Bugu Ya U Thoma Ya Samuele 23:1-29
23 Davida a vhudzwa uri: “Vhafilisita vha khou lwa na Vhakeila,+ vha khou tswa zwithu zwa hune ha fhefherwa hone.”*
2 Davida a vhudzisa Yehova a ri:+ “Naa ndi nga ya nda vhulaya vhenevho Vhafilisita?” Yehova a amba na Davida a ri: “Iya u vhulaye Vhafilisita u lamulele Vhakeila.”
3 Vhanna vha re na Davida vha amba nae vha ri: “Arali ri tshi khou ofha ri fhano Yuda,+ ri ḓo ofha nga maanḓa musi ri tshi ya ha Vhakeila u lwa na mmbi dza Vhafilisita!”+
4 Ngauralo, Davida a dovha a vhudzisa Yehova.+ Yehova a mu fhindula a ri: “Takuwa u tsele ha Vhakeila, ngauri ndi ḓo kumedzela Vhafilisita zwanḓani zwau.”+
5 Nga zwenezwo, Davida a ya Keila na vhanna vhe a vha e navho, a lwa na Vhafilisita; a thuba zwifuwo zwavho, a vhulaya vhathu vhanzhi. Davida a lamulela vhadzulapo vha Keila.+
6 Musi Abiathara+ murwa wa Ahimeleke a tshi shavhela kha Davida ngei Keila, o vha e na efodo.*
7 Saulo a vhudzwa uri: “Davida o ya Keila.” Saulo a ri: “Mudzimu o mu kumedzela nṋe,+ ngauri o dzhena muḓini u re na khoro dzine dza hoṋiwa.”
8 Saulo a vhidza vhathu vhoṱhe uri vha ye nndwani, vha tsele ngei Keila uri vha tange Davida na vhanna vhe a vha e navho.
9 Musi Davida a tshi zwi pfa uri Saulo u khou mu itela tshimbevha, a amba na tshifhe Abiathara a ri: “Ḓisa efodo ngeno.”+
10 Davida a ri: “Iwe Yehova Mudzimu wa Isiraele, mushumeli wau o zwi pfa uri Saulo o ḓiimisela u ḓa Keila uri a fhelise muḓi nga nṱhani hanga.+
11 Naa vharangaphanḓa* vha muḓi wa Keila vha ḓo nkumedzela zwanḓani zwawe? Naa Saulo u ḓo tsela ngeno samusi ndo zwi pfa? Iwe Yehova Mudzimu wa Isiraele, ndi khou u humbela uri u vhudze mushumeli wau.” Yehova a ri: “Saulo u ḓo tsela henengeo.”
12 Davida a ri: “Naa vharangaphanḓa vha muḓi wa Keila vha ḓo kumedzela nṋe na vhanna vhane nda vha navho zwanḓani zwa Saulo?” Yehova a ri: “Vha ḓo u kumedzela.”
13 Davida a ṱavhanya a takuwa na vhanna vhe a vha e navho, vhanna vha ṱoḓaho u vha 600,+ vha ṱuwa Keila vha ya hoṱhe he vha vha vha tshi nga kona u ya. Musi Saulo a tshi vhudzwa uri Davida o shavha ngei Keila, ho ngo tsha mu tevhela.
14 Davida a dzula ngei sogani, fhethu hune ha konḓa u hu swikelela, dzinguni ḽa thavhani dza sogani ḽa Zifi.+ Saulo a bvela phanḓa a tshi mu ṱoḓa,+ fhedzi Yehova a si mu kumedzele zwanḓani zwawe.
15 Musi Davida e ngei sogani ḽa Zifi ngei Horeshe, Davida a zwi ḓivha uri* Saulo u khou ṱoḓa u mu vhulaya.
16 Yonathani murwa wa Saulo a ya kha Davida ngei Horeshe, a mu thusa uri a wane nungo* kha Yehova.+
17 Yonathani a amba nae a ri: “U songo ofha, ngauri Saulo khotsi anga, a nga si u wane; iwe u ḓo vha khosi kha ḽa Isiraele,+ ndi ḓo vha nga fhasi ha vhuvhusi hau; na Saulo khotsi anga u a zwi ḓivha zwenezwo.”+
18 Vhuvhili havho vha vhofha mulanga+ phanḓa ha Yehova, Davida a dzula ngei Horeshe, fhedzi Yonathani a humela hayani ha hawe.
19 Nga murahu vhanna vha Zifi vha gonya ha Saulo ngei Gibia+ vha ri: “Davida o dzumbama tsini na riṋe+ fhethu hune ha konḓa u hu swikelela ngei Horeshe+ tshikwarani tsha Haxila,+ tshine tsha vha tshipembe* ha Yeshimoni.*+
20 Iwe thovhela, u nga ḓa tshifhinga tshiṅwe na tshiṅwe musi u tshi zwi takalela, ri ḓo mu kumedzela zwanḓani zwau.”+
21 Saulo a ri: “Ngavhe Yehova a tshi ni fhaṱutshedza, ngauri no mpfela vhuṱungu.
22 Tshimbilani, ni bvele phanḓa ni tshi lingedza u ṱoḓa hune a vha hone, ni ṱoḓe na muthu we a mu vhona henefho ngauri ndo vhudzwa uri o ṱalifha nga maanḓa.
23 Ni sedze nga vhuronwane fhethu hoṱhe hune a dzumbama hone, ni vhuye kha nṋe ni na vhuṱanzi. Ndi hone ndi tshi ḓo ṱuwa na inwi, arali e henefho shangoni, ndi ḓo mu ṱoḓa vhukati ha Vhayuda vhoṱhe vha zwigidi.”
24 Vha ṱuwa vha ya Zifi+ vho ranga phanḓa Saulo, ngeno Davida na vhanna vhe a vha e navho vhe sogani ḽa Maoni,+ ngei Araba+ thungo ya tshipembe ha Yeshimoni.
25 Nga murahu Saulo a swika na vhanna vhawe uri a mu ṱoḓe.+ Musi Davida a tshi vhudzwa, a ṱavhanya a tsa luwani+ a dzula sogani ḽa Maoni. Musi Saulo a tshi pfa zwenezwo, a tevhela hune Davida a vha hone ngei sogani ḽa Maoni.
26 Saulo o vha e kha iṅwe thungo ya thavha, Davida na vhanna vhe a vha e navho vhe kha iṅwe thungo ya thavha. Davida a tshi khou gidima uri a shavhe+ Saulo, fhedzi Saulo na vhanna vhe a vha e navho vha tshi khou sendela tsini na Davida na vhanna vhe a vha e navho, uri vha vha fare.+
27 Fhedzi muḓinḓa a ḓa ha Saulo a ri: “Ṱavhanya u ḓe ngauri Vhafilisita vha khou ṱhasela shango!”
28 Saulo a litsha u pandamedza Davida,+ a ṱuwa uri a lwe na Vhafilisita. Ndi ngazwo henefho fhethu hu tshi pfi Luwani lwa Dziphambano.
29 Davida a ṱuwa henefho a ya a dzula fhethu hune zwa konḓa u hu swikelela ngei Engedi.+
Ṱhaluso dzi re magumoni a siaṱari
^ Kana “luvhatani.”
^ Sedzani Mutevhe Wa Ṱhalutshedzo Ya Maipfi.
^ Kana khamusi, “vhaṋe vha mashango.”
^ Kana khamusi, “a ofha ngauri.”
^ Thevhedz., “a khwaṱhisa tshanḓa tshawe.”
^ Kana khamusi, “soga.”
^ Thevhedz., “thungo ya tsha u ḽa.”
