Vhurifhi Ha U Thoma Ha Petro 3:1-22
3 Na inwi vhafumakadzi, ḓiṱukufhadzeni kha vhanna vhaṋu,+ uri arali hu na vhane vha si thetshelese ipfi ḽa Mudzimu, vha kungiwe nga nḓila ine vhafumakadzi vhavho vha ḓifara ngayo, hu songo ambiwa navho,+
2 ngauri vho vhona nḓila yavhuḓi* ine na ḓifara ngayo+ na u ṱhonifha ngayo.
3 Lunako lwaṋu lu songo vhonala nga u luka mavhudzi na u ambara zwithu zwa musuku+ kana zwiambaro zwa maṱeleṱele,
4 fhedzi lu vhonale nga zwine na vha zwone mbiluni. Ndi ngazwo ni tshi fanela u ambara u vuḓa na vhulenda zwi sa ṱahali,+ ndi zwone zwa ndeme phanḓa ha Mudzimu.
5 Ngauri yeneyi ndi nḓila ye vhafumakadzi vhakhethwa vha fhulufhelaho Mudzimu vha ḓinakisa ngayo, vha tshi ḓiṱukufhadza kha vhanna vhavho,
6 samusi na Sara o thetshelesa Abrahamu, a mu vhidza murena.+ Na inwi ni vhana vhawe, tenda na dzula ni tshi ita zwivhuya, ni sa ofhi.+
7 Na inwi vhanna, bvelani phanḓa ni tshi ḓivha khwine vhafumakadzi vhaṋu uri ni kone u dzula navho ni tshi vha humbulela.* Ni vha hulise,+ uri thabelo dzaṋu dzi si thivhelwe, ngauri vha nga mudzio u songo khwaṱhaho, u kwasheaho. Mudzimu u ḓo vha ṋea vhutshilo, samusi na inwi a tshi ḓo ni ṋea vhutshilo+ nga nṱhani ha vhuthu hawe vhuhulu.
8 Tsha u fhedza, noṱhe ni humbule nga nḓila i fanaho,+ ni pfelane vhuṱungu, ni funane sa murathu na mukomana, ni khathutshelane,+ ni ḓiṱukufhadze.+
9 Ni songo lifhedza vhuvhi nga vhuvhi+ kana samba nga samba.+ Nṱhani hazwo, fhaṱutshedzani,+ ngauri no vhidzelwa zwenezwi, uri ni wane phaṱhutshedzo.
10 Ngauri “ane a funa vhutshilo na u tshila tshifhinga tshilapfu o takala, u tea u langa lulimi lwawe uri lu si ambe vhuvhi+ na mulomo wawe uri u si ambe vhufhura.
11 A furalele vhuvhi,+ a ite zwo lugaho;+ a ṱoḓe mulalo, a u tovhole.+
12 Ngauri maṱo a Yehova* a sedza vho lugaho, nḓevhe dzawe dzi thetshelesa zwine vha humbela,+ fhedzi Yehova* u vhenga vhane vha ita vhuvhi.”+
13 Ndi nnyi ane a nga ni vhaisa arali ni tshi ita zwo lugaho nga mbilu yoṱhe?+
14 Ni a takala naho ni tshi tambula nga nṱhani ha u ita zwo lugaho.+ Fhedzi ni songo vhilaela kana u ofha zwine vha ofha.*+
15 Fhedzi itani uri Kristo a vhe mukhethwa mbiluni dzaṋu samusi e Murena, ni dzule no ḓiimisela u fhindula ane a ṱoḓa u ḓivha nga ha zwine na zwi fhulufhela, ni zwi ite no vuḓa+ na nga ṱhonifho khulwane.+
16 Dzulani ni na luvalo lwavhuḓi,+ uri naho vha ni sasaladza, vha shone+ musi vha tshi vhona nḓila yavhuḓi ine na ḓifara ngayo sa vhane vha tevhela Kristo.+
17 Arali Mudzimu a tshi tendela uri ni tambule ngauri ni khou ita zwo lugaho,+ ndi khwine, nṱhani ha u tambula ngauri ni khou ita vhuvhi.+
18 Ngauri Kristo o fa luthihi nahone lwa tshoṱhe.+ O fela vha songo lugaho naho o luga,+ a vha vhofholola kha tshivhi. O ita zwenezwi uri a ni ise kha Mudzimu.+ O vhulawa,+ fhedzi a vuswa e na muvhili wa muya.+
19 Musi e kha wonoyo muvhili, o ḓivhadza mulaedza wa khaṱhulo kha vharuṅwa vha re dzhele,+
20 vhe vha si thetshelese misini ya Noaxe.+ Mudzimu o lindela a sa fheli mbilu, hu tshi khou fhaṱiwa gungwa.+ Ḽeneḽo gungwa ḽo tshidza vhathu* vha malo fhedzi kha maḓi.+
21 Zwenezwo zwi fanyisela ndovhedzo, ine ya khou ni tshidza zwino, nge ha vuswa Yesu Kristo. Yeneyi ndovhedzo a i ṱanzwi tshika, fhedzi i ita uri Mudzimu a ri ṋee luvalo lwavhuḓi.+
22 Yesu o ya ṱaḓulu, a dzula thungo ya tshanḓa tsha u ḽa tsha Mudzimu.+ Vharuṅwa, vhavhusi na vha re na maanḓa vho itwa uri vha ḓiṱukufhadze khae.+
Ṱhaluso dzi re magumoni a siaṱari
^ Thevhedz., “yo kunaho.”
^ Kana “pfesesa.”
^ Kana khamusi, “ni songo ofha zwine vha ni shushedza ngazwo.”
