Bugu Ya Vhuvhili Ya Dzikhosi 11:1-21
11 Musi Athalia+ mme a Ahasia a tshi vhona uri murwa wawe o fa,+ a vhulaya vhoṱhe vha muṱa wa vhuhosini.*+
2 Naho zwo ralo, Yehoshiba ṅwananyana wa Khosi Yehoramu, khaladzi a Ahasia, a dzhia Yehoashi+ murwa wa Ahasia, a mu tswa vhukati ha vharwa vha khosi vhane vha ḓo vhulawa, a mu dzumba kamarani ya nga ngomu na muleli wawe. Vha mu dzumba uri Athalia a si mu vhone, nga zwenezwo a si vhulawe.
3 A dzula nae miṅwaha ya rathi, o dzumbiwa nḓuni ya Yehova, musi Athalia a tshi khou vhusa shango.
4 Nga ṅwaha wa vhusumbe, Yehoyada a vhidza vhane vha ranga phanḓa vha maḓana vha vhalindi vha Vhakaria na vhalindi vha pfamo+ uri vha ḓe khae nḓuni ya Yehova. A vhofha mulanga navho a vha anisa nḓuni ya Yehova, nga murahu a vha sumbedza murwa wa khosi.+
5 A vha laya a ri: “Zwine na fanela u zwi ita ndi hezwi: Tshigwada tshithihi kha zwiraru tshi ḓo shuma nga Savhatha, tshi ḓo linda nnḓu* ya khosi,+
6 tshiṅwe tshigwada tshi ḓo ima Khoroni ya Mutheo, tshiṅwe tshi ḓo ima khoroni i re murahu ha vhalindi vha pfamo. Ni ḓo tou sielisana kha u linda nnḓu.
7 Zwigwada zwaṋu zwivhili zwine zwa ḓo vha zwi sa khou shuma nga Savhatha zwi tea u linda nnḓu ya Yehova uri zwi tsireledze khosi.
8 Ni fanela u tanga khosi thungo dzoṱhe, muṅwe na muṅwe a fare zwiṱhavhane zwawe. Ane a dzhena nga ngomu u ḓo vhulawa. Ni dzule ni na khosi hune ya ya.”*
9 Vharangaphanḓa vha vha maḓana+ vha ita zwe tshifhe Yehoyada a vha laedza zwone. Muṅwe na muṅwe a dzhia vhanna vhawe vha shumaho nga Savhatha na vha sa shumi nga Savhatha, vha ḓa kha tshifhe Yehoyada.+
10 Tshifhe a ṋea vhane vha ranga phanḓa vha maḓana mapfumo na zwiṱangu zwa Khosi Davida, zwe zwa vha zwi nḓuni ya Yehova.
11 Vhalindi vha pfamoni+ vha ima vhuimoni havho, vho fara zwiṱhavhane, vho ima thungo ya tsha u ḽa tsha nnḓu na thungo ya tsha monde tsha nnḓu, tsini na aḽeṱare+ na nnḓu, vhoṱhe vho tanga khosi.
12 Yehoyada a bvisa murwa wa khosi+ vha mu ambadza khare, vha mu ṋea Vhuṱanzi,*+ vha mu vhea uri a vhe khosi, vha mu ḓodza. Vha thoma u vhanda zwanḓa vha ri: “Khosi nga i lalame!”+
13 Musi Athalia a tshi pfa phosho ya vhathu vha tshi khou gidima, a ṱavhanya a ḓa kha vhathu vha re nḓuni ya Yehova.+
14 A vhona khosi yo ima henefho tsini na phuphu u ya nga maitele a hone.+ Vharangaphanḓa na vhalidzi vha phalaphala+ vho vha vhe na khosi, vhathu vhoṱhe shangoni vho vha vho takala vha tshi khou lidza phalaphala. Nga zwenezwo, Athalia a kherukanya zwiambaro zwawe a vhidzelela a ri: “Ndi tshimbevha! Ndi tshimbevha!”
15 Fhedzi tshifhe Yehoyada a laya vhane vha ranga phanḓa vha maḓana,+ vho vhewaho uri vha lange mmbi, a ri: “Mu bviseni vhukati ha vhathu, ane a mu tevhela, a vhulawe nga banga!” Ngauri tshifhe o vha o ri: “A songo vhulawa nḓuni ya Yehova.”
16 Vha mu fara, musi a tshi swika fhethu he bere dza vha dzi tshi dzhena ngaho nḓuni* ya khosi,+ vha mu vhulayela henefho.
17 Yehoyada a vhofha mulanga na Yehova na khosi na vhathu,+ uri vha ḓo bvela phanḓa vhe vhathu vha Yehova, a dovha a vhofha muṅwe mulanga na khosi na vhathu.+
18 Nga murahu ha zwenezwo vhathu vhoṱhe vha shango vha ḓa nḓuni* ya Baali vha thutha aḽeṱare dzawe,+ vha kwashekanya zwifanyiso zwawe,+ vha vhulaya Matani tshifhe wa Baali+ phanḓa ha dziaḽeṱare.
Tshifhe a vhea vhalavhelesi vha u langa nnḓu ya Yehova.+
19 Zwiṅwe hafhu, a dzhia vhane vha ranga phanḓa vha maḓana,+ vhalindi vha Vhakaria, vhalindi vha pfamo+ na vhathu vhoṱhe vha shango vha fhelekedza khosi i tshi bva nḓuni ya Yehova, vha dzhena nḓuni* ya khosi nga nḓila i fhiraho nga khoroni ya vhalindi vha pfamo. Khosi ya dzula kha khuluṋoni ya mahosi.+
20 Vhathu vhoṱhe vha ḽeneḽo shango vha takala, muḓini ha dzika, ngauri vho vhulaya Athalia nga banga nḓuni ya khosi.
21 Yehoashi+ o vha e na miṅwaha ya sumbe musi a tshi vha khosi.+
Ṱhaluso dzi re magumoni a siaṱari
^ Thevhedz., “vhoṱhe vha mbeu ya muvhuso.”
^ Kana “pfamo.”
^ Thevhedz., “musi i tshi bva na musi i tshi dzhena.”
^ Khamusi ndi mupombo u re na Mulayo wa Mudzimu.
^ Kana “pfamoni.”
^ Kana “thembeleni.”
^ Kana “pfamoni.”
