Bugu Ya U Thoma Ya Samuele 24:1-22
24 Musi Saulo a tshi tou vhuya u pandamedza Vhafilisita, vha mu vhudza uri: “Davida u sogani ḽa Engedi.”+
2 Ngauralo, Saulo a ṱuwa na vhanna vha 3 000 vho nangiwaho kha Vhaisiraele vhoṱhe, vha ṱuwa vha ya vha ṱoḓa Davida na vhanna vhe a vha e navho luwani lu re na mbudzi dza thavha.
3 Saulo a swika madangani a nngu a re thungo ha nḓila o itwaho nga matombo, he ha vha hu na bako. Saulo a dzhena nga ngomu u itela u ḓithusa, ngeno Davida na vhanna vhe a vha e navho vho dzula bvungwi henefho bakoni.+
4 Vhanna vha re na Davida vha amba nae vha ri: “Heḽi ndi ḓuvha ḽine Yehova a khou u vhudza uri: ‘Ndi khou kumedzela swina ḽau zwanḓani zwau,+ u nga ḽi ita zwiṅwe na zwiṅwe zwine wa vhona zwo tea kha iwe.’” Ngauralo, Davida a takuwa a ṋangavhedza a tumula lupendelo lwa tshiambaro tsha Saulo tshi si na zwanḓa.
5 Nga murahu luvalo* lwa Davida lwa mu dina+ nge a tumula lupendelo lwa tshiambaro tsha Saulo tshi si na zwanḓa.
6 Nga zwenezwo, a amba na vhanna vhe a vha e navho a ri: “Yehova a nga si ntendele ndi tshi ita zwithu zwo raloho kha muṋe wanga, muḓodzwa wa Yehova, nda mu vhulaya, ngauri ndi muḓodzwa wa Yehova.”+
7 Davida a kaidza* vhanna vhe a vha e navho, a si vha tendele vha tshi vutshela Saulo. Saulo a bva henefho bakoni a ṱuwa.
8 Davida na ene a bva henefho bakoni, a vhidzelela Saulo a ri: “Thovhela muṋe wanga!”+ Saulo a tshi pfa zwenezwo a rembuluwa, Davida a losha o kwatamisa tshifhaṱuwo, a luvha.
9 Davida a amba na Saulo a ri: “Ndi ngani u tshi thetshelesa zwine vhathu vha zwi amba musi vha tshi ri: ‘Davida u khou ṱoḓa u u huvhadza’?+
10 Ṋamusi wo zwi vhona uri Yehova o vha o u kumedzela zwanḓani zwanga ngei bakoni. Fhedzi musi muṅwe a tshi ri ndi u vhulaye,+ nda u pfela vhuṱungu nda ri: ‘Ndi nga si vhulaye muṋe wanga, ngauri ndi muḓodzwa wa Yehova.’+
11 Khotsi anga, sedza lupendelo lwa tshiambaro tshau lwe nda lu fara, ngauri musi ndi tshi tumula lupendelo lwa tshiambaro tshau tshi si na zwanḓa a tho ngo u vhulaya. U khou zwi vhona na u zwi pfesesa uri a tho ngo ḓiimisela u u huvhadza kana u u shandukela, a tho ngo u khakhela,+ ngeno iwe u tshi khou mpandamedza uri u mmbulaye.+
12 Ngavhe Yehova a tshi haṱula vhukati hanga na iwe,+ ngavhe Yehova a tshi nndifhedzela,+ fhedzi ndi nga si u vhulaye.+
13 Naho murero wa kale u tshi ri: ‘Vhuvhi vhu bva kha muvhi,’ fhedzi nṋe ndi nga si u vhulaye.
14 Khosi ya Isiraele yo vha yo ya u ṱoḓa nnyi? Yo vha i tshi khou pandamedza nnyi? Naa yo vha i tshi khou pandamedza mmbwa yo faho? Naa yo vha i tshi khou pandamedza thatha?+
15 Ngavhe Yehova a tshi haṱula, u ḓo haṱula vhukati hanga na iwe, a ṱolisise mafhungo a nndwele,+ a nkhaṱhule, a nndamulele zwanḓani zwau.”
16 Musi Davida a tshi fhedza u amba na Saulo, Saulo a ri: “Naa ndi ipfi ḽau, iwe murwa wanga Davida?”+ Saulo a vusa tshililo tshihulu.
17 A amba na Davida a ri: “U muvhuya u mphira ngauri wo mpfara zwavhuḓi naho nṋe ndo u itela vhuvhi.+
18 Ṋamusi wo mmbudza zwivhuya zwe wa nnyitela zwone nga u sa mmbulaya musi Yehova o nkumedzela zwanḓani zwau.+
19 Naa muthu a nga wana swina ḽawe, a ḽi litsha ḽa ṱuwa a songo ḽi huvhadza? Yehova u ḓo u lambedza nga zwivhuya+ nga nṱhani ha zwe wa nnyitela zwone ṋamusi.
20 Ndi a zwi ḓivha uri u ḓo vha khosi,+ muvhuso wa Isiraele u ḓo dzula u muṱani wa hau.
21 Zwino nnyanele nga Yehova+ uri a u nga vhulayi vhaḓuhulu* vhanga musi ndo no fa na uri a u nga ḓo fhelisa dzina ḽanga nḓuni ya khotsi anga.”+
22 Ngauralo, Davida a anela Saulo, nga murahu Saulo a humela hayani.+ Fhedzi Davida na vhanna vhe a vha e navho vha ya fhethu hune zwa konḓa u hu swikelela.+
Ṱhaluso dzi re magumoni a siaṱari
^ Thevhedz., “mbilu.”
^ Kana khamusi, “balanganya.”
^ Thevhedz., “mbeu.”
