Bugu Ya U Thoma Ya Koronika 21:1-30
21 Saṱhane* a vutshela Vhaisiraele, a ṱuṱuwedza Davida uri a vhale Vhaisiraele.+
2 Ngauralo, Davida a amba na Yoaba+ na vharangaphanḓa vha vhathu a ri: “Iyani ni vhale Vhaisiraele u bva Dani;+ no no fhedza ni ḓe ni mmbudze uri ndi ḓivhe uri ndi vhangana.”
3 Fhedzi Yoaba a amba na khosi a ri: “Ngavhe Yehova a tshi ita uri vhathu vhawe vha ande kaḓana! Thovhela muṋe wanga, naa a vha vhathu vhoṱhe a si vhalanda vha muṋe wanga? Ndi ngani muṋe wanga a tshi khou ṱoḓa u ita zwithu zwo raloho? Ndi ngani muṋe wanga a tshi ṱoḓa u hwesa Vhaisiraele mulandu?”
4 Fhedzi khosi i si thetshelese zwe Yoaba a zwi amba. Ngauralo, Yoaba a ṱuwa a tshimbila na ḽoṱhe ḽa Isiraele, a dovha a vhuya Yerusalema.+
5 Yoaba a ṋea Davida tshivhalo tsha vhathu vhe vha ḓiṅwalisa. Vhaisiraele vhoṱhe vha faraho mabanga vho vha vhe 1 100 000, vhanna vha Yuda vha faraho mabanga vho vha vhe 470 000.+
6 Fhedzi Vhalevi na Vhabenyamini vho vha vha songo ṅwaliswa,+ ngauri Yoaba o vha a sa funi zwe khosi ya zwi amba.+
7 Eneo mafhungo o vha a sa takadzi Mudzimu wa ngoho, ngauralo a vhulaya Vhaisiraele.
8 Davida a amba na Mudzimu wa ngoho a ri: “Ndo tshinya+ zwihulu nga zwe nda ita. Ndi humbela uri u hangwele mushumeli wau vhukhakhi hawe,+ ngauri ndo ita zwa vhutsilu.”+
9 Yehova o vha o no amba na Gada+ ane a vha muvhoni wa Davida, a ri:
10 “Tshimbila u ye u ambe na Davida uri, ‘Yehova o ri: “Ndi khou u ṋea zwithu zwiraru zwine wa fanela u nanga khazwo. Nanga tshithihi tshine nda fanela u u ḓisela tshone.”’”
11 Gada a ḓa kha Davida a ri: “Yehova o ri, ‘Nanga
12 uri hu vhe na nḓala miṅwaha miraru,+ kana u pandamedzwa nga maswina au miṅwedzi miraru,+ kana uri Yehova a u ḓisele banga ḽawe na dwadze shangoni lwa maḓuvha mararu,+ muruṅwa wa Yehova a fhelise+ vhathu vhoṱhe vha Isiraele.’ Elekanya zwavhuḓi nga ha zwine nda tea u fhindula We a nthuma.”
13 Ngauralo, Davida a fhindula Gada a ri: “Zwi khou ntsikeledza vhukuma. Ndi humbela u wela zwanḓani zwa Yehova, ngauri u a khathutshela zwihulu;+ fhedzi u songo nnditsha ndi tshi wela zwanḓani zwa vhathu.”+
14 Yehova a ḓisa dwadze+ kha Vhaisiraele, lwe ha fa vhathu vha 70 000.+
15 Zwiṅwe hafhu, Mudzimu wa ngoho a ruma muruṅwa uri a fhelise Yerusalema; fhedzi musi a tshi khou ṱoḓa u u fhelisa, Yehova a ḓisola nga iyo khombo,+ a amba na muruṅwa we a vha a tshi khou fhelisa vhathu a ri: “Zwo eḓana!+ Humisa tshanḓa tshau.” Muruṅwa wa Yehova o vha e tsini na fhethu hune ha fhefherwa hone* ha Oronani+ wa Muyebusi.+
16 Musi Davida a tshi lavhelesa a vhona muruṅwa wa Yehova o ima vhukati ha ḽifhasi na ḽiṱaḓulu o fara banga+ ḽo sumba thungo ya Yerusalema. Davida na vhahulwane vha losha vho kwatamisa zwifhaṱuwo+ vho ambara madzanganda.+
17 Davida a amba na Mudzimu wa ngoho a ri: “Ndi nṋe we nda ri vhathu vha vhaliwe. Ndi nṋe we nda tshinya, ndi nṋe ndo khakhaho;+ fhedzi idzi nngu dzo ita mini? Iwe Yehova Mudzimu wanga, ndi humbela uri tshanḓa tshau tshi ḓe kha nṋe na vha nnḓu ya khotsi anga; fhedzi u songo ḓisela vhathu vhau heḽi dwadze.”+
18 Muruṅwa wa Yehova a vhudza Gada+ uri a ambe na Davida uri a gonye a ye u fhaṱela Yehova aḽeṱare fhethu hune ha fhefherwa hone* ha Oronani wa Muyebusi.+
19 Davida a gonya a tshi tevhedza zwe Yehova a mu laya a tshi shumisa Gada.
20 Nga tshenetsho tshifhinga, Oronani a rembuluwa a vhona muruṅwa, ene na vharwa vhawe vhaṋa vha dzumbana. Oronani o vha a tshi khou fhula goroi.
21 Musi Davida a tshi swika khae, Oronani a tshi lavhelesa a vhona Davida, a ṱavhanya a bva fhethu hune ha fhefherwa hone* a gwadama phanḓa ha Davida o kwatamisa tshifhaṱuwo.
22 Davida a amba na Oronani a ri: “Nthengisele fhethu ha u fhefherela hone,* uri ndi fhaṱele Yehova aḽeṱare henefho. Nthengisele nga mutengo wo fhelelaho, uri dwadze ḽe ḽa fara vhathu ḽi fhele.”+
23 Fhedzi Oronani a amba na Davida a ri: “Thovhela muṋe wanga nga a dzhie fhethu ha u fhefherela a ṋekedze zwine a vhona zwi zwavhuḓi.* Kholomo dza tshifhiwa tsha u fhiswa na tshiḽei+ tsha u fhula khezwi na dzhogo khedzi dzine wa ḓo ita ngadzo khuni na goroi ya tshifhiwa tsha thoro. Zwoṱhe hezwi ndi ḓo u ṋea zwone.”
24 Naho zwo ralo, Khosi Davida a amba na Oronani a ri: “Aiwa, ndi ḓo tou hu renga nga mutengo wo fhelelaho, ngauri ndi nga si ṋekedze Yehova zwiṱhavhelo zwa u fhiswa zwe nda si zwi bvisele tshithu.”+
25 Ngauralo, Davida a ṋea Oronani shekele* dza 600 dza musuku nga muelo wo linganaho henefho fhethu.
26 Davida a fhaṱela Yehova aḽeṱare+ henefho, a ṋekedza zwiṱhavhelo zwa u fhiswa na zwiṱhavhelo zwa u pfumedzana, a vhidzelela Yehova, a mu fhindula nga u ḓisa mulilo+ u bvaho ṱaḓulu wa wela kha aḽeṱare ya tshifhiwa tsha u fhiswa.
27 Yehova a amba na muruṅwa+ uri a vhuyedzedze banga tshipatshini tshaḽo.
28 Nga tshenetsho tshifhinga, musi Davida a tshi vhona uri Yehova o mu fhindula e fhethu hune ha fhefherwa hone* ha Oronani wa Muyebusi, a bvela phanḓa a tshi ṋekedza zwiṱhavhelo henefho.
29 Naho zwo ralo, dennde ḽikhethwa* ḽa Yehova ḽe Mushe a ḽi ita ngei sogani na aḽeṱare ya tshifhiwa tsha u fhiswa nga tshenetsho tshifhinga zwo vha zwi fhethu ha vhurabeli ngei Gibeoni.+
30 Fhedzi Davida o vha a sa koni u ya phanḓa hayo u itela u vhudzisa Mudzimu, ngauri o vha a tshi ofha banga ḽa muruṅwa wa Yehova.
Ṱhaluso dzi re magumoni a siaṱari
^ Kana khamusi, “Muhanedzi.”
^ Kana “luvhatani.”
^ Kana “luvhatani.”
^ Kana “luvhatani.”
^ Kana “luvhata.”
^ Thevhedz., “zwine a vhona zwo luga maṱoni awe.”
^ Shekele nthihi i lemela gramu dza 11,4. Sedzani Ṱhume. B14.
^ Kana “luvhatani.”
^ “Ndi dennde ḽa vhurabeli ḽine ḽa hwalea ḽe ḽa vha ḽi tshi shumiswa nga Vhaisiraele; nga zwiṅwe zwifhinga ḽo vha ḽi tshi vhidzwa ‘dennde ḽa muṱangano.’”
