Bugu Ya U Thoma Ya Koronika 23:1-32
23 Musi Davida o no kalaha e tsini na u fa, a vhea murwa wawe Salomo uri a vhe khosi ya Isiraele.+
2 A kuvhanganya vhakololo vhoṱhe vha Isiraele, vhotshifhe+ na Vhalevi.+
3 Ha vhalwa Vhalevi vha re na miṅwaha ya 30 u ya nṱha;+ tshivhalo tsha vhanna tsho vha tshi 38 000.
4 Kha vhenevho vhanna, vha 24 000 vho vha vha tshi lavhelesa mushumo wa nḓuni ya Yehova, ho vha hu na vhaḓinḓa na vhahaṱuli+ vha 6 000
5 na vhalindakhoro+ vha 4 000, vha 4 000 vho renda+ Yehova nga zwilidzo zwe Davida a amba nga hazwo a ri: “Ndo zwi ita uri ndi rende Mudzimu.”
6 Davida a dzudzanya* vharwa vha Levi u ya nga zwigwada:+ Gerisoni, Kehati na Merari.+
7 Kha Vhagerisoni ho vha hu na Ladani na Shimei.
8 Vharwa vha Ladani vho vha vhe vhararu, vho vha vhe Yehiele we a vha e murangaphanḓa, Sethamu na Yoele.+
9 Vharwa vha Shimei vho vha vhe vhararu, vho vha vhe Shelomothi, Hasiele na Harani. Ndi vhone vharangaphanḓa vha miṱa ya vhokhotsi vha Ladani.
10 Vharwa vha Shimei vho vha vhe Yahathi, Sina, Yeushi na Beria. Vhenevha vhaṋa vho vha vhe vharwa vha Shimei.
11 Yahathi o vha e ene murangaphanḓa, a tevhelwa nga Tsisa. Samusi Yeushi na Beria vho vha vhe si na vharwa vhanzhi, vho vhalwa sa nnḓu nthihi ya vhokhotsi ye ya vha i na vhuḓifhinduleli fhethu huthihi.
12 Vharwa vha Kehati vho vha vhe vhaṋa, vho vha vhe Amuramu, Isara,+ Heburoni na Usiele.+
13 Vharwa vha Amuramu vho vha vhe Aroni+ na Mushe.+ Fhedzi Aroni na vharwa vhawe vho vha vho khethelwa thungo+ uri vha ite uri fhethu Hukhethwa-khethwa hu vhe hukhethwa lwa tshoṱhe, uri vha ṋekedze zwiṱhavhelo phanḓa ha Yehova, u mu shumela na u fhaṱutshedza dzinani ḽawe misi yoṱhe.+
14 Ngeno vharwa vha Mushe mushumeli wa Mudzimu wa ngoho, vho vhalwa vhukati ha lushaka lwa Vhalevi.
15 Vharwa vha Mushe vho vha vhe Gerisomi+ na Eliesere.+
16 Kha vharwa vha Gerisomi, Shebuele+ o vha e murangaphanḓa.
17 Kha vhaḓuhulu* vha Eliesere, Rehabia+ o vha e murangaphanḓa; Eliesere o vha a si na vhaṅwe vharwa, fhedzi vharwa vha Rehabia vho vha vhe vhanzhi vhukuma.
18 Kha vharwa vha Isara,+ Selomithi+ o vha e murangaphanḓa.
19 Vharwa vha Heburoni vho vha vhe Yeriya we a vha e murangaphanḓa, wa vhuvhili o vha e Amaria, wa vhuraru o vha e Yahasiele, wa vhuṋa o vha e Yekameamu.+
20 Vharwa vha Usiele+ vho vha vhe Mika we a vha e murangaphanḓa, wa vhuvhili o vha e Yesia.
21 Vharwa vha Merari vho vha vhe Mahali na Mushi.+ Vharwa vha Mahali vho vha vhe Eliasara na Kishi.
22 Eliasara a fa a si na vharwa, fhedzi o vha e na vhananyana. Vha vhingwa nga vharwa vha Kishi na mashaka avho.*
23 Vharwa vha Mushi vho vha vhe vhararu, hu Mahali, Edere na Yeremothe.
24 Vhenevho ndi vharwa vha Levi u ya nga miṱa ya vhokhotsi avho na nga vharangaphanḓa vha miṱa ya vhokhotsi, vhe vha ṅwaliswa vha vhalwa na u ṅwaliwa madzina avho, vha shumaho nḓuni ya Yehova, vhe na miṅwaha ya 20 u ya nṱha.
25 Ngauri Davida o ri: “Yehova Mudzimu wa Isiraele o awedza vhathu vhawe,+ u ḓo dzula Yerusalema lini na lini.+
26 Na Vhalevi a vha nga ḓo hwala dennde ḽikhethwa* kana zwishumiswa zwaḽo zwine zwa shumiswa vhurabelini.”+
27 Ngauri u ya nga ndaela dza u fhedza dza Davida, ho vhalwa Vhalevi vha re na miṅwaha ya 20 u ya nṱha.
28 Mushumo wavho wo vha u wa u thusa vharwa vha Aroni+ kha mushumo wa nḓuni ya Yehova, u ṱhogomela miṱa,+ kamara dza u ḽela, u kunakiswa ha tshithu tshiṅwe na tshiṅwe tshikhethwa na mushumo naho u ufhio we wa vha u tshi ṱoḓea nḓuni ya Mudzimu wa ngoho.
29 Vho vha vha tshi thusa nga vhurotho ha ṱano,+ fuḽauru tsekene ya tshifhiwa tsha thoro, makokisi a vhurotho vhu si na mbiliso,+ khekhe dzi bakwaho panini, suko ḽa fuḽauru+ na u kala zwithu zwoṱhe.
30 Vho vha vha tshi ima nga matsheloni+ maṅwe na maṅwe u itela u livhuwa na u renda Yehova, vho vha vha tshi ita zwenezwo na nga madekwana.+
31 Vho vha vha tshi thusa musi hu tshi ṋekedzwa Yehova zwiṱhavhelo zwa u fhiswa nga Dzisavhatha,+ nga ṅwedzi muswa+ na nga zwifhinga zwa vhuṱambo,+ tshifhinga tshoṱhe phanḓa ha Yehova, u ya nga tshivhalo tshine tsha ṱoḓea u ya nga milayo yavho.
32 Vho vha vha tshi ṱhogomela vhuḓifhinduleli havho ha denndeni ḽa muṱangano, fhethu hukhethwa na vhahavho vhane vha vha vharwa vha Aroni kha mushumo wa nḓuni ya Yehova.
Ṱhaluso dzi re magumoni a siaṱari
^ Kana “khethekanya.”
^ Thevhedz., “vharwa.”
^ Thevhedz., “vhahavho.”
^ “Ndi dennde ḽa vhurabeli ḽine ḽa hwalea ḽe ḽa vha ḽi tshi shumiswa nga Vhaisiraele; nga zwiṅwe zwifhinga ḽo vha ḽi tshi vhidzwa ‘dennde ḽa muṱangano.’”
