Vhurifhi Ha U Thoma Ha Yohane 3:1-24
3 Vhonani nḓila ine Khotsi a ri funa ngayo,+ u ri vhidza vhana vhawe,*+ ri vhana vhawe zwa vhukuma. Ndi ngazwo shango ḽi sa ri ḓivhi,+ ngauri a ḽi mu ḓivhi.+
2 Vhafunwa, naho ri vhana vha Mudzimu,+ a ri athu u dzumbululelwa zwine ra ḓo vha zwone.+ Ri a ḓivha uri musi a tshi vhonadzwa ri ḓo nga ene, ngauri ri ḓo vhona zwine a vha zwone.
3 Ane a vha na ḽeneḽi fhulufhelo u a ḓikunakisa+ samusi na ene o kuna.
4 Ane a dzula a tshi ita tshivhi u khou pfuka mulayo, samusi u ita tshivhi hu u pfuka mulayo.
5 Na inwi ni a zwi ḓivha uri o vhonadzwa uri a fhelise zwivhi zwashu,+ khae a hu na tshivhi.
6 Ane a dzula e na vhuthihi nae ha dzuli a tshi ita tshivhi;+ ane a dzula a tshi ita tshivhi ha athu u mu vhona kana ha mu ḓivhi.
7 Vhananga, ni songo tenda u xedzwa; ane a dzula a tshi ita zwo lugaho o luga, samusi nae o luga.
8 Ane a dzula a tshi ita tshivhi u bva kha Diabolo, ngauri Diabolo o ita tshivhi u bva mathomoni.+ Ndi ngazwo Murwa wa Mudzimu o vhonadzwa uri a fhelise mishumo ya Diabolo.+
9 Ṅwana wa Mudzimu ha dzuli a tshi ita tshivhi,+ ngauri u na muya wa Mudzimu,* a nga si dzule a tshi ita tshivhi, ngauri ndi ṅwana wa Mudzimu.+
10 Vhana vha Mudzimu na vhana vha Diabolo vha vhonala nga hezwi: A sa dzuli a tshi ita zwo lugaho na a sa funi wahawe ha bvi kha Mudzimu.+
11 Ngauri hoyu ndi mulaedza we na u pfa u bva mathomoni, uri ri fanela u funana;+
12 ri songo nga Kaini, we a vha a tshi bva kha muvhi, a vhulaya murathu wawe.+ Ndi ngani o mu vhulaya? Ngauri mishumo yawe yo vha i mivhi,+ fhedzi ya murathu wawe yo luga.+
13 Vhahashu, ni songo mangala musi shango ḽi tshi ni vhenga.+
14 Ri a zwi ḓivha uri ro fhira lufuni ra ya vhutshiloni,+ ngauri ri funa vhahashu.+ Ane a si vhe na lufuno u dzula lufuni.+
15 Ane a vhenga wahawe ndi muvhulayi,+ ni a zwi ḓivha uri a hu na muvhulayi ane a ḓo wana vhutshilo vhu sa fheli.+
16 Ri vho ḓivha lufuno ngauri onoyo o kumedzela vhutshilo hawe a tshi itela riṋe,+ na riṋe ri tea u kumedzela vhutshilo hashu ri tshi itela vhahashu.+
17 Fhedzi ane a si pfele vhuṱungu wahawe a shayaho ngeno e na thundu, a nga amba hani uri u funa Mudzimu?+
18 Vhananga, a ro ngo fanela u sokou amba uri ri na lufuno,+ ri fanela u lu sumbedza nga mishumo+ na nga ngoho.+
19 Zwenezwi zwi ḓo ita uri ri ḓivhe uri ri ima na ngoho, ra khwaṱhisedzwa uri Mudzimu u a ri funa,
20 naho mbilu dzashu dzi tshi nga ri vhona mulandu, Mudzimu ndi muhulwane u fhira mbilu dzashu, u ḓivha zwoṱhe.+
21 Vhafunwa, arali mbilu dzashu dzi sa ri vhoni mulandu, ri amba na Mudzimu ro vhofholowa;+
22 ri a wana zwoṱhe zwine ra zwi humbela khae,+ ngauri ri tevhedza milayo yawe na u ita zwine zwa mu takadza.
23 Vhukuma, wonoyu ndi mulayo wawe wa uri ri vhe na lutendo kha dzina ḽa Murwa wawe Yesu Kristo+ na uri ri funane,+ samusi o ri laya.
24 Zwiṅwe hafhu, ane a tevhedza milayo ya Mudzimu u dzula e na vhuthihi nae,+ na Mudzimu e na vhuthihi nae. Ri a zwi ḓivha uri u dzula e na vhuthihi na riṋe ngauri u ri ṋea muya wawe.+
Ṱhaluso dzi re magumoni a siaṱari
^ Thevhedz., “vhana vha Mudzimu.”
^ Thevhedz., “ngauri mbeu ya Mudzimu i khae.”
