Bugu Ya Vhuvhili Ya Dzikhosi 1:1-18
-
Elia u porofita nga ha lufu lwa Ahasia (1-18)
1 Musi Ahaba o no fa, Vhamoaba+ vha shandukela Vhaisiraele.
2 Ndi nga tshenetsho tshifhinga he Ahasia a wa nga buli ḽe ḽa vha ḽi kamarani yawe ya nṱha ngei Samaria a huvhala. Nga zwenezwo, a vhidza vhaḓinḓa vhawe a amba navho a ri: “Tshimbilani ni ye u vhudzisa Baali-sebubu mudzimu wa Ekironi+ uri ndi ḓivhe arali ndi tshi ḓo fhola.”+
3 Fhedzi muruṅwa wa Yehova a amba na Elia*+ wa Mutisibe a ri: “Takuwa u ye u ṱangane na vhaḓinḓa vha khosi ya Samaria u ambe navho u ri: ‘Naa hu tou vha hu si na Mudzimu kha ḽa Isiraele ni tshi vhuya na ya u vhudzisa Baali-sebubu mudzimu wa Ekironi?+
4 Nga zwenezwo, Yehova u ri: “A u nga vuwi kha mmbete we wa eḓela khawo, ngauri u ḓo fa.”’” Elia a ṱuwa.
5 Musi vhaḓinḓa vha tshi vhuyelela khae, a ṱavhanya a vha vhudzisa a ri: “No humela mini?”
6 Vha mu fhindula vha ri: “Hu na munna we a ḓa a ṱangana na riṋe, a amba na riṋe a ri: ‘Humelani ha khosi ye ya ni ruma ni i vhudze uri: “Yehova u ri: ‘Naa hu tou vha hu si na Mudzimu kha ḽa Isiraele u tshi vhuya wa ruma vhathu uri vha ye u vhudzisa Baali-sebubu mudzimu wa Ekironi? Nga zwenezwo, a u nga vuwi kha mmbete we wa eḓela khawo, ngauri u ḓo fa.’”’”+
7 A vha vhudzisa a ri: “Uyo munna we na ṱangana nae a ni vhudza eneo mafhungo o vha o tou itisa hani?”
8 Vha mu fhindula vha ri: “O vha o ambara tshiambaro tsha mamvele,+ khunduni o vhofha bannda ḽa mukumba.”+ A ṱavhanya a ri: “Ndi Elia wa Mutisibe.”
9 Ndi hone khosi i tshi ruma murangaphanḓa wa vha 50 e na vhanna vhawe vha 50 kha Elia. Musi a tshi gonya he a vha e hone, a mu wana o dzula ṱhodzini ya thavha. A amba nae a ri: “Iwe mushumeli wa Mudzimu wa ngoho,+ khosi i ri: ‘Tsela fhasi.’”
10 Fhedzi Elia a fhindula murangaphanḓa wa vha 50 a ri: “Arali ndi mushumeli wa Mudzimu, kha hu tse mulilo u tshi bva ṱaḓulu+ u fhelise iwe na vhanna vhau vha 50.” Ha tsa mulilo u tshi bva ṱaḓulu wa mu fhelisa na vhanna vhawe vha 50.
11 Khosi ya dovha ya ruma murangaphanḓa wa vha 50 e na vhanna vhawe vha 50 kha Elia. A ya a amba nae a ri: “Iwe mushumeli wa Mudzimu wa ngoho, khosi i ri: ‘Tsela fhasi nga u ṱavhanya.’”
12 Fhedzi Elia a vha fhindula a ri: “Arali ndi mushumeli wa Mudzimu wa ngoho, kha hu tse mulilo u tshi bva ṱaḓulu u fhelise iwe na vhanna vhau vha 50.” Ha tsa mulilo u tshi bva ṱaḓulu wa mu fhelisa na vhanna vhawe vha 50.
13 Khosi ya dovha ya ruma murangaphanḓa wa vha 50 kha Elia e na vhanna vhawe vha 50. Fhedzi murangaphanḓa wa vhuraru wa vha 50 a ya a gwadama phanḓa ha Elia a humbela u khathutshelwa a ri: “Mushumeli wa Mudzimu wa ngoho, ndi khou humbela uri u nkhathutshele u dovhe u khathutshele na havha vhashumeli vhau vha 50.
14 Mulilo wo no tsa u tshi bva ṱaḓulu wa fhelisa vhaḽa vharangaphanḓa vhavhili vha zwigwada zwa 50 vha u thoma na zwigwada zwavho zwa vha 50, fhedzi nkhathutshele u nnditshe ndi tshile.”
15 Muruṅwa wa Yehova a amba na Elia a ri: “Itsa nae. U songo mu ofha.” Ngauralo, a takuwa a tsa nae a ya ha khosi.
16 Elia a amba na khosi a ri, “Yehova u ri: ‘Wo ruma vhaḓinḓa uri vha ye u vhudzisa Baali-sebubu mudzimu wa Ekironi.+ Naa hu tou vha hu si na Mudzimu kha ḽa Isiraele?+ Ndi ngani u songo mu vhudzisa? Nga nṱhani ha zwenezwo, a u tsha ḓo vuwa kha mmbete we wa eḓela khawo ngauri u ḓo fa.’”
17 A fa sa zwe Yehova a amba a tshi vhudza Elia; ngauri o vha a si na murwa, Yehoramu*+ a vha khosi vhudzuloni hawe, nga ṅwaha wa vhuvhili hu tshi khou vhusa Yehoramu+ murwa wa Yehoshafati khosi ya Yuda.
18 Mafhungo oṱhe a Ahasia+ na zwe a ita, naa a zwo ngo ṅwaliwa buguni ya mafhungo a zwifhingani zwa kale zwa mahosi a Isiraele?
Ṱhaluso dzi re magumoni a siaṱari
^ Zwine zwa amba uri “Mudzimu Wanga Ndi Yehova.”
^ Ndi murathu wa Ahasia.
