Bugu Ya U Thoma Ya Samuele 27:1-12
-
Vhafilisita vha ṋea Davida muḓi wa Zikilaga (1-12)
27 Naho zwo ralo, Davida a elekanya a ri: “Ḽiṅwe ḓuvha Saulo u ḓo mmbulaya. Tsha khwine ndi uri ndi shavhele+ shangoni ḽa Vhafilisita; Saulo u ḓo litsha u nṱoḓa shangoni ḽoṱhe ḽa Isiraele,+ ndi ḓo vha ndo ponyoka tshanḓani tshawe.”
2 Davida a ṱuwa na vhanna vha 600+ vhe a vha e navho vha ya ha Akise+ murwa wa Maoxo, khosi ya Gathi.
3 Davida na vhanna vhe a vha e navho vha dzula na Akise ngei Gathi, munna muṅwe na muṅwe a dzula na muṱa wawe. Davida na ene a dzula na vhafumakadzi vhawe vhavhili, Ahinoamu+ wa Yeseriele na Abigaili+ wa Karamele, we a vha e mufumakadzi wa Nabali.
4 Saulo a vhudzwa uri Davida o shavhela Gathi, a litsha u mu ṱoḓa.+
5 Davida a amba na Akise a ri: “Arali u tshi ntakalela, nṋee fhethu kha miṅwe ya miḓi yau uri ndi dzule henefho. Ndi ngani mushumeli wau a tshi dzula na iwe muḓini wa musanda?”
6 Ndi hone Akise a tshi mu ṋea muḓi wa Zikilaga+ nga ḽeneḽo ḓuvha. Ndi ngazwo muḓi wa Zikilaga u wa mahosi a Yuda u swika na ṋamusi.
7 Davida o fhedza ṅwaha na miṅwedzi miṋa a tshi khou dzula shangoni ḽa Vhafilisita.+
8 Davida na vhanna vhe a vha e navho, vho ya vha ṱhasela Vhageshuri,+ Vhagirisi na Vhaamaleke+ ngauri vho vha vha tshi dzula shangoni ḽine ḽa bva Thelama ḽa swika Shuru,+ ḽa tsela shangoni ḽa Egipita.
9 Musi Davida a tshi vutshela shango, o vha a tshi vhulaya vhanna na vhafumakadzi,+ a dzhia nngu, kholomo, donngi, gamela na zwiambaro, nga murahu a vhuyelela ha Akise.
10 Akise o vha a tshi mu vhudzisa a ri: “Ṋamusi wo ya wa ṱhasela ngafhi?” Davida o vha a tshi fhindula a ri: “Ro ya ra ṱangula thungo ya tshipembe* ya Yuda”+ kana “thungo ya tshipembe ya Vhayerahamiele”+ kana “thungo ya tshipembe ya Vhakeni.”+
11 Davida ho ngo litsha munna naho e ufhio kana mufumakadzi a tshi tshila uri hu si vhe na ane a ḓiswa ngei Gathi, nge a ri: “Ndi khou itela uri vha si ri ambe vha ri: ‘Davida o ri ita hezwi na hezwi.’” (Zwenezwo ndi zwe a vha a tshi zwi ita musi a tshi khou dzula shangoni ḽa Vhafilisita.)
12 Akise o vha a tshi fhulufhela Davida, a elekanya a ri: ‘U vho vhengwa nga vhathu vha hawe vha Isiraele, u ḓo dzula e mushumeli wanga.’
Ṱhaluso dzi re magumoni a siaṱari
^ Kana “Negebe.”
