Vhurifhi Ha U Thoma Vhu Yaho Kha Vhakorinta 14:1-40
14 Bvelani phanḓa ni tshi funana, ni dzule ni tshi lwela u wana zwifhiwa zwi bvaho kha Mudzimu, zwihuluhulu tshifhiwa tsha u porofita.+
2 Ngauri ane a amba nga ndimi u pfeseswa nga Mudzimu fhedzi, hu si nga vhathu.+ Naho a tshi khou amba zwiphiri zwikhethwa+ nga muya mukhethwa, a hu na ane a pfesesa zwine a zwi amba.
3 Fhedzi ane a porofita u a khwaṱhisa, u ṱuṱuwedza na u khuthadza vhathu nga zwine a zwi amba.
4 Ane a amba nga ndimi u a ḓikhwaṱhisa, fhedzi ane a porofita u khwaṱhisa tshivhidzo.
5 Ndi tama noṱhe ni tshi amba nga ndimi,+ fhedzi ndi takalela uri ni porofite.+ Ane a porofita u fhira ane a amba nga ndimi. Ngauri wa ndimi a nga si khwaṱhise tshivhidzo arali a sa ṱalutshedza.
6 Vhahashu, ndi ḓo ni vhuyedza ngani arali nda ḓa kha inwi zwino nda amba nga ndimi? Arali ndi tshi ṱoḓa u ni thusa ndi ḓo shumisa nḓivho+ kana zwe nda dzumbululelwa+ na u zwi funzwa nga Mudzimu.
7 Zwi fana na zwilidzo zwi ngaho tshiṱiringo kana haripa, arali mulidzi a sa zwi lidza zwavhuḓi, a hu na ane a ḓo ḓivha luimbo lune lwa khou lila.
8 Arali phalaphala ya sa lidzwa zwavhuḓi, ndi nnyi ane a ḓo ḓilugiselela u lwa?
9 Na inwi arali na amba nga nḓila i sa pfesesei, ndi nnyi ane a ḓo pfesesa zwine zwa khou ambiwa? Ni ḓo vha ni tshi khou amba zwi sa vhuyedzi.
10 Hu ambiwa nyambo nnzhi shangoni, dzoṱhe dzi a pfesesea.
11 Arali ndi sa pfesesi ane a khou amba, ndi ḓo nga mutsinda khae, na ane a khou amba u ḓo nga mutsinda kha nṋe.
12 Samusi ni tshi tama zwifhiwa zwi bvaho kha Mudzimu, na inwi lwelani u vha na zwenezwo zwifhiwa zwinzhi uri ni khwaṱhise tshivhidzo.+
13 Ane a amba nga ndimi nga a rabele uri a kone na u ṱalutshedzela.+
14 Arali ndi tshi rabela nga ndimi, ndi vha ndi tshi khou rabela nga nṱhani ha tshifhiwa tshi bvaho kha Mudzimu, ndi ngazwo ndi sa pfesesi zwine nda amba.
15 Zwino ndi ite mini? Ndi tshi rabela ndi ḓo shumisa tshifhiwa tshe nda ṋewa nga Mudzimu, nda rabela nga nḓila ine vhathu vha ḓo kona u pfesesa. Ndi tshi imba ndi ḓo shumisa tshifhiwa tshe nda ṋewa nga Mudzimu, nda imba nga nḓila ine vhathu vha ḓo kona u pfesesa.
16 Zwa sa ralo, arali ni tshi renda Mudzimu nga tshifhiwa tshe a ni ṋea, muthu zwawe a re vhukati haṋu u ḓo amba hani uri “Amen” kha zwine na zwi livhuwa, a sa ḓivhi zwine na khou amba?
17 Ndi ngoho uri ni khou rabela Mudzimu nga nḓila yavhuḓi, fhedzi muṅwe ha khou khwaṱhiswa.
18 Ndi livhuwa Mudzimu uri ndi amba nga ndimi nnzhi u ni fhira noṱhe.
19 Ndi tshivhidzoni ndo vha ndi tshi ḓo amba maipfi maṱanu ane a pfeseswa, uri ndi gudise vhaṅwe, nṱhani ha u amba maipfi a zwigidi zwa fumi* nga ndimi dzine vhaṅwe vha si dzi pfesese.+
20 Vhahashu, ni songo humbula sa vhana,+ fhedzi zwi tshi ḓa kha vhuvhi ni nge vhana;+ ni humbule sa a re na lutendo lwo khwaṱhaho.+
21 Kha Mulayo ho ṅwaliwa u pfi: “Yehova* u ri, ‘Ndi ḓo amba na havha vhathu ndi tshi shumisa vhatsinda na vhathu vhane vha amba nyambo dzo fhambanaho. Fhedzi a vha nga nthetshelesi.’”+
22 Nga zwenezwo, ndimi a si dza vhatendi, dzo itelwa vha sa tendi,+ ngeno vhuporofita vhu ha vhane vha tenda, vhu si ha vhathu vha sa tendi.
23 Arali ha ḓa vhathu zwavho kana vha sa tendi, no kuvhangana noṱhe ni tshi khou amba nga ndimi, naa vha nga si ri ni khou penga?
24 Arali ha ḓa muthu zwawe kana a sa tendi, noṱhe ni tshi khou porofita, zwe na zwi amba zwi ḓo mu kaidza, zwa ita uri a ḓiṱolisise.
25 U ḓo ḓivha zwi re mbiluni yawe, a gwadama a rabela Mudzimu, a ri: “Vhukuma Mudzimu u vhukati haṋu.”+
26 Vhahashu, ri nga ri mini? Musi ni tshi kuvhangana, muṅwe u imbela Mudzimu, muṅwe u a funza, muṅwe u amba zwe a dzumbululelwa nga Mudzimu, muṅwe u amba nga ndimi, muṅwe ndi wa u ṱalutshedzela.+ Zwithu zwoṱhe kha zwi itwe u itela u khwaṱhisa tshivhidzo.
27 Arali hu na vhane vha amba nga ndimi, kha vha vhe vhavhili kana vhararu, vha sielisane, hu vhe na ane a ṱalutshedzela.+
28 Fhedzi arali hu si na muṱalutshedzeli, vha fhumule tshivhidzoni, vha ambe na Mudzimu mbiluni dzavho.
29 Arali hu na vhaporofita, nga hu ambe vhavhili kana vhararu,+ vhaṅwe vha thetshelese uri vha pfesese zwine zwa amba zwone.
30 Arali muṅwe a dzumbululelwa nga Mudzimu o dzula henefho, we a vha a tshi khou amba a fhumule uri muṅwe a ambe.
31 Ni porofite nga muthihi nga muthihi, uri vhoṱhe vha gude na u ṱuṱuwedzwa.+
32 Vhaporofita vha shumise tshifhiwa tshe vha ṋewa nga Mudzimu nga nḓila yo dzudzanyeaho.
33 Ngauri Mudzimu ndi Mudzimu wa mulalo, o dzudzanyea.+
Samusi zwo tou ralo zwivhidzoni zwoṱhe zwa vhakhethwa,
34 vhafumakadzi vha fhumule zwivhidzoni, ngauri a zwo ngo tendelwa uri vha ambe.+ Nṱhani hazwo, kha vha ḓiṱukufhadze,+ samusi na Mulayo u tshi ralo.
35 Arali hu na zwine vha sa zwi pfesese, vha vhudzise vhanna vhavho hayani, ngauri zwi a shonisa mufumakadzi a tshi amba na tshivhidzo.
36 Naa ipfi ḽa Mudzimu ḽi bva kha inwi? Kani ḽo ṋewa inwi fhedzi?
37 Ane a humbula uri u muporofita kana o ṋewa tshifhiwa tshi bvaho kha Mudzimu, kha ṱanganedze uri zwine nda ni ṅwalela ndi mulayo u bvaho kha Murena.
38 Ane a si thetshelese zwenezwi, mu litsheni o ralo.
39 Vhahashu, dzulani ni tshi ita nga nungo dzoṱhe uri ni porofite,+ fhedzi ni songo thivhela ane a amba nga ndimi.+
40 Zwithu zwoṱhe kha zwi itwe nga nḓila yavhuḓi na yo dzudzanyeaho.+
