Bugu Ya U Thoma Ya Samuele 6:1-21
-
Vhafilisita vha humisela Mbulungelo kha Vhaisiraele (1-21)
6 Mbulungelo+ ya Yehova yo fhedza miṅwedzi ya sumbe i shangoni ḽa Vhafilisita.
2 Vhafilisita vha vhidza vhotshifhe na vhabvumbi+ vha vha vhudzisa vha ri: “Ri ite mini nga Mbulungelo ya Yehova? Ri vhudze nḓila ine ra nga i vhuyedzedza ngayo vhudzuloni hayo.”
3 Vha fhindula vha ri: “Arali ni tshi ṱoḓa u ṱuwisa mbulungelo ya Yehova Mudzimu wa Isiraele, ni songo i ṱuwisa i si na tshifhiwa. Ni fanela u ita vhungoho ha uri ni i humisela khae i na tshifhiwa tsha u pfumelela mulandu.+ Arali na ita ngauralo ni ḓo fhola, ni ḓo kona u ḓivha uri ndi ngani tshanḓa tshawe tshi sa ni litshi.”
4 Vha fhindula vha ri: “Ndi tshifhiwa tshifhio tsha u pfumelela mulandu tshine ra fanela u mu rumela?” Vha ri: “U ya nga tshivhalo tsha vhavhusi vha Vhafilisita,+ rumelani zwizwimbo zwa musuku zwa kha pfuralelo zwiṱanu na mbevha ṱhanu dza musuku, ngauri yeneyo ṱhamu yo rwa muṅwe na muṅwe waṋu na vhavhusi vhaṋu.
5 Ni vhumbe zwifanyiso zwa zwizwimbo na zwa mbevha+ dzine dza khou tshinya shango, ni hulise Mudzimu wa Isiraele. Khamusi u ḓo fhungudza vhuṱungu vhune na khou vhu pfa na vhune ha khou pfiwa nga mudzimu waṋu na shango ḽaṋu.+
6 Ndi ngani ni tshi fanela u rindidza mbilu dzaṋu u fana na Vhaegipita na Farao vhe vha rindidza mbilu dzavho?+ Musi a tshi vha pfisa vhuṱungu,+ vho tendela Vhaisiraele vha ṱuwa.+
7 Zwino lugisani gariki ntswa na kholomo mbili dzi re na zwiṋamana dzi sa athu u hwalaho dzhogo. Ni pane dzenedzo kholomo kha gariki, fhedzi ṋamana dzadzo ni dzi humisele hayani, dzi vhe kule nadzo.
8 Ni dzhie Mbulungelo ya Yehova ni i vhee kha gariki, tsini nayo ni vhee bogisi ḽe na dzhenisa zwithu zwa musuku zwine na khou mu rumela sa tshifhiwa tsha u pfumelela mulandu.+ Ni kone u i lavhelesa
9 i tshi ṱuwa: Arali ya gonyela nḓilani i yaho Bethe-semesi+ shangoni ḽayo, zwi amba uri ndi Mudzimu we a ri ḓisela yeneyi khombo. Arali zwi songo ralo, ri ḓo zwi ḓivha uri a si ene we a ri pfisa vhuṱungu; zwo sokou itea.”
10 Vhenevho vhanna vha ita zwe vha vhudzwa. Vha dzhia kholomo mbili dzi re na ṋamana vha dzi pana kha gariki, ṋamana dzadzo vha dzi valela hayani.
11 Vha vhea Mbulungelo ya Yehova kha gariki, khathihi na bogisi ḽi re na mbevha dza musuku na zwifanyiso zwa zwizwimbo.
12 Kholomo dza tshimbila nga nḓila i yaho Bethe-semesi.+ Dza tshimbila nḓilani khulwane, dza tshimbila dzi tshi khou lila; dzi si ye kha tsha u ḽa kana kha tsha monde. Ngeno vhavhusi vha Vhafilisita vha tshi khou tshimbila murahu hadzo u swika mukanoni wa Bethe-semesi.
13 Vhathu vha Bethe-semesi vho vha vha tshi khou kaṋa goroi govhani. Musi vha tshi tou lavhelesa vha vhona Mbulungelo, vha takala nga maanḓa.
14 Gariki ya dzhena tsimuni ya Yoshua wa Mubethe-semesi, ya ima henefho tsini na tombo ḽihulu. Ngauralo, vha fhanza thanda dza gariki, kholomo+ vha dzi ṋekedza Yehova sa tshifhiwa tsha u fhiswa.
15 Vhalevi+ vha tsitsa Mbulungelo ya Yehova khathihi na bogisi ḽe ḽa vha ḽi na zwithu zwa musuku, vha zwi vhea kha tombo ḽihulu. Nga ḽeneḽo ḓuvha vhathu vha Bethe-semesi+ vha ṋekedza zwifhiwa zwa u fhiswa na u ṋekedza zwiṱhavhelo kha Yehova.
16 Musi vhavhusi vhaṱanu vha Vhafilisita vha tshi zwi vhona, vha humela Ekironi nga ḽeneḽo ḓuvha.
17 Zwenezwo ndi zwizwimbo zwa musuku zwa kha pfuralelo zwe Vhafilisita vha zwi rumela Yehova sa tshifhiwa tsha u pfumelela mulandu:+ ndi tshithihi tsha Asidodo,+ tshithihi tsha Gaza, tshithihi tsha Asikaloni, tshithihi tsha Gathi,+ tshithihi tsha Ekironi.+
18 Na mbevha dza musuku dzi tshimbidzanaho na tshivhalo tsha miḓi yoṱhe ya Vhafilisita ine ya vha ya vhavhusi vhaṱanu, ine ya vha miḓi yo tsireledzwaho nga mbondo na miḓana i songo tsireledzwaho.
Tombo ḽihulwane ḽe vha vhea Mbulungelo ya Yehova ḽi kha ḓi vha ṱhanzi na ṋamusi henengei tsimuni ya Yoshua wa Mubethe-semesi.
19 Fhedzi Mudzimu a vhulaya vhathu vha Bethe-semesi, ngauri vho vha vho ṱolela nga ngomu Mbulungeloni ya Yehova. O vhulaya vhathu vha 50 070, vhathu vha thoma u gungula ngauri Yehova o vhulaya vhathu vhanzhi.+
20 Zwiṅwe hafhu, vhanna vha Bethe-semesi vha vhudzisa vha ri: “Ndi nnyi ane a nga kona u ima phanḓa ha Yehova, uyu Mudzimu mukhethwa,+ musi a tshi ṱuwa u ḓo ya ha nnyi?”+
21 Mafheleloni vha ruma vhaḓinḓa vha ya ha vhadzulapo vha Kiriate-yearimi,+ vha ri: “Vhafilisita vho humisa Mbulungelo ya Yehova. Tselani ngeno ni i dzhie ni gonye nayo.”+
