Bugu Ya Vhuvhili Ya Dzikhosi 13:1-25
13 Nga ṅwaha wa vhu 23 hu tshi khou vhusa Yehoashi+ murwa wa Ahasia+ khosi ya Yuda, Yoahasi murwa wa Yehu+ a vha khosi kha ḽa Isiraele e ngei Samaria, o vhusa miṅwaha ya 17.
2 O bvela phanḓa a tshi ita zwi sa takadzi Yehova, a ita tshivhi tshe Yerobeamu murwa wa Nebatha a ita uri Vhaisiraele vha tshi ite.+ Ho ngo tshi litsha.
3 Yehova a sinyutshela Vhaisiraele,+ a vha kumedzela zwanḓani zwa Khosi Hasaele+ wa Siria na zwanḓani zwa Benihadada+ murwa wa Hasaele maḓuvha oṱhe a vhutshilo havho.
4 Nga u ya ha tshifhinga Yoahasi a humbela Yehova uri a mu sumbedze vhuthu, Yehova a mu thetshelesa, nge a vhona khosi ya Siria i tshi khou tsikeledza Isiraele.+
5 Yehova a ṋea Vhaisiraele mutshidzi+ uri a vha vhofholole zwanḓani zwa Vhasiria, Vhaisiraele vha dzula mahayani avho u fana na u thomani.*
6 (Naho zwo ralo, a vho ngo litsha tshivhi tshe muṱa wa Yerobeamu wa ita uri Vhaisiraele vha tshi ite.+ Vho bvela phanḓa vha tshi ita tshenetshi tshivhi, na thanda khethwa*+ vho i litsha yo ima Samaria.)
7 Yoahasi o vha o sala na mmbi ya vhaṋameli vha bere vha 50, gariki dza nndwa dza 10 na maswole a 10 000, ngauri khosi ya Siria yo vha yo vha fhelisa,+ yo vha kandekanya vha nga buse ḽine ḽa vha hone nga tshifhinga tsha u fhefhera.+
8 Mafhungo oṱhe a Yoahasi na zwoṱhe zwe a ita na mishumo yawe i sumbedzaho u vha na maanḓa, naa a zwo ngo ṅwaliwa buguni ya mafhungo a zwifhingani zwa kale zwa mahosi a Isiraele?
9 Yoahasi a vhulungwa na vhomakhulukuku wawe ngei Samaria;+ murwa wawe Yehoashi a vha khosi vhudzuloni hawe.
10 Nga ṅwaha wa vhu 37 hu tshi khou vhusa Yehoashi khosi ya Yuda, Yehoashi+ murwa wa Yoahasi a vha khosi kha ḽa Isiraele e Samaria miṅwaha ya 16.
11 O bvela phanḓa a tshi ita zwi sa takadzi Yehova, a si ṱutshele zwivhi zwoṱhe zwe Yerobeamu murwa wa Nebatha a ita uri Vhaisiraele vha zwi ite.+ A bvela phanḓa* a tshi ita zwenezwo zwivhi.
12 Mafhungo oṱhe a Yehoashi na zwoṱhe zwe a ita na mishumo yawe i sumbedzaho u vha na maanḓa na nḓila ye a lwa ngayo na Amatsia khosi ya Yuda,+ naa a zwo ngo ṅwaliwa buguni ya mafhungo a zwifhingani zwa kale zwa mahosi a Isiraele?
13 Yehoashi a vhulungwa na vhomakhulukuku wawe, Yerobeamu*+ a dzula kha khuluṋoni yawe. Yehoashi a vhulungwa ngei Samaria na mahosi a Isiraele.+
14 Musi Elisha+ o farwa nga vhulwadze he ha vha vhu tshi ḓo mu vhulaya, Yehoashi khosi ya Isiraele a ya khae a mu lilela, a ri: “Khotsi anga, khotsi anga! Gariki dza Isiraele na vhaṋameli vha bere dzawe!”+
15 Elisha a amba nae a ri: “Dzhia vhura na misevhe.” Ngauralo, a dzhia vhura na misevhe.
16 A amba na khosi ya Isiraele a ri: “Fara vhura.” A vhu fara, nga murahu Elisha a fara khosi kha zwanḓa.
17 A amba na khosi a ri: “Vula fasiṱere ḽo lavhelesaho vhubvaḓuvha.” Ya ḽi vula. Elisha a ri: “Pfula!” Ya pfula. Elisha a ri: “Hoyu ndi musevhe wa Yehova wa u kunda,* musevhe wa u kunda Vhasiria! Iwe u ḓo vhulaya Vhasiria ngei Afeke+ wa vha fhedza.”
18 A dovha a ri: “Dzhia misevhe,” khosi ya i dzhia. A amba na khosi ya Isiraele a ri: “Irwa fhasi.” Ngauralo, ya rwa fhasi luraru ya litsha.
19 Mushumeli wa Mudzimu wa ngoho a i sinyutshela a ri: “Wo vha wo fanela u rwa fhasi luṱanu kana lwa rathi! Wo vha u tshi ḓo kunda Vhasiria u swika u tshi vha fhedza, fhedzi zwino u ḓo vha kunda luraru fhedzi.”+
20 Nga murahu ha zwenezwo, Elisha a fa a vhulungwa. Ho vha hu na tshigwada tsha mavemu tsha Vhamoaba+ tshe tsha vha tshi tshi ḓa kha ḽeneḽo shango mathomoni a ṅwaha.
21 Musi vhaṅwe vhathu vha tshi khou vhulunga muṅwe munna, vha vhona tshigwada tsha mavemu, vha ṱavhanya vha posa tshitumbu tsha uyo munna vhiḓani ḽa Elisha vha shavha. Musi tshitumbu tsha onoyo munna tshi tshi kwama marambo a Elisha, onoyo munna a vuwa+ a ima nga milenzhe.
22 Hasaele+ khosi ya Siria o vha a tshi tsikeledza Vhaisiraele+ maḓuvha oṱhe a vhutshilo ha Yoahasi.
23 Naho zwo ralo, Yehova a vha sumbedza vhuthu na u vha khathutshela+ na u vha ṱhogomela nga nṱhani ha mulanga wawe na Abrahamu,+ Isaka+ na Yakobo.+ O vha a sa ṱoḓi u vha fhelisa, ndi ngazwo a songo vha pandela phanḓa hawe u swika na ṋamusi.
24 Musi Hasaele khosi ya Siria a tshi fa, murwa wawe Benihadada a vha khosi vhudzuloni hawe.
25 Yehoashi murwa wa Yoahasi a dzhiulula miḓi kha Benihadada murwa wa Hasaele ye ya vha yo dzhiiwa kha khotsi awe Yoahasi nndwani. Yehoashi o mu kunda luraru+ a dzhiulula miḓi ya Isiraele.
Ṱhaluso dzi re magumoni a siaṱari
^ Ndi u dzula nga mulalo na u tsireledzea.
^ Sedzani Mutevhe Wa Ṱhalutshedzo Ya Maipfi.
^ Thevhedz., “tshimbila.”
^ Ndi Yerobeamu wa Vhuvhili.
^ Kana “tshidza.”
