Vhurifhi Ha U Thoma Vhu Yaho Kha Vhathesalonika 4:1-18
4 Vhahashu, ni khou tshila nga nḓila i takadzaho Mudzimu+ samusi ro ni funza, fhedzi zwino ri a ni ṱuṱuwedza na u ni humbela dzinani ḽa Murena Yesu, uri ni bvele phanḓa ni tshi zwi ita nga vhuḓalo.
2 Ngauri ni a ḓivha zwe ra ni vhudza* zwone dzinani ḽa Murena Yesu.
3 Ngauri Mudzimu u ṱoḓa ni tshi vha vhakhethwa,+ ni tshi iledza u ḓifara luvhi nga zwa vhudzekani.*+
4 Noṱhe ni lange mivhili yaṋu,+ uri ni vhe vhakhethwa+ na vha ṱhonifheaho,
5 ni songo edzisa vha dzitshaka vha sa ḓivhiho Mudzimu,+ vhane vha langiwa nga nyemulo dza u ita zwa vhudzekani, vha sa fushei.+
6 Hu songo vha na ane a khakhela wahawe kana u mu huvhadza nga zwenezwi, ngauri Yehova* u ḓo pfisa vhuṱungu vhane vha ita zwenezwo, samusi ro ni vhudza na u ni ṱalutshedza zwavhuḓi.
7 Ngauri Mudzimu ho ngo ri vhidzela vhuyaḓa, fhedzi o ri vhidza uri ri vhe vhakhethwa.+
8 Ane a nyadza zwenezwi ha khou nyadza muthu, u khou nyadza Mudzimu,+ ane a ni ṋea muya wawe mukhethwa.+
9 Naho zwo ralo, a zwi ṱoḓei uri ri ni ṅwalele nga ha u funana sa murathu na mukomana,+ ngauri Mudzimu o ni funza uri ni funane.+
10 Ni khou ita zwenezwo kha vhahashu vhoṱhe vha Makedonia. Vhahashu, ri a ni ṱuṱuwedza uri ni dzule ni tshi ita zwenezwo nga vhuḓalo.
11 Lwelani u tshila nga mulalo,+ ni sa dzheneleli kha mafhungo a vhaṅwe,+ ni shume nga zwanḓa zwaṋu+ samusi ro ni vhudza,
12 uri vha sa tendi vha kone u vhona uri ni ḓifara zwavhuḓi+ na uri a ni shayi tshithu.
13 Zwiṅwe hafhu, vhahashu, ri ṱoḓa ni tshi ḓivha nga ha zwine zwa ḓo itea kha vho faho,+ uri ni si ṱungufhale u fana na vhane vha si vhe na fhulufhelo.+
14 Arali ri tshi tenda uri Yesu o fa, a vuswa,+ Mudzimu u ḓo vusa vhe vha fa vhe na vhuthihi na Yesu, uri vha vhe na Yesu.+
15 Ngauri zwenezwo ndi zwine ra ni vhudza nga ipfi ḽa Yehova,* uri riṋe vhane ra ḓo vha ri tshi khou tshila tshifhingani tsha u vha hone ha Murena ri nga si vuswe phanḓa ha vho faho;
16 ngauri Murena u ḓo tsa a tshi bva ṱaḓulu, u ḓo vhidzelela nga ipfi ḽa muhulwane wa vharuṅwa,+ o fara phalaphala ya Mudzimu, vhafunziwa vha Yesu vho faho vha ḓo vuswa u thoma.+
17 Nga murahu, riṋe vhane ra ḓo vha ri tshi khou tshila, ri ḓo takulelwa makoleni navho,+ uri ri ṱangane na Murena+ tshikhalani; ra kona u vha na Murena misi yoṱhe.+
18 Ngauralo, dzulani ni tshi khuthadzana nga enea maipfi.
Ṱhaluso dzi re magumoni a siaṱari
^ Kana “laya.”
^ Nga Tshigerika ndi porneia. Sedzani Mutevhe Wa Ṱhalutshedzo Ya Maipfi.
