Bugu Ya U Thoma Ya Samuele 20:1-42
-
Yonathani u fhulufhedzea kha Davida (1-42)
20 Davida a shavha Nayoto ngei Rama. Naho zwo ralo, a ya ha Yonathani a amba nae a ri: “Ndo ita mini?+ Ndo tshinya mini, khotsi au ndo mu khakhela nga mini lune a ṱoḓa u mmbulaya?”
2 Yonathani a mu fhindula a ri: “Zwi nga si konadzee!+ A u nga fi. A hu na tshithu tshine khotsi anga a tshi ita hu sa londwi uri ndi tshihulwane kana ndi tshiṱuku, a songo thoma a mmbudza. A nga ndzumbela hani eneo mafhungo? Zwenezwo zwi nga si itee.”
3 Fhedzi Davida a dovha a ana a ri: “Khotsi au u a zwi ḓivha zwa vhukuma uri iwe u a ntakalela,+ o amba a ri: ‘Yonathani a songo zwi ḓivha uri a sa ḓo ṱungufhala.’ Fhedzi ndi ana nga Yehova a tshilaho, nda dovha nda ana nga vhutshilo hau, nṋe ndi tsini na u fa!”+
4 Ngauralo, Yonathani a amba na Davida a ri: “Zwoṱhe zwine wa ḓo zwi amba ndi ḓo u itela zwone.”
5 Davida a amba na Yonathani a ri: “Matshelo ndi vhuṱambo ha ṅwedzi muswa,+ ndo lavhelelwa u ḽa na khosi; ntendele ndi shavhe ndi ye u dzumbama ḓakani u swika ḽi tshi kovhela nga ḓuvha ḽa vhuraru.
6 Arali khotsi au a vhona ndi siho, iwe u ri: ‘Davida o nkhumbela uri a ye Betlehema muḓini wa hawe nga u ṱavhanya,+ ngauri muṱa wa hawe woṱhe u khou ṋekedza tshiṱhavhelo tsha ṅwaha muṅwe na muṅwe.’+
7 Arali a ri: ‘Zwo luga,’ ndi hone nṋe mushumeli wau ndi tshi ḓo ri ḽo lala. Fhedzi arali a sinyuwa, ndi ḓo kona u zwi vhona uri o ḓiimisela u nkhuvhadza.
8 Sumbedza mushumeli wau lufuno lu sa shanduki,+ ngauri wo vhofha mulanga na mushumeli wau phanḓa ha Yehova.+ Fhedzi arali ndi na mulandu,+ iwe mmbulaye. Ndi ngani u tshi nga nkumedzela khotsi au?”
9 Yonathani a tshi pfa zwenezwo a ri: “Zwine wa khou zwi humbula zwi nga si konadzee! Arali ndi vhe ndo pfa uri khotsi anga o ḓiimisela u u huvhadza, naa ndo vha ndi tshi ḓo vha ndi songo u vhudza?”+
10 Davida a amba na Yonathani a ri: “Ndi nnyi ane a ḓo mmbudza arali khotsi au a tshi ḓo u fhindula nga vhuhali?”
11 Yonathani a amba na Davida a ri: “Iḓa ri ye ḓakani.” Vhuvhili havho vha ṱuwa vha ya ḓakani.
12 Yonathani a amba na Davida a ri: “Yehova Mudzimu wa Isiraele nga a vhe ṱhanzi ya uri ndi ḓo vhudzisa khotsi anga nga ha zwenezwi matshelo nga tshenetshi tshifhinga kana mbamatshelo. Arali a u takalela, naa a thi nga ḓo u ḓivhadza?
13 Fhedzi arali khotsi anga o ḓiimisela u u huvhadza, Yehova nga a nnyite zwine a funa, a engedze kha zwenezwo arali nda sa u vhudza zwine a ḓo zwi ita, wa ṱuwa nga mulalo. Ngavhe Yehova a tshi vha na iwe,+ vhunga o vha na khotsi anga.+
14 Naa a u nga ntsumbedzi lufuno lu sa shanduki lwa Yehova musi ndi tshi kha ḓi tshila, na musi ndo no fa?+
15 U songo vhuya wa litsha u sumbedza muṱa wa hashu lufuno lu sa shanduki,+ na musi Yehova a tshi fhelisa maswina oṱhe a Davida kha ḽifhasi.”
16 Yonathani a vhofha mulanga na vha nnḓu ya Davida a ri: “Yehova u ḓo pfisa vhuṱungu na u sengisa maswina a Davida.”
17 Ngauralo, Yonathani a dovha a anela Davida ngauri o vha a tshi mu funa, o vha a tshi mu funa vhunga a tshi ḓifuna.+
18 Yonathani a amba nae a ri: “Matshelo ndi vhuṱambo ha ṅwedzi muswa,+ zwi ḓo vhonala uri a uho, ngauri tshidulo tshau tshi ḓo vha tshi si na muthu.
19 Na mbamatshelo zwi ḓo vhonala vhukuma uri a uho, u fanela u ya fhethu he wa vha wo dzumbama hone ḽiḽa ḓuvha,* u dzumbame tsini na tombo.
20 Ndi ḓo pfula nga misevhe miraru nga thungo haḽo, zwa tou nga ndi khou pfula tshiṅwe tshithu.
21 Ndi ḓo ruma muḓinḓa nda ri: ‘Iya u dobe misevhe.’ Arali nda amba na muḓinḓa nda ri: ‘Vhona! Misevhe i nga thungo yau, i ya u i dobe,’ ndi hone u tshi nga bva, ndi ana nga Yehova a tshilaho, zwi ḓo vha zwi tshi khou amba uri ḽo lala, a hu na khombo.
22 Fhedzi arali nda vhudza onoyo mutukana nda ri: ‘Vhona! Misevhe i phanḓa hau,’ ndi hone u tshi nga ṱuwa, ngauri Yehova u ḓo vha o u tendela uri u ṱuwe.
23 Kha mafhungo e nṋe na iwe ra fhulufhedzisana one,+ Yehova nga a vhe ṱhanzi vhukati hashu nga hu sa fheli.”+
24 Ngauralo, Davida a dzumbama ḓakani. Musi vhuṱambo ha ṅwedzi muswa vhu tshi thoma, khosi ya dzula uri i ḽe.+
25 Khosi yo vha yo dzula vhudzuloni hayo tsini na luvhondo. Yonathani o vha o livhana nayo, Abinere+ o vha o dzula nga thungo ha Saulo, fhedzi tshidulo tsha Davida tsho vha tshi si na muthu.
26 Saulo ho ngo amba tshithu ḽeneḽo ḓuvha, ngauri o elekanya a ri: ‘Hu nga vha ho itea tshiṅwe tshithu tshe tsha ita uri a vhe na tshika.+ A nga vha a songo kuna.’
27 Nga ḽa matshelo nga murahu ha vhuṱambo ha ṅwedzi muswa, nga ḓuvha ḽa vhuvhili, tshidulo tsha Davida tsha ḓi vha tshi si na muthu. Saulo a vhudzisa Yonathani murwa wawe a ri: “Ndi ngani murwa wa Isai+ a songo ḓa u ḽa zwiḽiwa mulovha na ṋamusi?”
28 Yonathani a fhindula Saulo a ri: “Davida o nkhumbela uri a ye Betlehema.+
29 O ri: ‘Ndi khou humbela uri u ntendele uri ndi ṱuwe, ngauri muṱa wa hashu u khou ṋekedza tshiṱhavhelo henefho muḓini, mukomana wanga o mmbidza uri ndi ḓe. Arali u tshi ntakalela ndi khou humbela uri u ntendele ndi ye u vhona vhakomana vhanga.’ Ndi ngazwo a songo ḓa u ḽa na khosi.”
30 Saulo a sinyutshela Yonathani a ri: “Iwe ṅwana wa mufumakadzi wa ḽishandukwa, ndi a zwi ḓivha uri u ima na ṅwana wa Isai, u khou ḓishonisa na u shonisa mme au.
31 Arali murwa wa Isai a tshi kha ḓi tshila kha ḽifhasi, vhuhosi hau a vhu nga khwaṱhi.+ Zwino ruma muthu uri a ye a mu dzhie a mu ḓise kha nṋe, ngauri Davida u tea u fa.”+
32 Naho zwo ralo, Yonathani a amba na Saulo khotsi awe a ri: “Ndi ngani a tshi fanela u vhulawa?+ O tshinya mini?”
33 Saulo a mu posa nga pfumo uri a mu vhulaye,+ Yonathani a zwi vhona uri khotsi awe o ḓiimisela u vhulaya Davida.+
34 Yonathani a ṱavhanya a takuwa henefho zwiḽiwani o sinyuwa zwihulu, a si ḽe zwiḽiwa nga ḓuvha ḽa vhuvhili na nga murahu ha vhuṱambo ha ṅwedzi muswa, ngauri o vha a tshi khou pfela Davida vhuṱungu+ na ngauri khotsi awe o vha o mu shonisa.
35 Nga matsheloni Yonathani a ya ḓakani uri a ṱangane na Davida, a ṱuwa na muḓinḓa wawe muṱuku.+
36 A amba na muḓinḓa wawe a ri: “Ndi khou humbela uri u gidime u dobe misevhe ine nda ḓo i pfula.” Muḓinḓa a gidima, Yonathani a pfula musevhe wa wela phanḓa hawe.
37 Musi muḓinḓa a tshi swika fhethu he ha vha hu na musevhe we Yonathani a u pfula, Yonathani a vhidzelela muḓinḓa wawe a ri: “Naa musevhe a u ho phanḓa hau?”
38 Yonathani a vhidzelela muḓinḓa wawe a ri: “Ṱavhanya! Gidima! U songo lenga!” Muḓinḓa wa Yonathani a doba misevhe, a vhuyelela ha muṋe wawe.
39 Muḓinḓa ho ngo pfesesa tshithu na tshithihi nga ha eneo mafhungo; ho vha hu Yonathani na Davida fhedzi vhane vha ḓivha eneo mafhungo.
40 Nga murahu ha zwenezwo Yonathani a ṋea muḓinḓa wawe zwiṱhavhane zwawe, a mu vhudza uri: “Ṱuwa nazwo u zwi ise muḓini.”
41 Musi muḓinḓa o no ṱuwa, Davida a bva nga thungo ya tshipembe. A gwadama a losha luraru, vha khisana vha lilelana, fhedzi Davida a lila nga maanḓa.
42 Ngauralo, Yonathani a amba na Davida a ri: “Tshimbila nga mulalo, samusi ro ana+ nga dzina ḽa Yehova ra ri: ‘Ngavhe Yehova a tshi vha ṱhanzi vhukati hanga na iwe na vhukati ha vhana* vhau na vhana* vhanga nga hu sa fheli.’”+
Davida a takuwa a ṱuwa, Yonathani a humela muḓini.
Ṱhaluso dzi re magumoni a siaṱari
^ Thevhedz., “nga ḓuvha ḽa mushumo.”
^ Thevhedz., “mbeu.”
^ Thevhedz., “mbeu.”
