Vhurifhi Ha U Thoma Ha Yohane 5:1-21
5 Ane a tenda uri Yesu ndi Kristo, ndi ṅwana wa Mudzimu,+ ane a funa Mudzimu, u funa vhana vha Mudzimu.
2 Musi ri tshi funa Mudzimu na u tevhedza milayo yawe, zwi ita uri ri ḓivhe uri ri funa vhana vha Mudzimu.+
3 U funa Mudzimu zwi katela u tevhedza milayo yawe;+ milayo yawe a si muhwalo,+
4 ngauri ane a vha ṅwana wa Mudzimu u kunda shango.+ Ro kona u kunda shango ngauri ri na lutendo.+
5 Ndi nnyi ane a nga kunda shango?+ Naa a si ane a tenda uri Yesu ndi Murwa wa Mudzimu?+
6 Yesu Kristo o ḓa nga maḓi na malofha, ho ngo ḓa nga maḓi fhedzi,+ o ḓa nga maḓi na malofha.+ Muya mukhethwa ndi wone une wa ri ḓivhadza+ ngauri ndi wa ngoho.
7 Hu na zwithu zwiraru zwine zwa dzumbulula ngoho nga ha Yesu:
8 ndi muya mukhethwa,+ maḓi+ na malofha,+ vhuraru hazwo zwi a tendelana.
9 Arali ri tshi tenda zwine vhathu vha zwi amba, zwine Mudzimu a zwi amba zwi fhira zwa vhathu. Ngauri ndi Mudzimu ane a ri vhudza ngoho nga ha Murwa wawe.
10 Ane a tenda Murwa wa Mudzimu, u tenda zwe Mudzimu a mu vhudza. A sa tendi Mudzimu, u amba uri Mudzimu u a zwifha,+ ngauri ha tendi zwe Mudzimu a zwi amba nga ha Murwa wawe.
11 Ri na vhuṱanzi ha uri Mudzimu o ri ṋea vhutshilo vhu sa fheli,+ ri vhu wana nga nṱhani ha Murwa wawe.+
12 A re na vhuthihi na Murwa, u na fhulufhelo ḽa vhutshilo vhu sa fheli; a si na vhuthihi na Murwa wa Mudzimu, ha na fhulufhelo ḽa vhutshilo vhu sa fheli.+
13 Ndi khou ni ṅwalela zwenezwi uri ni ḓivhe uri ni na vhutshilo vhu sa fheli,+ inwi vhane na tenda dzina ḽa Murwa wa Mudzimu.+
14 Ri fhulufhela+ uri arali ra humbela zwine zwa tshimbidzana na zwine a zwi funa, u ḓo ri pfa.+
15 Zwiṅwe hafhu, arali ri tshi ḓivha uri u a ri pfa kha zwoṱhe zwine ra mu humbela, ri a zwi ḓivha uri ri ḓo wana zwe ra mu humbela zwone.+
16 Ane a vhona wahawe a tshi ita tshivhi tshi sa isi lufuni, u fanela u mu rabelela, Mudzimu u ḓo ṋea vhutshilo*+ vhane vha ita tshivhi tshi sa isi lufuni. Hu na tshivhi tshi isaho lufuni.+ Hu songo vha na ane a rabelela ane a ita tshivhi tsho raloho.
17 Vhuvhi hoṱhe ndi tshivhi,+ fhedzi hu na tshivhi tshi sa isi lufuni.
18 Ri a zwi ḓivha uri vhana vha Mudzimu a vha dzuli vha tshi ita tshivhi, fhedzi ṅwana wa Mudzimu* u a vha tsireledza, muvhi a nga si vha ite tshithu.+
19 Ri a zwi ḓivha uri ri bva kha Mudzimu, fhedzi shango ḽoṱhe ḽi zwanḓani zwa muvhi.+
20 Fhedzi ri a zwi ḓivha uri Murwa wa Mudzimu o ḓa+ a ri ṋea vhuṱali uri ri kone u ḓivha Mudzimu wa ngoho. Ri na vhuthihi nae+ nga nṱhani ha Murwa wawe Yesu Kristo. Ndi ene Mudzimu wa ngoho ane a ri ṋea vhutshilo vhu sa fheli.+
21 Vhananga, ṱutshelani kule na midzimu ya zwifanyiso.+
Ṱhaluso dzi re magumoni a siaṱari
^ Khamusi zwi ambela kha u hangwelwa zwivhi.
^ Ndi Yesu Kristo Murwa wa Mudzimu.
