Bugu Ya U Thoma Ya Samuele 29:1-11
-
Vhafilisita a vha fhulufheli Davida (1-11)
29 Vhafilisita+ vha kuvhanganya mmbi dzavho ngei Afeke, ngeno Vhaisiraele vho atha madennde avho tsini na tshisima tshi re ngei Yeseriele.+
2 Vhavhusi vha Vhafilisita vho vha vha tshi khou fhira nga henefho nga zwigwada zwa maḓana na zwa zwigidi, Davida na vhanna vhe a vha e navho vha tevhela vhe na Akise.+
3 Fhedzi vhakololo vha Vhafilisita vha ri: “Avha Vhahevheru vha khou ṱoḓa mini fhano?” Akise a fhindula vhakololo vha Vhafilisita a ri: “Hoyu ndi Davida mushumeli wa Khosi Saulo ya Isiraele, o no fhedza ṅwaha woṱhe kana u fhira a tshi khou dzula na nṋe.+ A thi athu u wana vhukhakhi na vhuthihi khae u bva nga ḓuvha ḽe a ḓa ngaḽo kha nṋe u swika ṋamusi.”
4 Fhedzi vhakololo vha Vhafilisita vha mu sinyutshela, vha amba nae vha ri: “Humisa onoyo munna.+ Nga a vhuyelele fhethu he wa ri a dzule hone. U songo mu tendela a tshi ṱuwa na riṋe nndwani, a sa ḓo ri shandukela nndwani.+ Naa a nga si ṱoḓe u takadza muṋe wawe nga u vhulaya maswole ashu?
5 Naa uyu a si Davida we vha imba nga hae musi vha tshi khou tshina vha tshi ri:
‘Saulo o vhulaya vha zwigidi,Davida o vhulaya vha zwigidi na zwigidi’?”+
6 Akise+ a vhidza Davida a amba nae a ri: “Ndi ana nga Yehova a tshilaho, wo luga, ndo vha ndi tshi takalela uri u ye nndwani na mmbi yanga,+ ngauri a thi athu u wana vhukhakhi na vhuthihi kha iwe u bva nga ḓuvha ḽe wa ḓa kha nṋe u swika ṋamusi.+ Fhedzi vhavhusi a vha u fhulufheli.+
7 Huma nga mulalo, u songo ita tshithu na tshithihi tshine tsha ḓo dina vhavhusi vha Vhafilisita.”
8 Naho zwo ralo, Davida a amba na Akise a ri: “Ndo ita mini? Ndi vhukhakhi vhufhio he wa vhu wana kha mushumeli wau u bva nga ḓuvha ḽe nda ḓa ngaḽo fhano u swika ṋamusi, zwine zwa ita uri ndi si ṱuwe na iwe nda ya u lwa na maswina a thovhela muṋe wanga?”
9 Akise a tshi pfa zwenezwo a fhindula Davida a ri: “Nṋe ndi a zwi ḓivha uri wo luga u fana na muruṅwa wa Mudzimu.+ Fhedzi vhakololo vha Vhafilisita vho ri: ‘U songo mu tendela a tshi ṱuwa na riṋe nndwani.’
10 Zwino u vuwe nga matsheloni-tsheloni na vhashumeli vha muṋe wau vhe wa ḓa navho; ni ṱuwe nga matsheloni-tsheloni.”
11 Nga zwenezwo, Davida na vhanna vhe a vha e navho vha vuwa nga matsheloni-tsheloni vha vhuyelela shangoni ḽa Vhafilisita, Vhafilisita vha gonya vha ya Yeseriele.+
