Bugu Ya U Thoma Ya Samuele 11:1-15
11 Nahasi wa Muamoni+ a gonya a atha madennde u itela u lwa na Vhayabese+ ngei Giḽiada. Vhanna vha Yabese vha amba na Nahasi vha ri: “Vhofha mulanga* na riṋe, ri ḓo u shumela.”
2 Nahasi wa Muamoni a amba navho a ri: “Ndi ḓo vhofha mulanga na inwi arali noṱhe nda ni nongola maṱo aṋu a thungo ya tsha u ḽa. Ndi ḓo ita zwenezwi u itela u shonisa Vhaisiraele vhoṱhe.”
3 Vhahulwane vha Yabese vha mu fhindula vha ri: “Ri ṋee maḓuvha a sumbe, ri ḓo ruma vhaḓinḓa mashangoni oṱhe a Vhaisiraele. Arali hu si na muthu na muthihi ane a ḓo ri lamulela, ri ḓo ḓikumedzela kha iwe.”
4 Nga tshenetsho tshifhinga vhaḓinḓa vha ya Gibia+ ha Saulo vha amba eneo mafhungo vhathu vha tshi zwi pfa, vhathu vhoṱhe vha vusa tshililo tshihulu.
5 Fhedzi Saulo o vha a tshi khou khada sambi a tshi bva masimuni, a vhudzisa a ri: “Ho tshinyala mini? Ndi ngani vhathu vha tshi khou lila?” Vha mu anetshela zwo ambiwaho nga vhanna vha Yabese.
6 Musi Saulo a tshi pfa zwenezwo, muya wa Mudzimu wa mu ṋea maanḓa,+ a sinyuwa zwihulu.
7 A dzhia mboho mbili a dzi tumukanya. A ṋea vhaḓinḓa zwipiḓa uri vha zwi rumele kha mashango oṱhe a Isiraele, vha ri: “Ane a si tevhele Saulo na Samuele u fanela u lavhelela uri hu itwe zwenezwi kha kholomo dzawe!” Yehova a ita uri vhathu vha dzhenwe nga nyofho, vha vha vhathihi.
8 A vha vhala ngei Beseka, ho vha hu na Vhaisiraele vha 300 000 na vhanna vha 30 000 vha Yuda.
9 Vha amba na vhaḓinḓa vho ḓaho vha ri: “Zwine na fanela u zwi vhudza vhanna vha Yabese ngei Giḽiada ndi hezwi: ‘Ni ḓo lamulelwa matshelo nga masiari tshivhangalala.’” Vhaḓinḓa vha ya vha vhudza vhanna vha Yabese, vha takala nga maanḓa.
10 Nga zwenezwo, vhanna vha Yabese vha ri: “Matshelo ri ḓo ḓikumedzela inwi, ni nga ri ita zwine na funa.”+
11 Nga ḓuvha ḽi tevhelaho, Saulo a fhandekanya vhathu vha vha zwigwada zwiraru; vha ya vhukati ha madennde nga maḓautsha* vha vhulaya Vhaamoni+ u swika ḓuvha ḽi tshi fhisa. Vhe vha ponyoka vha balanganywa, muṅwe na muṅwe a shavha e eṱhe.
12 Vhathu vha amba na Samuele vha ri: “Ndi vhonnyi vhe vha ri: ‘Naa Saulo u ḓo vha khosi yashu?’+ Ḓisani vhenevho vhanna ri vha vhulaye.”
13 Naho zwo ralo, Saulo a ri: “A hu na muthu ane a ḓo vhulawa ṋamusi,+ ngauri Yehova o lamulela Vhaisiraele ṋamusi.”
14 Nga murahu Samuele a amba na vhathu a ri: “Iḓani ri ye Giligala+ ri ye u khwaṱhisa vhuhosi henengei.”+
15 Vhathu vhoṱhe vha ya Giligala, henefho Giligala vha vhea Saulo uri a vhe khosi phanḓa ha Yehova. Vha ṋekedza zwiṱhavhelo zwa u pfumedzana henefho phanḓa ha Yehova,+ Saulo na vhanna vhoṱhe vha Isiraele vha pembela vho takala nga maanḓa.+
Ṱhaluso dzi re magumoni a siaṱari
^ Kana “thendelano.”
^ Hu ṱodaho u vha nga 2 u swika nga 6 nga matsheloni.
