Bugu Ya U Thoma Ya Samuele 26:1-25
26 Nga murahu ha tshifhinga vhanna vha Zifi+ vha ḓa ha Saulo ngei Gibia,+ vha ri: “Davida o dzumbama tshikwarani tsha Haxila, tsho livhanaho na Yeshimoni.”*+
2 Saulo a takuwa a tsela sogani ḽa Zifi e na vhanna vha 3 000 vho nangwaho kha ḽa Isiraele u itela u ṱoḓa Davida sogani ḽa Zifi.+
3 Saulo a atha madennde nḓilani ya tshikwarani tsha Haxila, tsho livhanaho na Yeshimoni. Nga tshenetsho tshifhinga, Davida o vha a tshi khou dzula sogani, a pfa uri Saulo o mu tevhela sogani.
4 Ngauralo, Davida a ruma dziṱholi u itela u khwaṱhisedza arali Saulo o ḓa.
5 Nga murahu Davida a ya fhethu he Saulo a vha o atha hone madennde, Davida a vhona fhethu he Saulo na mulangammbi muhulwane Abinere+ murwa wa Nere, vha vha vho eḓela hone; Saulo o vha o eḓela henefho madenndeni, maswole o atha madennde u mona nae.
6 Davida a vhudzisa Ahimeleke wa Muhethe+ na Abishai+ murwa wa Tseruya+ murathu wa Yoaba a ri: “Ndi nnyi ane a ḓo ṱuwa na nṋe ra tsela madenndeni ha Saulo?” Abishai a fhindula a ri: “Ndi ḓo ṱuwa na iwe.”
7 Davida na Abishai vha ya kha eneo maswole nga madekwana, vha wana Saulo o eḓela henefho madenndeni, pfumo ḽawe ḽo ṱokwa tsini na ṱhoho yawe; Abinere na maswole vho vha vho eḓela vho mu tanga.
8 Abishai a amba na Davida a ri: “Ṋamusi Mudzimu o kumedzela swina ḽau zwanḓani zwau.+ Ntendele ndi mu ṱhavhe nga pfumo ndi mu phule ḽi dzhene fhasi, ndi mu ṱhavhe nga luthihi.”
9 Naho zwo ralo, Davida a amba na Abishai a ri: “U songo mu vhulaya, ngauri a hu na muthu ane a nga vhulaya muḓodzwa wa Yehova+ a si vhe na mulandu.”+
10 Davida a ri: “Ndi ana nga Yehova a tshilaho, u ḓo vhulawa nga Yehova+ kana u ḓo fa ḽiṅwe ḓuvha+ kana a ya nndwani a vhulawa hone.+
11 Yehova a nga si ntendele ndi tshi vhulaya muḓodzwa wa Yehova!+ Kha ri dzhie pfumo ḽi re tsini na ṱhoho yawe na mudzio wa maḓi, ri ṱuwe.”
12 Nga zwenezwo, Davida a dzhia pfumo na mudzio wa maḓi zwe zwa vha zwi tsini na ṱhoho ya Saulo, vha ṱuwa. A hu na muthu na muthihi we a vha vhona+ kana u zwi ḓivha kana u karuwa, ngauri vhoṱhe vho vha vho eḓela, ngauri vho vha vho eḓela vho farwa nga khofhe khulu dzi bvaho ha Yehova.
13 Davida a wetshela seli a ya a ima ṱhodzini ya thavha kulenyana, ha vha na tshikhala tshilapfu vhukati havho.
14 Davida a vhidzelela maswole na Abinere+ murwa wa Nere, a ri: “Hee Abinere! Naa u khou mpfa?” Abinere a fhindula a ri: “Ndi iwe nnyi ane wa khou vhidzelela khosi?”
15 Davida a amba na Abinere a ri: “Naa a u munna? Ndi nnyi ane a nga iwe kha ḽa Isiraele? Ndi ngani u songo linda thovhela muṋe wau? Ngauri ho vha ho dzhena muṅwe wa maswole a tshi ri a vhulaye thovhela muṋe wau.+
16 Zwe wa ita a si zwavhuḓi. Ndi ana nga Yehova a tshilaho, wo tewa nga u fa, ngauri a wo ngo linda muṋe wau, muḓodzwa wa Yehova.+ Edzou lavhelesa! Ḽi gai pfumo ḽa khosi na mudzio wa maḓi+ zwe zwa vha zwi tsini na ṱhoho yawe?”
17 Saulo a pfa uri ndi ipfi ḽa Davida a ri: “Naa ndi ipfi ḽau, iwe murwa wanga Davida?”+ Davida a ri: “Ndi ipfi ḽanga, thovhela muṋe wanga.”
18 Davida a ri: “Ndi ngani muṋe wanga a tshi khou pandamedza mushumeli wawe,+ ndo ita mini, ndo tshinya mini?+
19 Thovhela muṋe wanga, ndi khou humbela uri u thetshelese zwine nṋe mushumeli wau nda ḓo zwi amba: Arali e Yehova we a u ṱuṱuwedza uri u lwe na nṋe, nga a ṱanganedze* tshifhiwa tshanga tsha thoro. Fhedzi arali wo ṱuṱuwedzwa nga vhathu,+ vho semiwa phanḓa ha Yehova, ngauri ṋamusi vho mpandela uri ndi si vhe na mukovhe kha ifa ḽa Yehova,+ vha ri: ‘Ṱuwa u ye u shumele miṅwe midzimu!’
20 Zwino u songo litsha malofha anga a tshi shulutshela kule na Yehova, ngauri khosi ya Isiraele yo bva uri i ṱoḓe thatha,+ zwa tou nga i khou pandamedza khwali dzi re dzithavhani.”
21 Saulo a ri: “Ndo tshinya.+ Vhuya murwa wanga Davida, ngauri a thi tsha ḓo dovha nda lingedza u u vhulaya, ngauri ṋamusi wo dzhia vhutshilo hanga sa ha ndeme.+ Ndo ita zwa vhutsilu, ndo khakha nga maanḓa.”
22 Davida a fhindula a ri: “Kheḽi pfumo ḽa khosi. Nga hu ḓe muṅwe wa vhaṱhannga a ḽi dzhie.
23 Ndi Yehova ane a ḓo lifhela muṅwe na muṅwe u ya nga u luga hawe+ na u fhulufhedzea hawe, ngauri ṋamusi Yehova o vha o u kumedzela zwanḓani zwanga, fhedzi ndo vha ndi songo ḓiimisela u vhulaya muḓodzwa wa Yehova.+
24 Samusi vhutshilo hau ho vha vhu ha ndeme kha nṋe ṋamusi, na vhutshilo hanga nga vhu vhe ha ndeme phanḓa ha Yehova, ngavhe a tshi ntshidza kha vhuṱungu hoṱhe.”+
25 Saulo a amba na Davida a ri: “Ngavhe u tshi fhaṱutshedzwa, iwe murwa wanga Davida. U ḓo ita zwithu zwihulu, u ḓo kunda.”+ Davida a ṱuwa, Saulo a vhuyelela hune a bva hone.+
