Bugu Ya Vhuvhili Ya Dzikhosi 12:1-21
12 Nga ṅwaha wa vhusumbe hu tshi khou vhusa Yehu,+ Yehoashi+ a vha khosi, o vhusa miṅwaha ya 40 Yerusalema. Mme awe o vha a tshi pfi Tsibiya a tshi bva Beresaba.+
2 Yehoashi o bvela phanḓa a tshi ita zwo lugaho phanḓa ha Yehova misi yoṱhe tshifhe Yehoyada a tshi mu funza.
3 Naho zwo ralo, ho ngo thutha fhethu ha vhurabeli,+ vhathu vho vha vha tshi kha ḓi dubisela midzimu yavho zwiṱhavhelo henefho fhethu ha vhurabeli.
4 Yehoashi a amba na vhotshifhe a ri: “Dzhiani tshelede yoṱhe ine ya ḓiswa nḓuni ya Yehova u itela zwifhiwa zwikhethwa,+ tshelede ine muṅwe na muṅwe a fanela u i ḓisa,+ tshelede yo anganyelwaho ine muthu a tea u i bvisa na tshelede yoṱhe ine muthu muṅwe na muṅwe a i ḓisa nḓuni ya Yehova mbilu yawe i tshi zwi funa.+
5 Vhotshifhe vha ḓo i ṱanganedza i tshi bva kha vhane vha khou vha ṋea, vha i shumisa u lugisa nnḓu, huṅwe na huṅwe ho tshinyalaho.”*+
6 Fhedzi nga ṅwaha wa vhu 23 hu tshi khou vhusa Khosi Yehoashi, vhotshifhe vho vha vha sa athu u lugisa fhethu ho tshinyalaho henefho nḓuni.+
7 Khosi Yehoashi a vhidza tshifhe Yehoyada+ na vhaṅwe vhotshifhe a amba navho a ri: “Ndi ngani ni sa khou lugisa fhethu ho tshinyalaho nḓuni? Nga zwenezwo, ni songo tsha dzhia iṅwe tshelede kha vhane vha ni ṋea nga nnḓa ha musi i tshi ḓo shumiselwa u lugisa nnḓu.”+
8 Vhotshifhe vha tenda uri a vha tsha ḓo dzhia tshelede kha vhathu na uri a vha nga ḓo vha na vhuḓifhinduleli ha u lugisa nnḓu.
9 Tshifhe Yehoyada a dzhia bogisi+ a phula buli kha mutibo waḽo, a ḽi vhea tsini na aḽeṱare kha tsha u ḽa musi muthu a tshi dzhena nḓuni ya Yehova. Ndi henefho he vhotshifhe vhane vha shuma u linda miṋango vha vhea hone tshelede yoṱhe ine ya ḓiswa nḓuni ya Yehova.+
10 Musi vha tshi vhona uri bogisi ḽi na tshelede nnzhi, muṅwaleli wa khosi na tshifhe muhulu vho vha vha tshi ḓa vha kuvhanganya* tshelede ye ya ḓiswa nḓuni ya Yehova vha i vhala.+
11 Musi vho no vhala yeneyo tshelede vho vha vha tshi i ṋea vhathu vho vhewaho uri vha lavhelese mushumo we wa vha u tshi khou itwa nḓuni ya Yehova. Vho vha vha tshi holela vhavhaḓi vha mabulannga na vhafhaṱi vha shumaho nḓuni ya Yehova+
12 na vhatsheṱi vha matombo na vhatshei vha matombo. Vha dovha vha renga matanda na matombo o tsheṱiwaho u itela u lugisa fhethu ho tshinyalaho nḓuni ya Yehova, vha shumisa tshelede kha dziṅwe tshinyalelo dzoṱhe dze dza vha hone hu tshi lugiswa yeneyo nnḓu.
13 Naho zwo ralo, kha tshelede ye ya ḓiswa nḓuni ya Yehova a hu na ye ya shumiswa u ita masambelo, zwa u dzima mulilo, zwigoḓelo, phalaphala+ kana mudzio naho u ufhio wa musuku kana wa siḽiva wa nḓuni ya Yehova.+
14 Vho vha vha tshi holela vhashumi fhedzi, vha tshi lugisa ngayo nnḓu ya Yehova.
15 Vho vha vha sa ṱoḓi vhuṱanzi kha vhanna vhe vha vha ṋea tshelede uri vha holele vhashumi, ngauri vho vha vha tshi fhulufhedzea.+
16 Naho zwo ralo, tshelede ya zwifhiwa zwa u pfumelela mulandu+ na tshelede ya zwifhiwa zwa u pfumelela tshivhi yo vha i sa ḓiswi nḓuni ya Yehova; yo vha i tshi ya ha vhotshifhe.+
17 Ndi nga tshenetsho tshifhinga he Hasaele+ khosi ya Siria a gonya a lwa na Gathi+ a u thuba, nga murahu a humbula u vutshela Yerusalema.+
18 Khosi Yehoashi a dzhia zwifhiwa zwoṱhe zwikhethwa zwe vhomakhulukuku wawe Yehoshafati, Yehoramu na Ahasia mahosi a Yuda a vha o zwi ita zwikhethwa, u katela na zwifhiwa zwawe zwikhethwa na musuku woṱhe we wa vha u kha mbulungelo dza nḓuni ya Yehova na nḓuni* ya khosi, a zwi rumela ha Hasaele khosi ya Siria.+ Hasaele a litsha Yerusalema.
19 Mafhungo oṱhe a Yehoashi na zwoṱhe zwe a ita, naa a zwo ngo ṅwaliwa buguni ya zwifhingani zwa kale zwa mahosi a Yuda?
20 Naho zwo ralo, vhashumeli vha Yehoashi vha mu itela tshimbevha+ vha mu vhulaya nḓuni i re Tshikwarani,*+ ine ya vha nḓilani i tselaho Sila.
21 Vhashumeli vhawe Yosahara murwa wa Simeathi na Yehosabada murwa wa Shomere ndi vhone vhe vha mu vhulaya.+ Vho mu vhulunga na vhomakhulukuku wawe Muḓini wa Davida, murwa wawe Amatsia a vha khosi vhudzuloni hawe.+
Ṱhaluso dzi re magumoni a siaṱari
^ Kana “hune ha vha na mitwe.”
^ Kana “dzhenisa mikhwamani.” Thevhedz., “vhofha.”
^ Kana “pfamoni.”
^ Kana “vha mu vhulaya ngei Bethe-milo.”
