Bugu Ya U Thoma Ya Samuele 22:1-23
22 Davida a ṱuwa+ henefho a shavhela bakoni ḽa Adulamu.+ Musi vhakomana vhawe na vha nnḓu yoṱhe ya khotsi awe vha tshi zwi pfa, vha ya khae henengei.
2 Vhaṅwe vhoṱhe vho tsikeledzwaho, vha re na zwikolodo na vha songo fusheaho vha mu kuvhanganela, a vha murangaphanḓa wavho. O vha e na vhanna vha ṱoḓaho u vha 400.
3 Nga murahu Davida a ṱuwa henefho a ya Mitsepa ngei Moaba, a amba na khosi ya Moaba a ri:+ “Ndi khou humbela uri u tendele khotsi anga na mme anga uri vha dzule na iwe u swika ndi tshi ḓo ḓivha zwine Mudzimu a ḓo nnyitela zwone.”
4 Ngauralo, a vha sia na khosi ya Moaba, vha dzula nayo misi yoṱhe Davida e fhethu ha vhushavhelo.+
5 Nga u ya ha tshifhinga muporofita Gada+ a amba na Davida a ri: “U songo dzula fhethu ha vhushavhelo. Iya shangoni ḽa Yuda.”+ Ngauralo, Davida a ṱuwa a ya ḓakani ḽa Herethe.
6 Saulo a pfa uri Davida na vhanna vhe a vha e navho vho wanala. Nga tshenetsho tshifhinga Saulo o vha o dzula tshikwarani fhasi ha muri wa mutamarisiki* ngei Gibia+ o fara pfumo, e na vhashumeli vhawe vhoṱhe.
7 Saulo a amba na vhashumeli vhawe a ri: “Ndi humbela uri ni thetshelese inwi Vhabenyamini. Naa murwa wa Isai+ a nga ni ṋea masimu noṱhe khathihi na masimu a minḓirivhe u fana na nṋe? Naa a nga ni nanga noṱhe uri ni range phanḓa vha zwigidi na vha maḓana?+
8 Noṱhe no nnyitela tshimbevha! A hu na na muthihi we a mmbudza uri murwa wanga o vhofha mulanga na murwa wa Isai!+ A hu na na muthihi waṋu we a mpfela vhuṱungu, a mmbudza uri murwa wanga o ṱuṱuwedza mushumeli wanga uri a mvutshele sa zwine a khou zwi ita ṋamusi.”
9 Doege+ wa Muedomo, we a vha o ima henefho na vhashumeli vha Saulo, a fhindula a ri:+ “Ndo vhona murwa wa Isai a tshi ḓa Nobe ha Ahimeleke murwa wa Ahitobo.+
10 Ahimeleke a mu humbelela kha Yehova, a mu ṋea zwiḽiwa. A dovha a mu ṋea na banga ḽa Goliata wa Mufilisita.”+
11 Khosi ya ṱavhanya ya ri hu vhidzwe Ahimeleke murwa wa tshifhe Ahitobo na vhoṱhe vha nnḓu ya khotsi awe na vhotshifhe vha re ngei Nobe. Vhoṱhe vha ya ha khosi.
12 Saulo a ri: “Ndi khou humbela uri u thetshelese iwe murwa wa Ahitobo!” Ahimeleke a fhindula a ri: “Ndo thetshelesa, muṋe wanga.”
13 Saulo a amba nae a ri: “Ndi ngani wo nnyitela tshimbevha, iwe na murwa wa Isai, nga u mu ṋea vhurotho na banga na u mu vhudzisela ha Mudzimu? U khou lwa na nṋe, u ṱoḓa u mvutshela sa zwine a khou zwi ita ṋamusi.”
14 Ahimeleke a fhindula khosi a ri: “Ndi nnyi kha vhashumeli vhau vhoṱhe ane a fhulufhedzea u fana na Davida?+ Ndi mukwasha wa khosi,+ muhulwane wa vhalindi, na ane a huliswa nḓuni yau.+
15 Naa ṋamusi lwo vha lu lwa u thoma ndi tshi mu vhudzisela kha Mudzimu?+ A zwi pfali uri ndi nga u itela tshimbevha. Khosi i songo sinyutshela mushumeli wayo na vha nnḓu yoṱhe ya khotsi anga, ngauri mushumeli wau o vha a sa ḓivhi tshithu na tshithihi nga ha enea mafhungo.”+
16 Fhedzi khosi ya ri: “Iwe Ahimeleke u ḓo fa,+ iwe khathihi na vha nnḓu yoṱhe ya khotsi au.”+
17 Ndi hone khosi i tshi vhudza vhalindi vha re henefho ya ri: “Sendelani ni vhulaye vhotshifhe vha Yehova, ngauri vha ima na Davida! Vho vha vha tshi zwi ḓivha uri o vha a tshi khou shavha, a vho ngo mmbudza!” Fhedzi vhashumeli vha khosi vha si tende u vhulaya vhotshifhe vha Yehova.
18 Mafheleloni khosi ya amba na Doege ya ri:+ “Sendela u vhulaye vhotshifhe!” Doege wa Muedomo+ a ṱavhanya a sendela a vha vhulaya. Nga ḽeneḽo ḓuvha a vhulaya vhanna vha 85 vho ambaraho efodo dza ḽinene.+
19 A dovha a vhulaya na vhadzulapo vha Nobe+ nga banga; he vhotshifhe vha vha vha tshi dzula hone, a vhulaya vhanna khathihi na vhafumakadzi, vhana khathihi na dzitshetshe, mboho, donngi na nngu.
20 Naho zwo ralo, ha ponyoka mutukana muthihi wa Ahimeleke murwa wa Ahitobo, we a vha a tshi pfi Abiathara,+ a shavha a tevhela Davida.
21 Abiathara a vhudza Davida uri: “Saulo o vhulaya vhotshifhe vha Yehova.”
22 Davida a tshi pfa zwenezwo a amba na Abiathara a ri: “Ndo zwi ḓivha nga ḽeneḽo ḓuvha+ samusi Doege wa Muedomo o vha e henefho uri o vha a tshi ḓo vhudza Saulo. Ndi na vhuḓifhinduleli ha muṅwe na muṅwe o faho nḓuni ya khotsi au.
23 Zwino dzula na nṋe. U songo ofha, ngauri ane a ṱoḓa u u vhulaya u khou ṱoḓa u vhulaya na nṋe; ndi ḓo u tsireledza.”+
Ṱhaluso dzi re magumoni a siaṱari
^ Ndi muri une wa dzula u mudala u re na zwiṱari zwiṱuku une wa fhufhumisa maluvha a pinki kana matshena.
