Bugu Ya U Thoma Ya Samuele 21:1-15
21 Nga murahu Davida a ya Nobe+ ha tshifhe Ahimeleke. Ahimeleke a ṱanganedza Davida a tshi khou tetemela nga nyofho, a mu vhudzisa a ri: “Ndi ngani u woṱhe, u songo ḓa na muṅwe muthu?”+
2 Davida a fhindula tshifhe Ahimeleke a ri: “Khosi yo nndaedza u ita zwiṅwe zwithu, fhedzi yo ri: ‘Hu songo vha na muthu na muthihi ane a ḓivha nga ha enea mafhungo ane nda khou u rumela one na zwe nda u vhudza zwone.’ Ndo langana na vhaṱhannga uri ri ḓo ṱangana huṅwe fhethu.
3 Ngauralo, arali u na ḽofo ṱhanu dza vhurotho, nṋee dzone kana tshiṅwe na tshiṅwe tshine tsha vha hone.”
4 Fhedzi tshifhe a fhindula Davida a ri: “A thi na vhurotho ho ḓoweleaho, fhedzi hu na vhurotho vhukhethwa,+ tenda vhenevho vhaṱhannga vha songo ita zwa vhudzekani na vhafumakadzi zwenezwino.”+
5 Davida a fhindula tshifhe a ri: “A ro ngo ita zwa vhudzekani u fana na nga zwiṅwe zwifhinga ri tshi ya nndwani.+ Arali mivhili ya vhenevho vhaṱhannga i tshi vha i mikhethwa musi ri tshi khou ita mushumo zwawo, ṋamusi i ḓo vha i mikhethwa vhukuma.”
6 Tshifhe a mu ṋea vhurotho vhukhethwa,+ ngauri ho vha hu si na vhuṅwe vhurotho nga nnḓa ha vhurotho ha ṱano, he ha bviswa phanḓa ha Yehova nga ḓuvha ḽe ha dzhielwa vhudzulo nga vhurotho ha u fhisa.
7 Muṅwe wa vhashumeli vha Saulo o vha e henefho nga ḽeneḽo ḓuvha, o valelwa phanḓa ha Yehova. O vha a tshi pfi Doege+ wa Muedomo,+ muṅwe wa vhalisa vhahulwane vha Saulo.
8 Davida a amba na Ahimeleke a ri: “Naa u na pfumo kana banga fhano? A tho ngo bva na banga ḽanga kana zwiṱhavhane zwanga, ngauri khosi yo nthuma nga u ṱavhanya.”
9 Tshifhe a ri: “Banga ḽa Goliata+ wa Mufilisita we wa mu vhulaya Govhani ḽa Elaa,+ ḽo putelwa nga labi murahu ha efodo.+ Arali u tshi khou ṱoḓa u ḽi dzhia u nga ḽi dzhia, ngauri ndi ḽone ḽi ḽoṱhe fhano.” Davida a ri: “A hu na ḽiṅwe ḽine ḽa fana naḽo. Nṋee ḽone.”
10 Nga ḽeneḽo ḓuvha Davida a shavha+ Saulo, a ya kha Akise khosi ya Gathi.+
11 Akise a vhudziswa nga vhashumeli vhawe vha ri: “Naa uyu a si Davida khosi ya iḽo shango? Naa a si ene we vha imba nga hae musi vha tshi khou tshina, vha ri:
‘Saulo o vhulaya vha zwigidi,
Davida o vhulaya vha zwigidi na zwigidi’?”+
12 Davida a elekanya zwe vha zwi amba, a ofha nga maanḓa+ Akise khosi ya Gathi.
13 A ḓiita unga u khou penga+ henefho phanḓa havho, a ḓiita mpengo o dzula navho. O vha a tshi khou sokou ṅwala-ṅwala mavothi a khoro, a litsha nthe dzi tshi elela kha ndebvu dzawe.
14 Akise a amba na vhashumeli vhawe a ri: “Ni khou zwi vhona uri hoyu munna u a penga! No mu ḓisela mini kha nṋe?
15 Naa ndi tou shaya mipengo lune na tou nḓisela uyu munna uri a ḓe a pengele phanḓa hanga? Naa uyu munna a nga dzhena nḓuni yanga?”
