Bugu Ya U Thoma Ya Samuele 30:1-31
30 Musi Davida na vhanna vhe a vha e navho vha tshi swika Zikilaga+ nga ḓuvha ḽa vhuraru, vha wana Vhaamaleke+ vho ṱhasela Zikilaga nga thungo ya tshipembe,* vho vutshela Zikilaga vha u fhisa.
2 Vha thuba vhafumakadzi+ na zwoṱhe zwe zwa vha zwi khawo, u bva kha muṱuku u ya kha muhulwane. A vho ngo vhulaya muthu na muthihi, fhedzi vho vha dzhia vha ṱuwa navho.
3 Musi Davida na vhanna vhe a vha e navho vha tshi swika muḓini, vha wana uri wo fhiswa, vhafumakadzi vhavho, vharwa vhavho na vhananyana vhavho vho thubiwa.
4 Davida na vhanna vhe a vha e navho vha vusa tshililo tshihulu, u swika vha tshi fhelelwa nga nungo dza u lila.
5 Na vhafumakadzi vhavhili vha Davida, vhane vha vha Ahinoamu wa Yeseriele na Abigaili we a vha e mufumakadzi wa Nabali wa Karamele, vho vha vho thubiwa.+
6 Davida o vha o tsikeledzea nga maanḓa, ngauri vhanna vhe a vha e navho vho vha vha tshi khou ṱoḓa u mu kanḓa nga matombo, ngauri vhenevho vhanna vhoṱhe vho vha vho sinyuwa nga maanḓa nga nṱhani ha uri vho vha vho xelelwa nga vharwa vhavho na vhananyana vhavho. Fhedzi Davida o wana nungo a tshi thuswa nga Yehova Mudzimu wawe.+
7 Ngauralo, Davida a amba na tshifhe Abiathara+ murwa wa Ahimeleke a ri: “Ndi khou humbela uri u ḓise efodo* ngeno.”+ Abiathara a isa efodo kha Davida.
8 Davida a vhudzisa Yehova a ri:+ “Naa ndi nga pandamedza tshenetsho tshigwada tsha mavemu? Naa ndi ḓo tshi fara?” Mudzimu a amba nae a ri: “Tshi pandamedze, ngauri u ḓo tshi fara wa dzhiulula vhathu vhoṱhe na zwoṱhe zwo thubiwaho.”+
9 Davida a ṱavhanya a ṱuwa na vhanna vha 600+ vhane a vha navho, vha tshimbila vha swika Muedzini wa Besora, vhaṅwe vha sala henefho.
10 Vhanna vha 200 vho netaho lwe vha si kone u wela Muedzi wa Besora vha sala,+ fhedzi Davida a ṱuwa na vhanna vha 400.
11 Vha wana muṅwe munna wa Muegipita ḓakani, vha mu isa ha Davida. Vha mu ṋea zwiḽiwa uri a ḽe na maḓi uri a nwe,
12 khathihi na tshipiḓa tsha khekhe ya mahuyu na khekhe mbili dza nḓirivhe. Musi o no fhedza u ḽa, a dovha a vha na nungo, o vha o fhedza maḓuvha mararu na vhusiku hao a sa ḽi tshithu kana u nwa maḓi.
13 Davida a mu vhudzisa a ri: “Muṋe wau ndi nnyi, iwe u bva ngafhi?” Onoyo munna a ri: “Nṋe ndi muḓinḓa wa Muegipita, phuli ya Muamaleke, fhedzi muṋe wanga o ntsia ngauri ndo vha ndi tshi khou lwala maḓuvha mararu o fhiraho.
14 Ro ṱhasela thungo ya tshipembe* ya Vhakireti+ na shangoni ḽa Yuda na thungo ya tshipembe* ya Kalebe,+ Zikilaga ra u fhisa.”
15 Davida a amba nae a ri: “Naa u ḓo mpheletshedza kha tshenetsho tshigwada tsha mavemu?” Onoyo munna a fhindula a ri: “Arali wa nnyanela nga Mudzimu uri a u nga ḓo mmbulaya na uri a u nga ḓo nkumedzela zwanḓani zwa muṋe wanga, ndi ḓo u isa kha tshenetsho tshigwada tsha mavemu.”
16 Nga zwenezwo, a mu isa he vha vha vho phaḓalala hone na shango ḽoṱhe, vha tshi khou ḽa na u nwa, vha tshi khou pembela nga nṱhani ha zwithu zwinzhi zwe vha zwi thuba shangoni ḽa Vhafilisita na shangoni ḽa Yuda.
17 Davida a vha vhulaya u bva nga matsheloni u swika vhusiku ha ḓuvha ḽi tevhelaho; a hu na na munna we a ponyoka+ nga nnḓa ha vhanna vha 400 vhe vha shavha nga gamela.
18 Davida a dzhia zwoṱhe zwe zwa vha zwo thubiwa nga Vhaamaleke,+ Davida a dzhiulula vhafumakadzi vhawe vhavhili.
19 A hu na tshithu na tshithihi tshavho tshe tsha vha tshi tshi khou ṱahela, u bva kha muṱuku u ya kha muhulwane. Vho dzhiulula vharwa vhavho na vhananyana vhavho na zwithu zwe zwa vha zwo thubiwa;+ Davida a dzhiulula zwoṱhe zwe vha vha vho zwi thuba.
20 Davida a dzhia nngu na kholomo, a zwi khada zwi phanḓa ha maṅwe masambi avho. Vha ri: “Hezwi ndi zwe Davida a zwi thuba.”
21 Davida a swika kha vhanna vha 200 vho netaho lwe vha si kone u ṱuwa na Davida, vhe vha sala Muedzini wa Besora,+ vha bva uri vha ṱanganedze Davida na vhathu vhe a vha e navho. Musi Davida a tshi swika ha vhenevho vhanna a vha vhudzisa mutakalo.
22 Naho zwo ralo, vhanna vhavhi vha sa ḓivhalei vha re vhukati ha vhe vha ṱuwa na Davida vha ri: “Samusi vha songo ṱuwa na riṋe, a ri nga ḓo vha ṋea na tshithu na tshithihi tsha zwe zwa thubiwa zwe ra zwi dzhiulula, muṅwe na muṅwe u ḓo dzhia mufumakadzi wawe na vharwa vhawe fhedzi a ṱuwa.”
23 Fhedzi Davida a ri: “Vhahashu, ni songo ita zwenezwo nga zwe Yehova a ri ṋea zwone. O ri tsireledza, a kumedzela zwanḓani zwashu tshigwada tsha mavemu tshe tsha ḓa u lwa na riṋe.+
24 Ndi nnyi ane a ḓo tendelana na inwi kha zwenezwo? Mukovhe wa o yaho nndwani u ḓo fana na wa o salaho a tshi khou linda thundu.+ Vhoṱhe vha ḓo wana mukovhe.”+
25 U bva nga ḽeneḽo ḓuvha, Davida a vhetshela Vhaisiraele mulayo na maitele zwine zwa kha ḓi shuma na ṋamusi.
26 Musi Davida a tshi vhuyelela Zikilaga, a rumela zwiṅwe zwa zwe a thuba kha vhahulwane vha ngei Yuda vhane vha vha khonani dzawe, a ri: “Khetsho tshifhiwa* tshi bvaho kha zwe zwa thubiwa kha maswina a Yehova.”
27 A rumela tshifhiwa tshenetsho kha vha re ngei Bethele,+ kha vha re ngei Ramothe wa Negebe,* kha vha re ngei Yathiri,+
28 kha vha re ngei Aroere, kha vha re ngei Sifimothe, kha vha re ngei Eshithemoa,+
29 kha vha re ngei Rakhali, kha vha re ngei miḓini ya Vhayerahamiele,+ kha vha re ngei miḓini ya Vhakeni,+
30 kha vha re ngei Horoma,+ kha vha re ngei Borashani, kha vha re ngei Athaka,
31 kha vha re ngei Heburoni+ na fhethu hoṱhe he Davida na vhanna vhe a vha e navho vha vha vha tshi dzulela u ya hone.
Ṱhaluso dzi re magumoni a siaṱari
^ Kana “Negebe.”
^ Sedzani Mutevhe Wa Ṱhalutshedzo Ya Maipfi.
^ Kana “Negebe.”
^ Kana “Negebe.”
^ Thevhedz., “phaṱhutshedzo.”
^ Kana “tshipembe.”
