Vhurifhi Ha U Thoma Ha Petro 1:1-25
1 Nṋe Petro muapostola+ wa Yesu Kristo, ndi ṅwalela inwi vhadzulapo vha tshifhinganyana, no balanganaho kha ḽa Ponto, Galata, Kapadokia,+ Asia na Bithinia.
2 No nangiwa nga Mudzimu Khotsi+ u ya nga zwe a vha o dzula o zwi dzudzanya. O ni ṋea muya mukhethwa+ uri ni vhe vhakhethwa. O ita zwenezwo uri ni mu thetshelese, a ni kunakisa nga malofha a Yesu Kristo.+
Ngavhe Mudzimu a tshi ni sumbedza vhuthu vhuhulu na mulalo zwo engedzeaho.
3 Nga hu rendwe Mudzimu ane a vha Khotsi a Murena washu Yesu Kristo, ngauri o ri khathutshela zwihulu, a ita uri ri dovhe ri bebwe+ uri ri vhe na fhulufhelo ḽa tshoṱhe.+ Ri na ḽeneḽi fhulufhelo ngauri Yesu Kristo o vuswa vhafuni,+
4 uri ri wane ifa ḽi sa sini, ḽi si na tshika na ḽi sa ṱahali.+ No vhetshelwa ḽeneḽo fhulufhelo ṱaḓulu,+
5 inwi vhane na khou tsireledzwa nga maanḓa a Mudzimu ngauri ni na lutendo. Mudzimu u khou ni tsireledza uri ni tshidzwe. Honoho u tshidzwa hu ḓo vhonala tshifhingani tsha vhufhelo.
6 Nga nṱhani ha zwenezwi no takala zwihulu, naho ni tshi nga vha no tsikeledzwa nga milingo yo fhambananaho lwa tshifhinganyana.+
7 Yeneyo milingo yo vha hone uri lutendo lwaṋu lwo lingwaho+ lu ite uri ni rendwe, ni huliswe na u wana vhugala musi Yesu Kristo+ a tshi dzumbululwa. Lwonolwo lutendo ndi lwa ndeme u fhira musuku une wa fhelela naho wo thoma wa fhiswa nga mulilo.
8 Ni a mu funa naho ni sa athu u mu vhona. Naho zwino ni sa mu vhoni, fhedzi ni a tenda khae, ni khou pembela zwihulu nga dakalo ḽi sa ṱalutshedzei.
9 Nga ḽeneḽi dakalo, ni ḓo tshidzwa nga nṱhani ha lutendo lwaṋu.+
10 Vhaporofita vhe vha ḓivhadza vhuthu vhuhulu ha Mudzimu he na ṋewa, vho vhudzisesa na u ṱoḓisisa nga ha honohu u tshidzwa.+
11 Mudzimu o dzula o vha vhudza a tshi shumisa maanḓa* awe uri Kristo u ḓo tambudzwa,+ a kona u huliswa. Ndi ngazwo vho dzula vha tshi ṱoḓa u ḓivha zwine zwa ḓo itea kha Kristo na uri zwi ḓo itea lini.+
12 Mudzimu o dzumbululela vhaporofita uri vha khou shumela inwi, hu si vhone vhaṋe. Vhaporofita vho ṅwala nga ha zwe na ḓivhadzwa, no zwi pfa kha vhe vha huwelela mafhungo maḓifha vha tshi thuswa nga muya mukhethwa u bvaho ṱaḓulu.+ Na vharuṅwa vha tama nga mbilu yoṱhe u ḓivha zwenezwi zwithu.
13 Ngauralo, ḓilugiseleleni u ita mushumo u konḓaho,+ ni dzule no dzivhuluwa tshoṱhe;+ ni lindele vhuthu vhuhulu vhune na ḓo sumbedzwa hone musi Yesu Kristo a tshi dzumbululwa, ni na fhulufhelo ḽo khwaṱhaho.
14 Zwino ni vhana vha Mudzimu vhane vha mu thetshelesa. Ni songo tsha ṱuṱuwedzwa nga nyemulo dze na vha ni nadzo musi ni sa athu u ḓivha tshithu,
15 nṱhani hazwo, ivhani vhakhethwa kha zwoṱhe zwine na ita, samusi we a ni vhidza e Mukhethwa,+
16 ngauri ho ṅwaliwa u pfi: “Ni tea u vha vhakhethwa, ngauri nṋe ndi mukhethwa.”+
17 Arali ni tshi khou humbela zwiṅwe zwithu kha Khotsi ane a haṱula vhoṱhe a sa ṱaluli+ u ya nga mishumo yavho, ni mu ofhe+ ni tshi kha ḓi vha vhadzulapo vha tshifhinganyana.
18 Ngauri ni a zwi ḓivha uri a si siḽiva na musuku zwe zwa ni vhofholola*+ kha kutshilele kwaṋu kwa mahandana kwe na ku wana kha vhomakhulukuku* waṋu.
19 Fhedzi no rengwa nga malofha a ndeme a Kristo,+ ane a nga a ngwana+ i sa solei, i si na vhadzi.+
20 Ndi ngoho uri Mudzimu o mu khetha shango ḽi sa athu u sikwa,+ fhedzi o dzumbululwa vhufheloni ha zwifhinga hu tshi itelwa inwi.+
21 Nga nṱhani hawe, ni tenda Mudzimu+ we a mu vusa vhafuni+ a mu ṋea vhugala,+ uri ni vhe na fhulufhelo na lutendo kha Mudzimu.
22 Funanani zwi tshi bva mbiluni+ samusi no ḓikunakisa nge na thetshelesa ngoho ye ya ita uri hu vhe na lufuno lwa vhukuma lwa murathu na mukomana.+
23 Ngauri no dovha na bebwa+ nga mbeu i sa sini, hu si nga mbeu i sinaho,+ hu tshi shumiswa ipfi ḽa Mudzimu a tshilaho wa lini na lini.+
24 Ngauri “vhathu vhoṱhe vha nga hatsi, vhugala havho hoṱhe vhu nga luvha ḽa tsimuni; hatsi vhu a oma, luvha ḽa fhufhurea,
25 fhedzi zwine Yehova* a amba zwi dzula zwi hone* lini na lini.”+ Zwenezwo zwe a “amba”* ndi mafhungo maḓifha e na ḓivhadzwa one.+
Ṱhaluso dzi re magumoni a siaṱari
^ Kana “muya mukhethwa.”
^ Thevhedz., “rengulula.”
^ Kana “kha masialala.”
^ Kana “fhedzi ipfi ḽa Yehova ḽi dzula ḽi hone.”
^ Kana “Ipfi ḽawe.”
