Bugu Ya U Thoma Ya Koronika 22:1-19
22 Davida a ri: “Heyi ndi nnḓu ya Yehova Mudzimu wa ngoho, heyi ndi aḽeṱare ya tshifhiwa tsha u fhiswa tsha Isiraele.”+
2 Davida a laedza uri hu kuvhanganywe vhatsinda+ vha re shangoni ḽa Isiraele, a vha ṋea mushumo wa u vhaḓa matombo a u fhaṱa nnḓu ya Mudzimu wa ngoho.+
3 Davida a dovha a lugiselela tsimbi nnzhi dza u ita zwibigiri zwa mavothi a dzikhoro na zwa mikungelo na koporo nnzhi ye ya vha i sa kalei,+
4 na matanda manzhi a muṱaululo+ a sa vhalei, ngauri Vhasidoni+ na Vhatiro+ vho vha vho ḓisa matanda manzhi a muṱaululo ha Davida.
5 Davida a ri: “Murwa wanga Salomo u tshee muṱuku ha na tshenzhelo,*+ nnḓu ine ya ḓo fhaṱelwa Yehova i fanela u vha yo nakaho vhukuma,+ uri bvumo+ ḽayo ḽi ḓivhiwe mashangoni oṱhe.+ Ngauralo, a mu lugiselela zwa u fhaṱa.” Davida a lugiselela zwishumiswa zwinzhi a sa athu u fa.
6 Zwiṅwe hafhu, a vhidza Salomo murwa wawe a mu laya uri a fhaṱele Yehova Mudzimu wa Isiraele nnḓu.
7 Davida a vhudza murwa wawe Salomo a ri: “Lwo vha lu lutamo lwanga uri ndi fhaṱele dzina ḽa Yehova Mudzimu wanga nnḓu.+
8 Fhedzi ipfi ḽa Yehova ḽo ḓa kha nṋe ḽa ri: ‘Wo shulula malofha manzhi, wo lwa nndwa nnzhi. A u nga ḓo fhaṱela dzina ḽanga nnḓu,+ ngauri wo shululesa malofha manzhi kha ḽifhasi ndi tshi zwi vhona.
9 Iwe u ḓo bebelwa murwa+ ane a ḓo vha munna wa mulalo,* ndi ḓo mu awedza kha maswina awe oṱhe o mu tangaho,+ u ḓo pfi Salomo,*+ ndi ḓo ita uri Isiraele hu vhe na mulalo na vhudziki misini yawe.+
10 Ndi ene ane a ḓo fhaṱela dzina ḽanga nnḓu.+ Onoyo u ḓo vha murwa wanga, nṋe nda vha khotsi awe.+ Ndi ḓo khwaṱhisa khuluṋoni yawe lini na lini.’+
11 “Murwa wanga, ngavhe Yehova a tshi vha na iwe, u bvelele kha u fhaṱa nnḓu ya Yehova Mudzimu wau, samusi o amba nga u ralo nga ha iwe.+
12 Ngavhe Yehova a tshi u ṋea vhuṱali na ṱhalukanyo+ musi a tshi u ṋea maanḓa a u vhusa Isiraele, uri u tevhedze mulayo wa Yehova Mudzimu wau.+
13 U ḓo bvelela arali wa tevhedza maitele+ na khaṱhulo dze Yehova a dzi ṋea Mushe uri a dzi ṋee Vhaisiraele.+ U vhe na tshivhindi na maanḓa. U songo ofha kana u tshuwa.+
14 Ndo tambula vhukuma ndi tshi khou lugiselela nnḓu ya Yehova talente dza 100 000 dza musuku na talente* dza 1 000 000 dza siḽiva na koporo nnzhi na tsimbi+ nnzhi i sa vhalei, nda lugiselela matanda na matombo,+ fhedzi iwe u ḓo dovha wa engedza kha zwenezwo.
15 Iwe u na vhashumi vhanzhi vhane vha vha vhavhaḓi vha matombo, vhatsheṱi vha matombo,+ vhavhaḓi vha mabulannga na vhashumi vha mifuda yoṱhe vha re na vhutsila.+
16 Musuku, siḽiva, koporo na tsimbi ndi zwinzhi vhukuma.+ Takuwa u thome mushumo, ngavhe Yehova a tshi vha na iwe.”+
17 Davida a laya vhakololo vhoṱhe vha Isiraele uri vha thuse murwa wawe Salomo a ri:
18 “Naa Yehova Mudzimu waṋu ha na inwi, ho ngo ni ṋea mulalo thungo dzoṱhe? Ngauri o nkumedzela vhadzulapo vha ḽeneḽo shango, shango ḽa kundwa phanḓa ha Yehova na vhathu vhawe.
19 Zwino ḓiimiseleni nga mbilu yaṋu yoṱhe na zwoṱhe zwine na vha zwone uri ni ṱoḓe Yehova Mudzimu waṋu,+ ni thome u fhaṱa nnḓu khethwa ya Yehova Mudzimu wa ngoho,+ uri ni kone u dzhenisa mbulungelo ya Yehova na thundu khethwa dza Mudzimu wa ngoho+ nḓuni yo fhaṱelwaho dzina ḽa Yehova.”+
Ṱhaluso dzi re magumoni a siaṱari
^ Kana “u kha ḓi vha mutete.”
^ Ḽi bva kha ipfi ḽa Tshihevheru ḽine ḽa amba “Mulalo.”
^ Thevhedz., “vhudziki.”
^ Talente i lingana na khilogramu dza 34,2. Sedzani Ṱhume. B14.
