Bugu Ya U Thoma Ya Samuele 5:1-12
5 Musi Vhafilisita vha tshi thuba Mbulungelo+ ya Mudzimu wa ngoho, vha bva nayo Ebenetsere vha ya nayo Asidodo.
2 Vhafilisita vha dzhia Mbulungelo ya Mudzimu wa ngoho vha i dzhenisa nḓuni* ya Dagoni, vha i vhea tsini na Dagoni.+
3 Musi Vhaasidodo vha tshi vuwa nga matsheloni-tsheloni a ḓuvha ḽi tevhelaho, vha vhona tshifanyiso tsha Dagoni tsho wela fhasi nga tshifhaṱuwo phanḓa ha Mbulungelo ya Yehova.+ Nga zwenezwo, vha dzhia tshifanyiso tsha Dagoni vha tshi vhuyedzedza fhethu hatsho.+
4 Musi vha tshi vuwa nga matsheloni-tsheloni a ḓuvha ḽi tevhelaho, vha wana tshifanyiso tsha Dagoni tsho wela fhasi nga tshifhaṱuwo phanḓa ha Mbulungelo ya Yehova. Ṱhoho ya Dagoni na zwanḓa zwo tumuwa zwi muṋangoni wa thembele. Ho vha ho sala mutumbu watsho fhedzi.*
5 Ndi ngazwo u swika na ṋamusi, vhotshifhe vha Dagoni na vhoṱhe vhane vha dzhena thembeleni ya Dagoni vha sa tshimbili muṋangoni wa Dagoni ngei Asidodo.
6 Yehova a pfisa Vhaasidodo vhuṱungu vhuhulu, a ita uri vha dzhenwe nga nyofho nga u ita uri vha vhe na zwizwimbo kha pfuralelo.+
7 Musi vhanna vha Asidodo vha tshi vhona zwe zwa vha zwi tshi khou itea, vha ri: “Mbulungelo ya Mudzimu wa Isiraele i songo tsha dzula fhano na riṋe, ngauri u khou pfisa riṋe na mudzimu washu Dagoni vhuṱungu vhuhulu.”
8 Nga zwenezwo, vha vhidza marena oṱhe a Vhafilisita, vha a kuvhanganya, vha a vhudzisa vha ri: “Ri ite mini nga Mbulungelo ya Mudzimu wa Isiraele?” Vha fhindula vha ri: “Mbulungelo ya Mudzimu wa Isiraele kha i pfuluselwe Gathi.”+ Ngauralo, vha pfulusela Mbulungelo ya Mudzimu wa Isiraele henengei.
9 Musi vho no i pfulusela henengei, Yehova a pfisa vhuṱungu vhathu vha wonoyo muḓi, a ita uri vha dzhenwe nga nyofho khulu. A ita uri vhathu vha wonoyo muḓi, u bva kha muṱuku u ya kha muhulwane, vha bve zwizwimbo kha pfuralelo.+
10 Ngauralo, vha rumela Mbulungelo ya Mudzimu wa ngoho ngei Ekironi,+ fhedzi musi Mbulungelo ya Mudzimu wa ngoho i tshi tou swika Ekironi, Vhaekironi vha thoma u lila vha ri: “Vho ḓisa Mbulungelo ya Mudzimu wa Isiraele kha riṋe, u itela u vhulaya riṋe na vhathu vhashu!”+
11 Nga zwenezwo, vha vhidza marena oṱhe a Vhafilisita, vha a kuvhanganya vha ri: “Ṱuwisani Mbulungelo ya Mudzimu wa Isiraele; kha i humele fhethu hayo uri riṋe na vhathu vha hashu ri si vhulawe.” Ngauri muḓi woṱhe wo vha u tshi khou ofha u fa; ngauri Mudzimu wa ngoho o vha a tshi khou vha pfisa vhuṱungu vhuhulu henefho,+
12 vhathu vhe vha si fe vho bva zwizwimbo kha pfuralelo. Tshililo tsha u ṱoḓa thuso tsha vhathu vha wonoyo muḓi tsha swika ṱaḓulu.
