Bugu Ya U Thoma Ya Samuele 18:1-30
18 Musi Saulo a tshi tou fhedza u amba, vhukonani ha Yonathani+ na Davida ha khwaṱha, Yonathani a mu funa vhunga a tshi ḓifuna.+
2 U bva nga ḽeneḽo ḓuvha, Saulo a dzhia Davida a dzula nae, a si mu tendele a tshi humela nḓuni ya khotsi awe.+
3 Yonathani a vhofha mulanga na Davida,+ ngauri o vha a tshi mu funa vhunga a tshi ḓifuna.+
4 Yonathani a bvula tshiambaro tshawe tshi si na zwanḓa tshe a vha o tshi ambara a tshi ṋea Davida, khathihi na zwiṅwe zwiambaro zwawe, banga ḽawe, vhura hawe na bannda ḽawe.
5 Davida a bva a ya nndwani, a bvelela*+ hoṱhe he Saulo a vha a tshi mu ruma hone. Saulo a mu vhea uri a lange maswole,+ zwenezwo zwa takadza vhathu vhoṱhe na vhashumeli vha Saulo.
6 Musi Davida na vhaṅwe vha tshi vhuya u vhulaya Vhafilisita, vhafumakadzi vho vha vha tshi bva miḓini yoṱhe ya Isiraele vha ya u ṱanganedza Khosi Saulo vha tshi khou imbelela+ na u tshina, vha tshi khou lidza mirumba+ na zwiṅwe zwilidzo vho takala.
7 Vhafumakadzi vha pembelaho vho imba vha ri:
“Saulo o vhulaya vha zwigidi,Davida o vhulaya vha zwigidi na zwigidi.”+
8 Saulo a sinyuwa zwihulu,+ lwonolwo luimbo o vha a sa lu funi, lwe a vhuya a ri: “Vha ri Davida o vhulaya vha zwigidi na zwigidi, ngeno vha tshi ri nṋe ndo vhulaya vha zwigidi. Ho tou sala uri vha mu ṋee na vhuhosi!”+
9 U bva nga ḽeneḽo ḓuvha Saulo o vha a tshi dzula o sedza zwine Davida a zwi ita.
10 Nga ḓuvha ḽi tevhelaho muya muvhi we Mudzimu a u tendela wa ḓa kha Saulo,+ a thoma u ita zwithu zwi sa ḓivhalei* e nḓuni yawe, ngeno Davida a tshi khou lidza haripa+ u fana na nga maṅwe maḓuvha. Saulo o vha o fara pfumo,+
11 a posa ḽeneḽo pfumo,+ a tshi ri: “Ndi ḓo baḓekanya Davida na luvhondo!” Fhedzi Davida a tinya luvhili.
12 Ngauralo, Saulo o vha a tshi ofha Davida ngauri Yehova o vha e nae,+ fhedzi o vha o ṱutshela Saulo.+
13 Saulo a amba uri a ṱuwe phanḓa hawe, a mu vhea uri a vhe murangaphanḓa wa vha tshigidi, Davida o vha a tshi ranga phanḓa mmbi musi vha tshi ya nndwani.+
14 Davida a bvela phanḓa a tshi bvelela*+ kha zwoṱhe zwe a vha a tshi zwi ita, Yehova o vha e nae.+
15 Musi Saulo a tshi vhona uri Davida u khou bvelela, a mu ofha.
16 Fhedzi Vhaisiraele vhoṱhe na Vhayuda vho vha vha tshi funa Davida, ngauri o vha a tshi vha ranga phanḓa kha mafulo avho.
17 Nga murahu Saulo a amba na Davida a ri: “Ngoyu ṅwananga muhulwane Meraba.+ Ndi ḓo u ṋea ene uri a vhe mufumakadzi wau.+ Naho zwo ralo, u bvele phanḓa u tshi ntsumbedza uri u muhali nga u lwa nndwa dza Yehova.”+ Ngeno Saulo mbiluni yawe o vha a tshi ri: ‘Ndi nga si mu vhulaye. U ḓo vhulawa nga Vhafilisita.’+
18 Davida a fhindula Saulo a ri: “Ndi nṋe nnyi, mashaka anga na muṱa wa khotsi anga ndi vhonnyi kha ḽa Isiraele lune nṋe nda nga vha mukwasha wa khosi?”+
19 Naho zwo ralo, musi tshifhinga tshi tshi swika tsha uri Saulo a ṋee Davida Meraba ṅwana wawe, o vha o no ṋewa Adiriele+ wa Mehola uri a vhe mufumakadzi wawe.
20 Huno Mihali,+ ṅwana wa Saulo, o vha a tshi funa Davida, Saulo a vhudzwa eneo mafhungo, zwa mu takadza.
21 Saulo a ri: “Ndi ḓo mu ṋea ene uri a vhe tshikwekwe tsha u mu fasha uri Vhafilisita vha mu vhulaye.”+ Saulo a amba na Davida a ri: “U ḓo vha mukwasha wanga.”
22 Zwiṅwe hafhu, Saulo a amba na vhashumeli vhawe a ri: “Ambani na Davida tshiphirini ni ri: ‘Khosi i a u takalela na vhashumeli vhayo vhoṱhe vha a u takalela. Zwino i vha mukwasha wa khosi.’”
23 Musi vhashumeli vha Saulo vha tshi vhudza Davida eneo mafhungo, Davida a ri: “Naa ni vhona u nga u vha mukwasha wa khosi ndi zwithu zwi leluwaho, ngeno nṋe ndi mushai a nyadzeaho?”+
24 Vhashumeli vha vhudza Saulo vha ri: “Zwenezwo ndi zwe Davida a zwi amba.”
25 Saulo a ri: “Zwine na fanela u vhudza Davida ndi hezwi: ‘Khosi a i ṱoḓi tshelede ya lumalo,+ i ṱoḓa u tshi lifhedza maswina a khosi nga u vhulaya+ Vhafilisita vha 100, wa ḓisa vhuṱanzi* ha uri vho fa.’” Saulo o vha a tshi khou luka maano a uri Davida a vhulawe nga Vhafilisita.
26 Ngauralo, vhashumeli vha vhudza Davida eneo mafhungo, a takalela u vha mukwasha wa khosi.+ Musi tshifhinga tshi sa athu u swika,
27 Davida na vhanna vhawe vha vhulaya vhanna vha Vhafilisita vha 200, Davida a ḓisa vhuṱanzi ha uri o vha vhulaya, a tshi itela u vha mukwasha wa khosi. Ngauralo, Saulo a mu ṋea Mihali ṅwana wawe uri a vhe mufumakadzi wawe.+
28 Saulo a vhona uri Yehova o vha e na Davida,+ Mihali ṅwana wawe o vha a tshi funa Davida.+
29 Zwenezwi zwa ita uri Saulo a ofhe vhukuma Davida, Saulo a vha swina ḽa Davida vhutshilo hawe hoṱhe.+
30 Vhakololo vha Vhafilisita vho vha vha tshi bva vha ya nndwani, fhedzi tshifhinga tshoṱhe musi vha tshi ya nndwani, Davida o vha a tshi bvelela* u fhira vhashumeli vhoṱhe vha Saulo;+ dzina ḽawe ḽa khoḓwa zwihulu.+
Ṱhaluso dzi re magumoni a siaṱari
^ Kana “ita zwithu nga vhuṱali.”
^ Kana “u ḓifara sa muporofita.”
^ Kana “ita zwithu nga vhuṱali.”
^ Thevhedz., “maganda a zwiraḓo zwa vhanna vha Vhafilisita.”
^ Kana “ita zwithu nga vhuṱali.”
