Vhurifhi Ha U Thoma Ha Petro 2:1-25
2 Laṱani vhuvhi hoṱhe,+ vhufhura, muhoyo, vivho na zwitshele zwoṱhe.
2 U fana na vhana vhane vha kha ḓi bva u bebwa,+ funani mafhi a ipfi ḽa Mudzimu a songo ṱanganyiswaho na tshithu, uri ni aluwe ngao, ni tshidzwe,+
3 ngauri ni a ḓivha uri Murena u na vhuthu.
4 Vhathu vho laṱa ane a vha tombo ḽi tshilaho,+ fhedzi Mudzimu o mu nanga, ndi wa ndeme khae.+ Musi ni tshi mu tenda,
5 inwi vhane na nga matombo a tshilaho, ni vha nnḓu ine ya fhaṱiwa nga muya wa Mudzimu+ uri ni vhe vhotshifhe vhakhethwa, ni kone u ṋekedza zwiṱhavhelo+ zwine Mudzimu a zwi ṱanganedza ni tshi livhiswa nga muya wawe a tshi shumisa Yesu Kristo.+
6 Ngauri kha Luṅwalo hu pfi: “Ndi vhea tombo ḽo nangwaho Tsioni, thikho ya ndeme ya mutheo, ane a ḽi tenda, ha nga shoni.”+
7 Onoyu ndi wa ndeme kha inwi ngauri ni a mu tenda; kha vha sa mu tendi, ho ṅwaliwa u pfi: “Ḽeneḽo tombo ḽe ḽa laṱwa nga vhafhaṱi+ ḽo vha thikho ya tshifhaṱo”+
8 na “tombo ḽi khukhulaho ḽine ḽa ḓo vha khukhula.”+ Vha khukhulwa nge vha si thetshelese ipfi ḽa Mudzimu. Ndi zwine zwa ḓo fhedzisela zwo itea kha vhathu vho raloho.
9 Fhedzi inwi ni “lushaka lwo nangwaho, vhotshifhe vhane vha shuma sa mahosi, lushaka lukhethwa,+ vhathu vho khetheaho,+ uri ni ḓivhadze vhugala fhethu hoṱhe”+ ha We a ni vhidza ni swiswini a ni ṱanganedza tshedzani tshawe tshi mangadzaho.+
10 Ngauri no vha ni si vhathu vha Mudzimu,+ zwino ni vhathu vhawe; no vha ni songo khathutshelwa, zwino no khathutshelwa.+
11 Vhafunwa, ndi a ni ṱuṱuwedza samusi ni vhatsinda na vhadzulapo vha tshifhinganyana,+ uri ni dzule ni tshi iledza nyemulo dza ṋama+ dzine na lwa nadzo.+
12 Dzulani ni tshi ḓifara zwavhuḓi vhukati ha dzitshaka,+ uri musi vha tshi ni pomoka vhuvhi, vha vhone mishumo yaṋu yavhuḓi,+ vha rende Mudzimu musi a tshi ḓa u ṱola.
13 Ḓiṱukufhadzeni kha vhoṱhe vha re na maanḓa ni tshi itela Murena.+ Ni ḓiṱukufhadze na kha khosi+ ngauri i na maanḓa
14 na kha vhavhusi ngauri vho vhewa nga khosi uri vha pfise vhuṱungu vho tshinyaho na u khoḓa vhane vha ita zwivhuya.+
15 Ngauri Mudzimu u funa ni tshi ita zwo lugaho uri ni fhumudze vha si na ṱhalukanyo, vha sa ḓivhi tshithu.+
16 Samusi ni vhathu vho vhofholowaho,+ shumisani yeneyo mbofholowo sa vhalanda vha Mudzimu,+ hu si u itela u dzumba vhuvhi haṋu.+
17 Hulisani vhathu vhoṱhe,+ ni fune vhatendi vhoṱhe,+ ni ofhe Mudzimu,+ ni hulise khosi.+
18 Vhashumeli nga vha ḓiṱukufhadze na u ṱhonifha vhaṋe vhavho vhavhuḓi,+ vha humbulelaho na vhane zwa konḓa u vha takadza.
19 Ngauri Mudzimu u takalela ane a vha na luvalo lwo kunaho phanḓa hawe nge a konḓelela zwi lemelaho* na u tambudzwa zwi songo tea.+
20 U konḓelela u farwa luvhi nge na ita tshivhi zwi ni vhuyedza nga mini?+ Zwi takadzaho Mudzimu ndi musi ni tshi konḓelela u tambudzwa nge na ita zwivhuya.+
21 Ndi zwe na vhidzelwa zwone, ngauri na Kristo o tambudzelwa inwi,+ a ni vhetshela tsumbo ine na tea u i tevhela nga vhuronwane.*+
22 Ho ngo ita tshivhi,+ a ho ngo wanwa vhufhura mulomoni wawe.+
23 Musi a tshi semiwa,+ ho ngo lifhedza.+ A tshi tambudzwa,+ ho ngo shushedza muthu, fhedzi o kumedzela zwoṱhe kha Ane a haṱula+ nga nḓila yo teaho.
24 Ndi ene we a hwala zwivhi zwashu+ nga muvhili wawe musi a tshi ombelwa kha danda,*+ uri a ri vhofholole kha zwivhi zwashu uri ri tshile ro luga. Ngauri “no fhodzwa nga mbonzhe dzawe.”+
25 No vha ni tshi nga nngu dzo xelaho,+ fhedzi zwino no vhuyelela kha ane a lisa+ na u lavhelesa vhutshilo haṋu.
Ṱhaluso dzi re magumoni a siaṱari
^ Kana “vhuṱungu.”
^ Thevhedz., “a ni vhetshela ṋayo dzine na tea u dzi tevhela nga vhuronwane.”
^ Kana “muri.”
