhulaya Lahemi murathu wa Goliata+ wa Mugathi, we thanda ya pfumo ḽawe ya vha i ndenya i tshi nga thanda ya vhaluki.+
6 Ha dovha ha vuwa nndwa ngei Gathi,+ henefho ho vha hu na munna mulapfu-lapfu,+ e na minwe ya 6 kha zwanḓa zwawe zwoṱhe na zwikunwane zwa 6 kha milenzhe yawe yoṱhe, zwoṱhe zwo ṱangana zwo vha zwi 24; na ene o vha e muḓuhulu wa Vharefaimi.+
7 Onoyo munna a goḓa+ Vhaisiraele. Mafheleloni Yonathani murwa wa Shimea,+ mukomana wa Davida, a mu vhulaya.
8 Vhenevho vho vha vhe vhaḓuhulu vha Vharefaimi+ vha ngei Gathi,+ vho vhulawa nga Davida na vhashumeli vhawe.
Ṱhaluso dzi re magumoni a siaṱari
^ Khamusi ndi mudzimu wa tshifanyiso wa Vhaamoni, huṅwe u vhidzwa Molexo kana Milikomo.
^ Talente i lingana na khilogramu dzi ṱoḓaho u vha 34,2. Sedzani Ṱhume. B14.
