Bugu Ya U Thoma Ya Koronika 27:1-34
-
Vhaḓinḓa vhane vha shumela khosi (1-34)
27 Tshivhalo tsha Vhaisiraele ndi hetshi, vharangaphanḓa vha miṱa ya vhokhotsi, vhane vha ranga phanḓa vha zwigidi na vha maḓana+ na vhaḓinḓa vhavho vha shumelaho khosi+ kha mafhungo oṱhe a zwigwada zwe zwa vha zwi tshi tou sielisana ṅwedzi muṅwe na muṅwe ṅwaha woṱhe; vho vha vhe 24 000 kha tshigwada tshiṅwe na tshiṅwe.
2 We a vha a tshi langa tshigwada tsha u thoma kha ṅwedzi wa u thoma o vha e Yasobeamu+ murwa wa Sabadiele, kha tshigwada tshawe vho vha vhe 24 000.
3 Kha vharwa vha Perese,+ o vha e ene murangaphanḓa wa vharangaphanḓa vhoṱhe vha zwigwada zwo vhewaho uri zwi shume nga ṅwedzi wa u thoma.
4 We a vha a tshi langa tshigwada tsha ṅwedzi wa vhuvhili o vha e Dodai+ wa Muahohi+ na tshigwada tshawe, Mikilothe o vha e ene murangaphanḓa, kha tshigwada tshawe vho vha vhe 24 000.
5 Murangaphanḓa wa tshigwada tsha vhuraru tsho vhewaho uri tshi shume nga ṅwedzi wa vhuraru o vha e Benaya+ murwa wa Yehoyada+ muhulwane wa vhotshifhe, kha tshigwada tshawe vho vha vhe 24 000.
6 Benaya o vha e muhali wa vha furaru,* tshigwada tshawe tsho vha tshi tshi langwa nga murwa wawe Amisabada.
7 Murangaphanḓa wa tshigwada tsha vhuṋa tsha ṅwedzi wa vhuṋa o vha e Asahele,+ murathu wa Yoaba,+ a tevhelwa nga murwa wawe Sebadiya, kha tshigwada tshawe vho vha vhe 24 000.
8 Murangaphanḓa wa tshigwada tsha vhuṱanu tsha ṅwedzi wa vhuṱanu o vha e Shamuhuthu wa Muisira, kha tshigwada tshawe vho vha vhe 24 000.
9 Murangaphanḓa wa tshigwada tsha ṅwedzi wa vhurathi o vha e Ira+ ṅwana wa Ikeshe wa Muthekoa,+ kha tshigwada tshawe vho vha vhe 24 000.
10 Murangaphanḓa wa tshigwada tsha vhusumbe tsha ṅwedzi wa vhusumbe o vha e Heletse+ wa Mupeloni wa Vhaefuraimi, kha tshigwada tshawe vho vha vhe 24 000.
11 Murangaphanḓa wa tshigwada tsha vhumalo tsha ṅwedzi wa vhumalo o vha e Sibekai+ wa Muhusha wa Vhazera,+ kha tshigwada tshawe vho vha vhe 24 000.
12 Murangaphanḓa wa tshigwada tsha vhuṱahe tsha ṅwedzi wa vhuṱahe o vha e Abiesere+ wa Muanathothe+ wa Vhabenyamini, kha tshigwada tshawe vho vha vhe 24 000.
13 Murangaphanḓa wa tshigwada tsha vhufumi tsha ṅwedzi wa vhufumi o vha e Mahari+ wa Munetofa wa Vhazera,+ kha tshigwada tshawe vho vha vhe 24 000.
14 Murangaphanḓa wa tshigwada tsha vhu 11 tsha ṅwedzi wa vhu 11 o vha e Benaya+ wa Muphirathoni wa vharwa vha Efuraimi, kha tshigwada tshawe vho vha vhe 24 000.
15 Murangaphanḓa wa tshigwada tsha vhu 12 tsha ṅwedzi wa vhu 12 o vha e Heledai wa Munetofa, wa Vhaothiniele, kha tshigwada tshawe vho vha vhe 24 000.
16 Vharangaphanḓa vha tshaka dza Isiraele ndi havha: Kha Vharubeni, Eliesere murwa wa Sikiri o vha e murangaphanḓa; kha Vhasimioni o vha e Shefatia murwa wa Maaka;
17 kha Levi o vha e Hasabia murwa wa Kemuele; kha Aroni o vha e Tsadoko;
18 kha Yuda o vha e Elihu,+ muṅwe wa vhakomana vha Davida; kha Isashari o vha e Omiri murwa wa Mikaele;
19 kha Sebuloni o vha e Yisimaya murwa wa Obadia; kha Nafutali o vha e Yerimothe murwa wa Aziriele;
20 kha Efuraimi o vha e Hoshea murwa wa Azasia; kha hafu ya lushaka lwa Manase o vha e Yoele murwa wa Pedaya;
21 kha hafu ya lushaka lwa Manase ngei Giḽiada o vha e Ido murwa wa Sakaria; kha Benyamini o vha e Yaasiele murwa wa Abinere;+
22 kha Dani o vha e Azariele murwa wa Yerohamu. Vhenevho vho vha vhe vhakololo vha tshaka dza Isiraele.
23 Davida ho ngo vhala vha re na miṅwaha ya 20 na vha re nga fhasi ha yeneyo, ngauri Yehova o vha o fhulufhedzisa u ita uri Vhaisiraele vha vhe vhanzhi sa ṋaledzi dza ṱaḓulu.+
24 Yoaba murwa wa Tseruya o vha o no thoma u vhala, fhedzi a si fhedze; Mudzimu a sinyutshela Isiraele nga nṱhani ha zwenezwo,+ tshenetsho tshivhalo tshi si ṅwaliwe kha mafhungo a zwifhingani zwa Khosi Davida.
25 We a vha a tshi langa mbulungelo dza khosi+ o vha e Asimavethe murwa wa Adiele. Yonathani murwa wa Usia o vha a tshi langa maḓulu* a masimuni, a miḓini, a miḓanani na a mitsheṱoni.
26 We a vha a tshi langa vhashumi vha limaho tsimu o vha e Esiri murwa wa Kelubu.
27 Shimei wa Murama o vha a tshi langa masimu a minḓirivhe; Sabadi wa Musifimothe a tshi langa fhethu hune ha vhewa waini.
28 We a vha a tshi langa masimu a miṱwari na miri ya mihuyu+ ngei Shefela+ o vha e Baali-hanana wa Mugedere; we a vha a tshi langa fhethu hune ha vhewa mapfura o vha e Yoasi.
29 We a vha a tshi langa masambi e a vha a tshi fula ngei Sharona+ o vha e Shitarai wa Musharona, Shafati murwa wa Adalai o vha a tshi langa masambi a re govhani.
30 We a vha a tshi langa gamela o vha e Obili wa Muishimaele; we a vha a tshi langa donngi* o vha e Yehedeya wa Mumeroni.
31 We a vha a tshi langa masambi o vha e Yasisi wa Muhagari. Vhenevho vhoṱhe vho vha vhe vharangaphanḓa vhane vha ṱhogomela thundu ya Khosi Davida.
32 Yonathani,+ murwa wa mukomana wa Davida o vha e mueletshedzi, e munna wa u pfesesa, e muṅwaleli. Yehiele murwa wa Hakimoni a tshi ṱhogomela vharwa vha khosi.+
33 Ahitofele+ o vha e mueletshedzi wa khosi, Husai+ wa Muarakiti e khonani ya khosi.
34 Vhaeletshedzi vho tevhelaho Ahitofele vho vha vhe Yehoyada murwa wa Benaya+ na Abiathara;+ Yoaba+ o vha e mulangi wa mmbi ya khosi.
