Bugu Ya U Thoma Ya Samuele 14:1-52
14 Ḽiṅwe ḓuvha Yonathani+ murwa wa Saulo a amba na muḓinḓa we a vha o mu hwalela zwiṱhavhane zwawe a ri: “Iḓa ri wetshele madenndeni a tshigwada tsha maswole a Vhafilisita.” Fhedzi a si vhudze khotsi awe.
2 Saulo o vha o dzula mukanoni wa Gibia+ fhasi ha muri wa muphomagraneithi ngei Migironi; o vha e na vhanna vha ṱoḓaho u vha 600.+
3 (Ahia murwa wa Ahitobo,+ mukomana wa Ikabodo,+ murwa wa Finiasi,+ murwa wa Eli,+ tshifhe wa Yehova ngei Shiḽo,+ o vha o fara efodo.*)+ Vhathu vho vha vha sa ḓivhi uri Yonathani o ṱuwa.
4 Vhukati ha nḓila ye Yonathani a vha a tshi khou lingedza u fhira ngayo uri a ye hu re na maswole a Vhafilisita ho vha hu na matombo mahulu mavhili a re na ṱhodzi ine ya nga ḽiṋo thungo dzoṱhe; ḽiṅwe ḽi tshi pfi Botsetse, ḽiṅwe ḽi tshi pfi Sene.
5 Ḽiṅwe ḽo vha ḽi phuphu i re thungo ya devhula ḽo livhana na Mikemasha, ḽiṅwe ḽi tshipembe ḽo livhana na Geba.+
6 Ngauralo, Yonathani a amba na we a vha o mu hwalela zwiṱhavhane zwawe a ri: “Iḓa ri wetshele madenndeni a havha vhanna vha mashuvhuru.+ Khamusi Yehova u ḓo ri lwela, a hu na tshine tsha nga thivhela Yehova u tshidza vhathu vhanzhi kana vha si gathi.”+
7 Muhwali wawe wa zwiṱhavhane a tshi pfa zwenezwo a ri: “Ita tshiṅwe na tshiṅwe tshine mbilu yau ya u ṱuṱuwedza uri u tshi ite. Iya huṅwe na huṅwe hune wa funa, ndi ḓo u tevhela huṅwe na huṅwe hune mbilu yau ya u ṱuṱuwedza uri u ye.”
8 Yonathani a ri: “Ri ḓo wetshela seli kha vhenevho uri vha ri vhone.
9 Arali vha amba na riṋe vha ri: ‘Imani henefho u swika ri tshi ḓa kha inwi!’ Ri ime hune ra vha hone, ri songo gonya ra ya khavho.
10 Fhedzi arali vha ri: ‘Iḓani ni lwe na riṋe!’ ri ḓo gonya, ngauri Yehova u ḓo vha kumedzela zwanḓani zwashu. Zwenezwo zwi ḓo vha tshiga kha riṋe.”+
11 Vhuvhili havho vha ya madenndeni a Vhafilisita. Vhafilisita vha ri: “Vhahevheru vha khou bva milindini he vha vha vho dzumbama hone.”+
12 Vhanna vha re madenndeni vha amba na Yonathani na muhwali wawe wa zwiṱhavhane vha ri: “Gonyani ngeno, ri ḓo ni sumbedza!”+ Nga u ṱavhanya Yonathani a amba na muhwali wawe wa zwiṱhavhane a ri: “Ntevhele, ngauri Yehova u ḓo vha kumedzela zwanḓani zwa Vhaisiraele.”+
13 Yonathani a gonya a tshi khou farelela nga zwanḓa, muhwali wawe wa zwiṱhavhane e nga murahu hawe; Yonathani a thoma u vhulaya Vhafilisita, muhwali wawe wa zwiṱhavhane a tevhela a tshi khou vha vhulaya.
14 Kha yeneyo nndwa ya u thoma ye Yonathani na muhwali wawe wa zwiṱhavhane vha i lwa, vho vhulaya vhanna vha ṱoḓaho u vha 20 fhethu hu ṱoḓaho u eḓana na tsimu i limiwaho nga mboho dza dzhogo nthihi.
15 Vhathu vhoṱhe vha re madenndeni vha tshuwa,+ na maswole a ofha. Ḽifhasi ḽa dzinginyea, zwenezwo zwo vha zwi tshi khou itwa nga Mudzimu.
16 Vhalindi vha Saulo ngei Gibia+ wa Vhabenyamini vha vhona uri ho vuwa vilinga thungo dzoṱhe.+
17 Saulo a amba na vhathu vhe a vha e navho a ri: “Ndi khou humbela uri ni vhale vhathu uri ri kone u vhona a siho.” Musi vha tshi vhala, vha wana uri Yonathani na muhwali wawe wa zwiṱhavhane a vhaho.
18 Saulo a amba na Ahia a ri:+ “Ḓisa Mbulungelo ya Mudzimu wa ngoho!” (Ngauri Mbulungelo ya Mudzimu wa ngoho yo vha i na Vhaisiraele nga tshenetsho tshifhinga.*)
19 Musi Saulo a tshi khou amba na tshifhe, vilinga ḽe ḽa vha ḽi hone madenndeni a Vhafilisita ḽa ṋaṋa u engedzea. Ngauralo, Saulo a amba na tshifhe a ri: “Litsha zwine wa khou zwi ita.”*
20 Saulo na vhathu vhoṱhe vhe a vha e navho vha kuvhangana vha ya u lwa, vha wana Vhafilisita vha tshi khou lwa nga tshavho, ho vuwa vilinga ḽihulu vhukuma.
21 Zwiṅwe hafhu, Vhahevheru vhe u thomani vha vha vha tshi ima na Vhafilisita vhe vha ḓa navho madenndeni, vha ya kha Vhaisiraele vha re na Saulo na Yonathani.
22 Vhanna vhoṱhe vha Isiraele vho dzumbamaho+ dzinguni ḽa thavhani dza Efuraimi vha pfa uri Vhafilisita vho shavha, na vhone vha vha pandamedza vha lwa navho.
23 Nga zwenezwo, Yehova a tshidza Vhaisiraele nga ḽeneḽo ḓuvha,+ nndwa ya bvela phanḓa u swika Bethavena.+
24 Fhedzi vhanna vha Isiraele vho vha vho neta ngauri Saulo o vha o anisa vhathu a ri: “Hu ḓo semiwa munna ane a ḽa zwiḽiwa ḽi sa athu u kovhela, ndi sa athu u lifhedza maswina anga!” Ngauralo, hu si vhe na muthu na muthihi we a ḽa zwiḽiwa.+
25 Vhathu* vhoṱhe vha ya ḓakani, ho vha ho ḓala mutoli henefho.
26 Musi vhathu vha tshi swika ḓakani, vha vhona mutoli u tshi khou rotha, fhedzi a hu na na muthihi we a ḽa ngauri vho vha vha tshi khou ofha zwe vha ana.
27 Fhedzi Yonathani o vha a songo zwi pfa uri khotsi awe o anisa vhathu,+ a dzhenisa ṱhodzi ya lubaḓa lwe a vha o lu fara, a lu mbwandamedza kha tshigili tsha notshi. Musi a tshi ḽa, maṱo awe a fhaṱuwa.
28 Nga murahu ha zwenezwo, vhathu vha ri: “Khotsi au o anisa vhathu a ri: ‘Hu ḓo semiwa munna ane a ḽa zwiḽiwa ṋamusi!’+ Ndi ngazwo vhathu vho neta nga u rali.”
29 Naho zwo ralo, Yonathani a ri: “Khotsi anga o ḓisela vhathu khombo khulu. Vhonani nḓila ye maṱo anga a fhaṱuwa ngayo nge nda thetshela mutolinyana.
30 Zwo vha zwi tshi ḓo vha khwine arali vhathu vha ḽe+ zwe vha zwi thuba ṋamusi kha maswina avho! Ho vha hu tshi ḓo vha ho vhulawa Vhafilisita vhanzhi.”
31 Nga ḽeneḽo ḓuvha vha vhulaya Vhafilisita u bva Mikemasha u swika Ayaloni,+ vhathu vho vha vho neta nga maanḓa.
32 Vhathu vha gidima vha kumba zwe vha thuba, vha dzhia nngu, kholomo na ṋamana, vha zwi ṱhavha, vha ḽa ṋama yazwo i na malofha.+
33 Ngauralo, Saulo a vhudzwa eneo mafhungo ha pfi: “Vhathu vha khou khakhela Yehova nga u ḽa ṋama i re na malofha.”+ Saulo a ri: “A no ngo fhulufhedzea. Ṱavhanyani ni phiguluse tombo ḽihulu ni ḽi ḓise kha nṋe.”
34 Nga murahu ha zwenezwo, Saulo a ri: “Ibvani ni ambe na vhathu ni ri: ‘Muṅwe na muṅwe waṋu u fanela uri a ḓise mboho yawe na nngu yawe a zwi ṱhavhele ngeno a kone u zwi ḽa. Ni songo khakhela Yehova nga u ḽa ṋama i re na malofha.’”+ Ngauralo, muṅwe na muṅwe a ḓisa mboho yawe vhusiku honoho, a i ṱhavhela henefho.
35 Saulo a fhaṱela Yehova aḽeṱare.+ Yeneyo yo vha i aḽeṱare ya u thoma ye a i fhaṱela Yehova.
36 Nga murahu Saulo a ri: “Kha ri tse ri tevhele Vhafilisita vhusiku, ri vha dzhiele thundu u swika ḽi tshi tsha. A ri nga litshi muthu na muthihi a tshi ponyoka.” Vha ri: “Ita zwiṅwe na zwiṅwe zwine wa vhona zwo luga.” Tshifhe a ri: “Kha ri ambe na Mudzimu wa ngoho.”+
37 Saulo a vhudzisa Mudzimu a ri: “Naa ndi fanela u tsa u itela u pandamedza Vhafilisita?+ Naa u ḓo vha kumedzela zwanḓani zwa Vhaisiraele?” Fhedzi Mudzimu a si mu fhindule nga ḽeneḽo ḓuvha.
38 Saulo a ri: “Iḓani ngeno inwi vharangaphanḓa vha vhathu, ni ḓe ni vhone uri ndi tshivhi tshifhio tshe tsha itwa ṋamusi.
39 Ndi ana nga Yehova a tshilaho we a tshidza Vhaisiraele naho arali e murwa wanga Yonathani, u tea u fa.” Fhedzi vhathu a vho ngo mu fhindula.
40 Saulo a amba na Vhaisiraele vhoṱhe a ri: “Inwi ni ḓo ima nga thungo heyi, nṋe na murwa wanga Yonathani ra ima nga iṅwe thungo.” Musi vhathu vha tshi pfa zwenezwo vha amba na Saulo vha ri: “Ita zwiṅwe na zwiṅwe zwine wa vhona zwo luga.”
41 Saulo a amba na Yehova a ri: “Iwe Mudzimu wa Isiraele, mphindule u tshi shumisa Thumimi!”+ Ha nangiwa Yonathani na Saulo, vhaṅwe vhathu vha wanala vha si na mulandu.
42 Saulo a ri: “Itani madeṅwa+ u itela u vhona uri ndi nnyi a re na mulandu vhukati hanga na murwa wanga Yonathani.” Ha mvaṱiwa Yonathani.
43 Ngauralo, Saulo a amba na Yonathani a ri: “Mmbudze uri wo ita mini?” Yonathani a fhindula a ri: “Ndo thetshela mutolinyana nga ṱhodzi ya lubaḓa lwe nda vha ndo lu fara.+ Ndi fhano! Mmbulaye!”
44 Saulo a ri: “Ngavhe Mudzimu a tshi nnyita zwine a funa, a engedze kha zwenezwo arali iwe Yonathani wa sa fa.”+
45 Fhedzi vhathu vha amba na Saulo vha ri: “Naa u ṱoḓa uri Yonathani we a ita uri Vhaisiraele vha kunde*+ a fe? A zwi pfali! Ri ana nga Yehova a tshilaho, na luvhudzi na luthihi lwa ṱhohoni yawe a lu nga weli fhasi ngauri ndi Mudzimu we a mu thusa uri a ite zwe a ita ṋamusi.”+ Vhathu vha lamulela* Yonathani, a si vhulawe.
46 Saulo a litsha u pandamedza Vhafilisita, Vhafilisita vha humela shangoni ḽavho.
47 Saulo o khwaṱhisa vhuhosi hawe kha ḽa Isiraele, a lwa na maswina awe oṱhe a re thungo dzoṱhe, a lwa na Vhamoaba,+ Vhaamoni,+ Vhaedomo,+ mahosi a Tsoba+ na Vhafilisita;+ hoṱhe he a vha a tshi ya hone o vha a tshi vha kunda.
48 O lwa nga vhuhali, a kunda Vhaamaleke,+ a tshidza Vhaisiraele zwanḓani zwa vhaṱanguli vhavho.
49 Vharwa vha Saulo vho vha vhe Yonathani, Ishivi na Malakisua.+ O vha e na vhananyana vhavhili, muhulwane o vha a tshi pfi Meraba,+ muṱuku a tshi pfi Mihali.+
50 Mufumakadzi wa Saulo o vha a tshi pfi Ahinoamu ṅwananyana wa Ahimaatsi. Mulangammbi wawe muhulwane o vha a tshi pfi Abinere+ murwa wa Nere, shaka ḽa Saulo.
51 Kishi+ o vha e khotsi a Saulo, Nere+ khotsi a Abinere o vha e ṅwana wa Abiele.
52 Saulo o lwa nndwa khulu na Vhafilisita misini yawe yoṱhe.+ Musi Saulo a tshi vhona munna a re na maanḓa kana a re na tshivhindi, o vha a tshi mu dzhenisa kha mmbi yawe.+
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Thevhedz., “nga ḽeneḽo ḓuvha.”
^ Thevhedz., “Humisa tshanḓa tshau.”
^ Thevhedz., “Shango.”
^ Thevhedz., “rengulula.”
^ Kana “vha tshidzwe.”
