Vhurifhi Ha U Thoma Vhu Yaho Kha Vhathesalonika 5:1-28
5 Vhahashu, a zwi ṱoḓei uri ni ṅwalelwe nga ha zwifhinga zwo vhewaho.
2 Ngauri ni a zwi ḓivha uri ḓuvha ḽa Yehova*+ ḽi ḓo ḓa sa mbava i tshi ḓa vhusiku.+
3 Musi vha tshi kha ḓi ri, “Mulalo na u tsireledzea!” Vha ḓo welwa nga khombo vha songo zwi lavhelela,+ u fana na vhuṱungu vhune ha pfiwa nga mufumakadzi musi a tshi beba, a vha nga ponyoki.
4 Vhahashu, a ni swiswini u fana na mbava, lune ḽeneḽo ḓuvha ḽa ḓo ni ḓela ni songo zwi lavhelela,
5 ngauri noṱhe ni vharwa vha tshedza na vharwa vha masiari.+ A ri vha vhusiku kana vha swiswi.+
6 Ngauralo, ri songo eḓela u fana na vhaṅwe,+ fhedzi kha ri dzule ro fhaṱuwa+ na u dzula ro dzivhuluwa.+
7 Ngauri vha eḓelaho vha eḓela vhusiku, vha kambiwaho vha kambiwa vhusiku.+
8 Fhedzi riṋe ri vha masiari, kha ri dzule ro dzivhuluwa, ro tsireledza khana nga lutendo na lufuno, ro ambara fhulufhelo ḽa u tshidzwa sa gondolo;+
9 ngauri Mudzimu ho ngo ri nanga uri ri pfiswe vhuṱungu, o ri nanga uri ri tshidzwe+ nga Murena washu Yesu Kristo.
10 O ri fela+ uri ri tshile nae, hu sa londwi uri ri dzula ro fhaṱuwa kana ri a eḓela.*+
11 Ngauralo, bvelani phanḓa ni tshi ṱuṱuwedzana,* ni tshi fhaṱana,+ samusi ni tshi khou zwi ita.
12 Vhahashu, ri ni humbela uri ni ṱhonifhe vhane vha shuma nga maanḓa vhukati haṋu na vhane vha ni livhisa Murenani na vhane vha ni eletshedza;
13 ni vha fune na u vha hulisa nga maanḓa nga nṱhani ha mushumo wavho.+ Ni vhe na mulalo nga tshaṋu.+
14 Vhahashu, ri a ni ṱuṱuwedza uri ni kaidze* vha sa thetshelesi,+ ni ṱuṱuwedze vho tsikeledzeaho,* ni tikedze vha shayaho nungo, ni songo fhelela vhathu vhoṱhe mbilu.+
15 Ni songo lifhedza vhuvhi nga vhuvhi,+ fhedzi ni dzule ni tshi itelana zwivhuya na u zwi itela vhaṅwe vhathu vhoṱhe.+
16 Dzulani no takala.+
17 Dzulani ni tshi rabela.+
18 Ni livhuwe zwoṱhe,+ ngauri ndi zwine Mudzimu a funa ni tshi zwi ita, samusi ni tshi tevhela Kristo Yesu.
19 Ni songo dzima mulilo wa muya mukhethwa.+
20 Ni songo nyadza vhuporofita!+
21 Ṱolisisani zwithu zwoṱhe;+ ni farelele kha zwo lugaho.
22 Iledzani vhuvhi hoṱhe.+
23 Ngavhe Mudzimu wa mulalo a tshi ita uri ni vhe vhakhethwa nga ho fhelelaho. Vhahashu, ngavhe nḓila ine na humbula ngayo, mbilu na mivhili yaṋu zwi tshi dzula zwi sa solei kha zwithu zwoṱhe, u swika tshifhingani tsha u vha hone ha Murena washu Yesu Kristo.+
24 Ene ane a khou ni vhidza u a fhulufhedzea, u ḓo ita zwenezwo.
25 Vhahashu, ni dzule ni tshi ri rabelela.+
26 Ni lumelise vhahashu nga khisi.*
27 Ndi khou ni humbela dzinani ḽa Murena uri honovhu vhurifhi vhu vhalelwe vhahashu vhoṱhe.+
28 Ngavhe Murena washu Yesu Kristo a tshi ni sumbedza vhuthu vhuhulu.
Ṱhaluso dzi re magumoni a siaṱari
^ Kana “ro fa.”
^ Kana “khuthadzana.”
^ Kana “eletshedze.”
^ Kana “vho kuleaho nungo.”
^ Vhakriste vho vha vha tshi lumelisana nga khisi musi vha tshi ṱangana.
